Ruhango: Uwizeyimana yahereye ku bihumbi 10 none afite uruganda

Yanditswe na Uwimana Donatha

Ku ya 10-11-2019 saa 16:56:59
Uwizeyimana Clementine usigaye afite uruganda ruciriritse

Uwizeyimana Clementine w’imyaka 30 utuye mu karere ka Ruhango arubatse afite umugabo n’abana babiri. Nyuma yo kurangiza kwiga kaminuza yihangiye umurimo wo gukora amasabuni asukika.

Mu gukora amasabuni, Uwizeyimana yatangiranye igishoro cy’amafaranga ibihumbi 10, ariko ubu amaze kugera ku ruganda ruciriritse, dore ko asigaye akora n’umutobe.

Igitekerezo cyo kwihangira umurimo yakigize akirangiza kwiga kaminuza aho yize ibaruramari. Nyuma yo kubona ko kubona akazi ari ibintu bigoye, yahisemo gushaka icyo yakora ahereye ku bumenyi yakuye mu mashuri yisumbuye.

Mu kiganiro kirambuye yagiranye n’Imvaho Nshya Uwizeyimana yagize ati: “Aho nize ikiciro kibanza cy’amashuri yisumbuye bajyaga bigisha uko bakora amasabune asukika (savons liquides). Ndeba aho ntuye nsanga dufite ikibazo k’isuku ndavuga ngo ntangiriye ku mafaranga make biriya byanteza imbere. Ubwo ntangirira ku mafaranga ibihumbi 10 nkora ijerekani 2 nzigurisha n’abaturage, isabune nakoze bakayikoresha bakambwira ko ari nziza.”

Uwizeyimana avuga ko yagiye abona isoko rigari bituma yongera ibyo yakoraga, atangira kugurisha n’ibigo by’amashuri, ndetse n’abandi bantu batandukanye.

Ibyo yakoraga avuga ko yabikoreraga mu nzu imwe yabagamo. Amaze kubona amafaranga ahagije ni bwo ngo yaguye inyubako ku buryo ubu inzu abamo ifite agaciro ka miriyoni 15 uretse ko hari n’izindi nyubako.

Uwizeyimana akomeza agira ati: “Naje kubona ko gukora isabune zisukika bidahagije, mfata umwanzuro wo gukora imitobe mu myembe nyuma yo gusanga yabona abakiriya. Ubu ndi wa rwiyemezamirimo usora neza kuko nkoresha n’utumashini dutanga inyemezabuguzi”.

Imirimo Uwizeyimana yihangiye yatumye aserukira akarere aba uwa mbere, akomeza guhatana ku rwego rw’Intara muri ‘Youth connekt’. Ati: ‘Aho tugeze harashimishije kuko usanga ari uruganda nubwo ruciriritse ariko ubona ko ari uruganda kuko iyo uhageze ubona inyubako zihari n’abakozi bahoraho bagera kuri bane ubona koko ari uruganda”.

Mu byifuzo Uwizeyimana afite ngo ni uko nko mu mwaka wa 2025 muri buri karere yaba afite ububiko bw’ibyo akora bijyanye n’isabune isukika, n’imitobe. Kugeza ubu akorera mu turere twa Muhanga, Ruhango na Nyanza.

Ahamya ko kugira ngo ibikorwa bye bimenyekane yifashisha ikoranabuhanga haba imbuga nkoranyambaga, gutanga amatangazo mu isoko ndetse n’abo aha ibicuruzwa bye bakagenda babwira abandi.

Yagaye abasuzugura akazi ako ari ko kose, avuga ko umuntu ashobora no guhera ku mafaranga 1000 akaba yagera ku bintu bifatika. Abumva bakitinya Uwizeyimana abagira inama ko bakwiye kwegera abihangiye umurimo bakabagira inama y’uburyo babyaza umusaruro amafaranga bafite.

Mu mbogamizi avuga ko bahura nazo, ngo ni uko batarabona amazi ku buryo buhagije, ibindi ngo byarakemutse.

Umwanditsi:

Uwimana Donatha

One Comment on “Ruhango: Uwizeyimana yahereye ku bihumbi 10 none afite uruganda”

Tanga Igitekerezo

Email yanyu ntigaragazwa ku rubuga. Amazina na Email ni ngombwa.