Rhenanie Palatinat n’u Rwanda basubiyemo amasezerano y’ubufatanye

Yanditswe na Mugisha Benigne

Ku ya 05-04-2019 saa 14:03:55
Minisitiri w'Ubutegetsi bw'Igihugu, Prof Shyaka Anastase na Minisitiri w'Ubutegetsi wa Rhenanie Palatinat, Rogers Lewentz

Intara ya Rhenanie Palatinat n’u Rwanda basubiyemo amasezerano y’ubufatanye yari asanzweho mu rwego rwo kuyagura, ubufatanye bukaba buri mu byiciro 13.

Nk’uko byasobanuwe na Minisitiri w’Ubutegetsi bw’Igihugu, Prof. Shyaka Anastase mu muhango wo kwakira Minisitiri w’Ubutegetsi w’Intara ya Rhenanie Palatinat n’intumwa ayoboye, avuga ko mu kwagura amasezerano y’ubufatanye hanazamuwe ireme bwari buriho kuko ngo ubusanzwe iyi ntara yafatanyaga n’u Rwanda mu tuntu duto biturutse ku baturage bafasha abandi, ariko imikoranire igiye kwaguka.

Ati “Ubusanzwe Intara ya Rhenanie Palatinat yafatanyaga n’u Rwanda mu tuntu duto twari twubakiye ku baturage b’ibihugu byombi ariko ubu amasezerano twabashije kuyagura mu cyumweru gishize, twahisemo ibyiciro 13 bizashyirwa mu bikorwa n’inzego zinyuranye.”

Minisitiri w’Ubutegetsi bw’Igihugu avuga ko ubufatanye buri mu nzego z’uburezi, inzego z’ibanze mu bijyanye n’imiyoborere myiza, ibidukikije, ubuzima, ubuhinzi n’ubworozi, iterambere ry’icyaro n’ibindi.

Avuga ko ubu bufatanye buzafasha kuzamura iterambere ry’abaturge mu byiciro 13, aho avuga ko ubufatanye bwishimiwe ku mpande zombi bukazashyirwa mu bikorwa ku bufatanye bw’inzego.

Yavuze ko izi ntumwa za Rhenanie Palatinat ziri mu ruzinduko mu Rwanda zigera ku 10 zamaze kugera mu Rwanda hakaba n’abandi babiri bategerejwe , akaba ari no mu rwego rwo kwifatanya n’u Rwanda kwibuka Jenoside yakorewe Abatutsi ku nshuro ya 25.

Ati “Iri tsinda ryaje kwifatanya na twe kwibuka rije rirangajwe imbere na Perezida w’Inteko Ishinga Amategeko ya Rhenanie Palatinat na Minisitiri w’Ubutegetsi bw’Igihugu wakiriwe muri Minisiteri y’Ubutegetsi bw’Igihugu.”

Avuga ko ibi byose bigaragaza umubano wagutse kandi ukomeye u Rwanda rufitanye n’Intara ya Rhenanie Palatinat yo mu Budage.

Avuga ko ubusanzwe bafasha u Rwanda mu bijyanye n’ubumenyi bw’imyuga, ubunararibonye, ibikoresho by’imyuga mu mashuri makuru y’imyuga, ariko ngo iyo mishinga yari myinshi n’ubwo bwose yari mito.

Minitiri w’Ubutegetsi mu Ntara ya Rhenanie Palatinat Loger Lewentz avuga ko amaze iminsi mu Rwanda mu rwego rwo kuvugurura amasezerano y’ubufatanye bari bafitanye n’u Rwanda, bakazakomereza mu kwifatanya n’u Rwanda mu kwibuka Jenoside yakorewe Abatutsi.

Avuga ko mu bufatanye bafitanye harimo n’urwego rw’abikorera, bakora ibicuruzwa byo mu Rwanda bikunzwe cyane n’abaturage b’igihugu cy’u Budage, aho atanga urugero rw’icyayi cy’u Rwanda na kawa.

Ati “Mu byo tuzafatanya n’u Rwanda bikubiye mu masezerano twakoranye mu minsi ishize harimo n’Urwego rw’abikorera, ibyo bigaragaza ko hari ibyo u Rwanda rukora bikunzwe n’abaturage b’igihugu cyacu cy’u Budage, nk’ikawa y’u Rwanda, icyayi n’ibindi.”

Minisitiri w’Ubutegetsi bw’Igihugu, Prof Shyaka Anastase na Minisitiri w’Ubutegetsi wa Rhenanie Palatinat, Rogers Lewentz

Umubano w’Intara ya Rhenanie Palatinat n’u Rwanda umaze imyaka 37, bakaba basanzwe bafatanya mu bijyanye n’uburezi mu mashuri n’uburezi bw’imyuga.

Umwanditsi:

Mugisha Benigne

Tanga Igitekerezo

Email yanyu ntigaragazwa ku rubuga. Amazina na Email ni ngombwa.