Kigali-Rwanda

Mostly cloudy
25°C
 

Ruremesha yasobanuye iby’igitutu kimuriho kubera gutsindwa

Yanditswe na Bugingo Fidèle

Ku ya 07-01-2019 saa 13:33:24
Umutoza wa Musanze FC, Ruremesha utangaza ko ari ku gitutu kubera umusaruro mubi w'iyi kipe

Nyuma yo gutsindwa na Rayon Sports ibitego 2-1, umutoza w’ikipe ya Musanze FC, Ruremesha Emmanuel yatangaje ko kuba ikipe itarimo kwitwara neza byanze bikunze bimushyira ku gitutu kuko ari n’ibintu atari asanzwe amenyereye.

Musanze FC yari yatsinzwe umukino w’umunsi wa 12 na Sunrise FC ibitego 2-0, tariki 05 Mutarama 2019 yongeye gutsindwa umukino w’umunsi wa 13 na Rayon Sports ibitego 2-1 byatsinzwe na Bimenyimana na Niyonzima ku ruhande rwa Rayon Sports na ho Musanze FC itsindirwa na Shyaka Philbert.

Nyuma y’umukino, umutoza Ruremesha yavuze ko bifuzaga insinzi ariko ko bakinaga n’ikipe ikomeye. Gusa akaba yaranikomye umusifuzi Ruzindana Nsoro ko hari aho yagiye abarenganya.

Kuba iyi kipe ubu iri ku mwanya ubanziriza uwa nyuma wa 15 n’amanota 11 aho mu mikino 12 imaze gutsindwa 7, igatsinda 3 ikanganya 2, bituma uyu mutoza ajya ku gitutu cyo kuba yanakwirukanwa dore ko n’abatoza bungirije birukanwe.

Ruremesha yagize ati: “Igitutu nticyabura kuko ntabwo nari nsanzwe mbimenyereye, gusa uyu munsi twakinnye neza, tugiye kugerageza gukora ibishoboka byose ku buryo twakwitwara neza kuko tugiye no kongeramo abakinnyi cyane mu busatirizi.”

Uyu mutoza yavuze ko ubuyobozi bwamusabye ko imikino isigaye yitwara neza. Ati: “Uwa mbere turatsinzwe ariko indi isigaye tuzagerageza”. Musanze FC isigaje gukina n’Amagaju FC, Kiyovu na Mukura.

Umutoza wa Musanze FC, Ruremesha utangaza ko ari ku gitutu kubera umusaruro mubi w’iyi kipe

Umwanditsi:

Bugingo Fidèle

Tanga Igitekerezo

Email yanyu ntigaragazwa ku rubuga. Amazina na Email ni ngombwa.