17°C , Thunderstorms | Kigali-Rwanda

Rulindo: Barasaba gushakirwa isoko ry’ibijumba bya oranje

Yanditswe na Kayitare Jean Paul

Ku ya 22-09-2019 saa 09:10:02
Itsinda ry’abaturutse mu bihugu bitandukanye ku Isi ryasuye abahinzi b’ibijumba

Abahinzi bo mu Murenge wa Bushoki mu Kagari ka Nyirangarama bugaragaza ko bamaze gusobanukirwa n’akamaro ko guhinga ibijumba bya oranje (orange) bikungahaye kuri Vitamine A.

Ku rundi ruhande ariko, aba bahinzi bavuga ko mu gihe cy’umwero w’ibi bijumba badakunze kubona isoko rihagije.

Muhayimana Marigarita ni umwe mu bahinzi bahinga ibijumba bya oranje. Yagize ati “Twashoboye kwibumbira mu mashyirahamwe duhinga ibi bijumba ku buryo bwa kijyambere kuko twari tumaze gusobanukirwa akamaro kabyo. Ni ibijumba bitandukanye n’ibindi kuko byo bikorwamo biswi ndetse hakavamo n’ibindi bintu bitandukanye. Gusa mu gihe cy’umwero wabyo nta bwo tubona amasoko ahagije iyo byeze tubigemura Nyirangarama gusa. Twumva rero tubonye n’ahandi tubigurisha byaba byiza kandi twahinga byinshi ku buryo byaduteza imbere.”

Nyiramana Chantal uhinga ibijumba na we asaba ko ubuyobozi bubishinzwe bwabakorera ubuvugizi. Yagize ati “Turasaba ko twakorerwa ubuvugizi mu gihe byeze bityo tukabigeza ahantu hose kandi ikindi ni uko ibi bijumba bya oranje byagirira akamaro aho twabigurishiriza kuko bikungahaye kuri Vitamine A, bitandukanye n’ibindi bijumba bisanzwe tuzi”.

Sina Gerard, ni umwe mu bagura ibi bijumba kandi akaba yarashoboye kubibyaza umusaruro kuko abikoramo biswi n’amandazi, avuga ko agurira abahinzi bose hakiyongeraho ko na we abihinga bityo atabigura byose. Gusa yizeza abahinzi ko mu minsi iri imbere azongera ibyo yaguraga.

Yagize ati “Nakoze ubushakashatsi nsanga ibi bijumba bishobora kuvamo ibintu byinshi kuko ubu mbikoramo biswi n’amandazi ariko mu minsi iri imbere ndashaka kuzabikoramo umutobe (juice) kuko ni umushinga ndimo kwiga numara kurangira nzogera ibyo nabaguriraga.”

Umuyobozi w’Akarere ka Rulindo wungirije ushinzwe ubukungu n’iterambere, Murindwa Prosper, avuga ko bagiye gushaka uburyo ibi bijumba byajya bibikwa neza mu gihe byeze, bityo ntibyangirike ahubwo bikaba byabikwa igihe kirekire kandi hanashakwa andi masoko.

Ati “Iki gihingwa ni igihingwa kera mu misozi no mu bishanga. Ku mwero wabyo rero bijya biba byinshi ariko ni yo mpamvu twabishyiriyeho isoko ryabyo hano mu Gasiza ku muhanda ku buryo utambutse wese abimenya akabigura.

Ikindi ni uko tugiye gushaka uburyo bwashyirwaho bikajya bibikwa ku buryo bidasaza mu gihe byeze ari byinshi, bikabikwa aho kugira ngo babigurishe make byatakaje agaciro. Ikindi kandi tuzakomeza gufatanya n’uyu mufatanyabikorwa Sina kugira ngo agure ibijumba byinshi kuko we ibyo akoramo biswi n’amandazi yabasha kubibika kandi ntibyangirike”.

Itsinda ry’abitabiriye inama mpuzamahanga ku iterambere ry’ibikomoka ku gihingwa k’ibijumba n’ibirayi yaberaga i Kigali kuva tariki 25 kugeza tariki 29 Nyakanga 2019, ryasuye abahinzi bahinga ibi bijumba ndetse rinasura aho byongerererwa agaciro kwa Sina Gerard. Bagaragarijwe uburyo bivamo biswi n’ibindi bitandukanye, bizezwa kandi ko bazagaruka bagasanga banabikoramo umutobe (Juice).

Ikiro k’ibijumba bya Oranje kigura amafaranga 350 mu gihe ibindi bisanzwe bigura amafaranga 80.

Umwanditsi:

Kayitare Jean Paul

Tanga Igitekerezo

Email yanyu ntigaragazwa ku rubuga. Amazina na Email ni ngombwa.