20°C , Mostly cloudy | Kigali-Rwanda

Rubavu: Ingo mbonezamikurire zitabirwa n’abana basaga 23,000

Yanditswe na Imvaho Nshya

Ku ya 22-04-2021 saa 15:39:58
Mbere yo gutaha, abana babanza kugaburirwa indyo yuzuye ku ishuri

Ababyeyi basogongeye ku kamaro k’Ingo Mbonezamikurire y’abana bato (ECDs) mu Karere ka Rubavu, barashimira Leta y’u Rwanda n’abafatanyabikorwa bayo bashyizeho iyo gahunda igira uruhare rukomeye mu gutegura Igihugu cy’ejo hazaza binyuze mu kubaka abana bashyitse mu mikurire y’igihagararo n’iy’ubwenge.

Izi ngo mbonezamikurire kugeza ubu zitabirwa n’abana basaga ibihumbi 23 mu Karere ka Rubavu. Mu gukurikirana imikorere yazo n’uruhare zigira mu iterambere ry’Igihugu, Imvaho Nshya yasuye rumwe muri izo ngo mbonezamikurire ruherereye mu Mudugudu wa Gabiro, Akagari ka Buhaza, Umurenge wa Rubavu.

Ni ahagana saa yine n’igice mugitondo, bamwe mu babyeyi barerera muri urwo Rugo Mbonezamikurire y’Abana Bato rwa Rubavu/ECD-Rubavu (ADEPE), bategereje abana babo ngo babatahane nyuma yo gusoza amasomo y’umunsi.

Abaje kare mbere y’uko abana basoza kwiga no kugaburirwa ifunguro bafata mbere yo gutaha, berekwa aho baba bategerereje mu gihe abo bana bahugiye mu gukurikirana umurava amasomo, indirimo, n’ubundi bumenyi abarimu babigisha.

Abana basoza kwiga bagahita bashyikirizwa ifunguro rigizwe n’indyo yuzuye igizwe n’ibitera imbaraga (ibirayi, akawunga,…), ibyubaka umubiri (ibishyimbo, isambaza, indagara, inyama…), n’ibirinda indwara (imboga n’imbuto).

Indyo yuzuye yiyongera ku mata cyangwa igikoma kigizwe n’intungamubiri bahabwa mu masaha ya mugitondo, byose bakaba babihabwa hakurikijwe ingengabihe y’icyumweru.

Mukandayisenga Gentille uyobora ECD-Rubavu (ADEPE) irererwamo abana barenga 80, yatangarije Imvaho Nshya abaharererwa babonera hamwe serivisi zinyuranye zirimo iz’imirire, ubuzima buzira umuze, isuku n’isukura, gukangura ubwonko bwabo no kubategura kwiga amashuri abanza mu mutekano ukwiye.

Mukandayisenga Gentille yarurira ibyo kurya abana biga mu muri ECD RUBAVU ADEPE

Yavuze ko abo bana akenshi usanga bava mu miryango yo mu cyiciro cya mbere n’icya kabiri cy’ubudehe, babona serivisi zose umwana uri munsi y’imyaka itandatu akeneye kugira ngo atagwa mu igwingira n’ibindi bibazo bituruka ku mirire mibi.

Yagize ati: “Kwita ku mwana hakiri kare bimurinda kugwingira, kandi kuvura ingaruka mbi ku mwana utaritaweho kare birahenda. Hari n’ubwo bidashoboka kuko nyuma y’imyaka ibiri kugwingira mu gihagararo n’imitekerereze ntibivurwa, ari na yo mpamvu dukorana n’Inzego z’ibanze mu gukurikirana n’ababyeyi bagitwite bakajya baza gufatira hano amasomo abafasha kwiyitaho.”

Ababyeyi barerera muri ECD-Rubavu (ADEPE) bashimangira ko urwo rugo rwabunganiye mu guha abana babo uburere n’ubumenyi bijyana no kubarinda igwingira n’izindi ndwara zishamikiye ku mirire mibi.

Umwe muri bo yagize ati: “Umwana wanjye iyo ageze mu rugo usanga adusubiriramo ibintu byinshi yize, mbese ukabona ko yamenye byinshi ku buryo bitazamugora ageze mu mashuri abanza. Ikindi imikurire yabo ubona imeze neza cyane, ntiwayigereranya n’iy’abandi bana ababyeyi basiga mu ngo bagiye gupagasa.”

Muri rusange, abagiranye ikiganiro n’Imvaho Nshya bose bemeza ko bamaze kubona umusaruro w’Urugo Mbonezamikurire (ECD-Kibirizi) bubakiwe mu mwaka wa 2019.

Umuyobozi w’Akarere ka Rubavu Habyarimana Gilbert, na we yashimangiye ko ibyiciro byose by’ingo mbonezamikurire y’abana bato mu Karere ka Rubavu byagize uruhare rukomeye mu kuzamura imibereho myiza y’abana bari munsi y’imyaka itandatu.

