17°C , Thunderstorms | Kigali-Rwanda

Ruhango: Itorero ryo ku mudugudu ryazanye impinduka zigaragara

Yanditswe na Uwimana Donatha

Ku ya 21-09-2019 saa 17:49:08
Mbere yo gusura ibikorwa by'itorero ryo ku mudugudu abayobozi batandukanye babanje kugirana ibiganiro

Mu gikorwa cyo gusuzuma imikorere y’itorero ryo ku mudugudu mu Karere ka Ruhango mu Ntara y’Amajyepfo, hagaragajwe ko iri torero ryazanye impinduka nyinshi zigaragara.

Itorero ry’Umudugudu ni urubuga buri wese utuye mu Mudugudu atorezwamo kuba Umunyarwanda ukunda Igihugu; ukunda umurimo; ufite indangagaciro na kirazira by’umuco nyarwanda kandi ufite umuco w’ubutore. Itorero ry’Umudugudu rikaba rigizwe n’ingamba y’Intore n’isibo y’Intore.

Isibo y’Intore ni itsinda ry’Intore rigizwe n’Ingo hagati ya 15 na 20. Na ho Ingamba y’intore ni itsinda ry’abatuye Umudugudu riremwa hashingiwe ku byiciro by’imyaka y’abarigize. Abagize ingamba baba bahuje ikiciro kimwe k’imyaka y’ubukure. Akaba ari itsinda shingiro ry’Itorero ry’Umudugudu.

Mu nama yahuje Komite Mpuzabikorwa y’Itorero ku rwego rw’Akarere, abakurikirana ibikorwa by’Itorero mu Mirenge n’abari abayobozi b’icyanya cy’urugerero rw’Akarere ruciye ingando rwabereye mu Byimana mu kwa 5 n’ukwa 6/2019 na bo bayitabiriye hasuzumiwe hamwe ibyagezweho n’itorero.

Iyi nama yanitabiriwe n’Intumwa za Komisiyo y’Igihugu y’Itorero (NIC) ziri mu gikorwa cyo gusuzuma imikorere y’Itorero ry’Umudugudu, izi ntumwa zikaba zari ziyobowe na Komiseri Umuraza Landrada.

Komiseri Umuraza yagaragaje ko uru rugendo rugamije kureba niba koko Itorero rizana impinduka ritegerejweho. Ati “Icyo tugambiriye ni ukureba impinduka mu mibereho y’abaturage, tureba niba koko hari umusemburo w’impinduka itorero rizana mu mibereho y’abaturage”.

Komiseri Landrada Umuraza yagaragaje ko bari kugenzura niba koko Itorero rizana impinduka ritegerejweho

Nyuma y’iyo nama hakaba harasuwe ibikorwa by’itorero ryo mu mudugudu wa Rwingwe, uri mu kagari ka Murama mu murenge wa Bweramana.

Bimwe mu byagezweho muri iryo torero harimo ko bibumbiye mu bimina bibafasha kwizigamira, bakabasha kwishyura mituweri, mu isibo harimo abantu bafite ubwiherero budasakaye barabafashije barabusakara.

Mu isibo y’Ubunyarwanda ryo muri iryo torero batangije igikorwa cyo kuremerana aho batanze inka bakayoroza umwe muri bo utaragiraga itungo.

Umukozi w’Akarere ka Ruhango uhuza ibikorwa by’itorero n’ubukangurambaga rusange Mukaburanga Florida, mu kiganiro n’Imvaho Nshya, avuga ko abagize itorero ry’umudugudu bahura rimwe mu kwezi, bakareba umuntu ukeneye ikintu bakamuteranyiriza bakakimuha. Abatwarasibo bavuga ibibazo biri mu mudugudu wabo, bakagena n’uburyo bizakemurwa.

 

Aba bagize itorero ry’umugudugu basuwe, bamurikiye ubuyobozi imihanda baharuye, amavomo bakoze, ab’inararibonye bamurika imiryango yari ibanye mu makimbirane bunze, ab’indahangarwa berekana imirimo bakoze kuko bafite ingufu.

Yagize ati: “Ikintu cyadushimishije ni uko bazi ibibazo bihari kandi bakaba barateguye uburyo bazagenda babikemura ikibazo ku kibazo. Impinduka z’ibyo bakoze ziragaraga ku buryo bazajyanayo n’abandi bakiri inyuma bakajya kuhasura. Abagize iryo torero hari ibikorwa bakoze umunyamabanga nshwingwabikorwa w’akagari atari azi. Muri rusange bageze ku rwego bazi ibibazo byabo bakabishakira ibisubizo, ibibazo bikeneye ubuvugizi akaba ari byo bageza kuri Gitifu w’Akagari”.

Yavuze ko bitaragera ahifuzwa neza kuko hari imidugudu iba iri imbere cyane ariko hari n’indi ikiri inyuma aho izafashwa hagategurwa urugendoshuri iyi midugudu ikajya gusura indi yateye intambwe bakabaha ubuhamya bw’uburyo bakora kugira ngo bigende neza.

Abari mu itorero bishimira ko ribafasha kuko baba bibonye mu rungano rwabo, kuko bibafasha kuganira ku bintu byinshi bigiye bitandukanye.

Mu karere ka Ruhango habarizwa amasibo 4421, ayo masibo ari mu ngo 83792, aya masibo arimo ingamba, aho buri sibo ririmo ingamba 6 ni ukuvuga ko habarizwa ingamba 26 514.

Umwanditsi:

Uwimana Donatha

Tanga Igitekerezo

Email yanyu ntigaragazwa ku rubuga. Amazina na Email ni ngombwa.