20°C , Partly cloudy | Kigali-Rwanda

Rukundo  ukinira APR FC ashobora gusubira muri KCCA

Yanditswe na BUGINGO FIDELE

Ku ya Jun 16, 2018

Rukundo Denis  ukinira ikipe ya APR FC  ashobora gusubira mu ikipe ya  KCCA yo muri Uganda yaje aturukamo aje muri APR FC  mu ntangiriro z’uyu mwaka w’imikino 2017-2018.

Rukundo Denis wabuze umwanya uhagije wo gukina muri APR FC ashobora gusubira muri KCCA

Uyu mukinnyi  mbere yo kujya muri APR FC yari  afite umwanya ubanzamo mu ikipe ya KCCA ubu irimo gukina imikino y’amatsinda y’Afurika y’amakipe yatwaye ibikombe iwayo “Total CAF Champions League 2018”.

Akigera muri APR FC byaramugoye kubona umwanya wo gukina kuko ubusanzwe akina nka myugariro ku ruhande rw’iburyo. Kuri uyu mwanya yaje nk’umusimbura  wa Rusheshangoga Michel wari werekeje muri  Singida United yo muri Tanzania. Gusa aje yiyongera kuri Omborenga Fitina nawe wasinye imyaka ibiri aho yari avuye mu ikipe ya Topolcany MFK mu gihugu cya Slovakia mu kiciro cya 3.

Kuri ubu biravugwa ko nyuma yo kugaruka kwa Rusheshangoga Michel ndetse akaba agomba  guhabwa amasezerano muri APR FC, Rukundo Denis  ashobora gufata ikimezo cyo kuva muri iyi kipe kuko kubona umwanya wo gukina byamugora.

Rukundo Denis ajya muri APR  FC iyi kipe yishyuye KCCA ibihumbi 15 by’amadolari ni ukuvuga  asaga miliyoni 13  inaha umukinnyi miliyoni 4 ku giti ke.