Yagize ati: “Mu Karere kacu ka Rubavu dufite Ingo Mbonezamikurire y’Abana Bato twagabanya mu byiciro bitatu: ingo z’icyitegererezo (ECD Centers) 7, ingo mbonezamikurire zo mu ngo (Home Based ECDs) 478 ndetse n’ingo mbonezamikurire 167 zishamikiye ku bigo by’amashuri (School Based ECDs).”

Abana bagenda bakora imyitozo ikangura ubwonko bijyanye n’ikigero cy’imyaka bagezemo

Yavuze ko umusaruro wihariye muri aka Karere wigaragarije by’umwihariko ku mpinduka zagaragaye mu kwita ku bana basigwaga ku mupaka n’ababyeyi babo mu gihe babaga bari mu bikorwa by’ubucuruzi bwambukiranya imipaka.

Abandi bana bungukiye mu mikorere y’izi ngo mbonezamikurire harimo abasigaraga mu ngo nta gikurikirana mu gihe ababyeyi babo bagiye mu mirimo ya buri munsi.

Meya Habyarimana yakomeje agira ati: “Ibi byatumye hazamurwa ibipimo by’imibereho myiza y’abana bato, kuko hagabanyutse ingano y’abana bafite ibibazo by’imirire mibi n’igwingira. Izi ngo mbonezamikurire kandi zikomeje gufasha abana bacu kubona ubumenyi bw’ibanze haba ku isuku ndetse n’uburere buboneye.”

Serivisi z’imbonezamikurire zitangirwa mu muryango no mu ngo mbonezamikurire y’abana bato zaba izo mu ngo, mu bigo by’abishyize hamwe, mu bigo by’amashuri n’ahandi hose abarera abana bahisemo inyubako zibafasha kwita ku mikurire myiza y’abana.

Uretse ingo mbonezamikurire zishingiye ku miryango no ku bigo by’amashuri, ingo Mbonezamikurire y’Abana Bato (ECD) zishyirwa ku rwego rw’umudugudu zigakurikiranwa n’imiryango yatoranyijwe ngo na zo zitanga umusaruro ushimishije cyane.

Ababyeyi mu midugudu bashobora kwishyira hamwe, mu matsinda y’ingo ziri hagati ya 10 na 15 bakagena urugo abana babo bari munsi y’imyaka itandatu bajya bahuriramo, maze bakajya ibihe byo kwita kuri abo bana.

Ubuyobozi bw’Akarere ka Rubavu burashimira abafatanyabikorwa ba Leta y’u Rwanda batandukanye, by’umwihariko Banki y’Isi yabinyujije mu mushinga SPRP ugamije kurwanya igwingira mu bana bato igatera inkunga ibikorwa by’ingo mbonezamikurire mu buryo butandukanye.

Minisiteri y’Ubuzima ivuga ko gahunda y’ingo mbonezamikurire y’abana bato ari imwe mu zashyizwemo ingufu mu kwihutisha urugamba rwo kurandura burundu ikibazo cy’igwingira ry’abana bari munsi y’imyaka itandatu, kuri ubu kikiri ku rugero rwa 33%.

Leta y’u Rwanda irasaba inzego zose uhereye ku bayobozi, abikorera, abanyamadini n’abandi bafatanyabikorwa, kurushaho kugira uruhare mu rugamba rukomatanyije rwo guhangana n’igwingira ry’abana bato kandi ngo ubufatanye ni umuti urambye kuri iki kibazo.

Kugaburira umwana indyo yuzuye bimufasha mu mikurire nk’uko bishimangirwa n’ubuyobozi bwa ECD Rubavu ADEPE

Abana bagira igihe yo kwidagadura igihe bari ku ishuri

Abana biga mu muri ECD Rubavu ADEPE bagaragaza umwihariko mu mikurire y’ubwenge n’Igihagraro

Umwarimu aba abari hafi akurikirana uko bakora imyitozo yabahaye

Ababyeyi barerera muri ECD Rubavu ADEPE bemeza ko babona impinduka zitangaje ku mikurire y’abana babo

Uru rugo mbonezamikurire rufite umurima w’igikoni wagutse utanga imboga zigaburirwa abana

Ku mwana utameze neza, hari ahabugenewe aza kuruhukira, yaba agaragaje ikimenyetso cy’uburwayi bagahamagara ababyeyi bakaza kumutwara

Ku ishuri, uhinjiye abanza gukaraba intoki n’amazi meza n’isabune

 

ECD Rubavu ADEPE yigamo abana barenga 80

Umwanditsi:

Imvaho Nshya

Tanga Igitekerezo

Email yanyu ntigaragazwa ku rubuga. Amazina na Email ni ngombwa.