Rayon Sports yasinye amasezerano y’ ubufatanye na La Palisse Hotel

Yanditswe na Bugingo Fidèle

Ku ya 25-09-2019 saa 19:00:23
Perezida wa Rayon Sports (hagati), Munyakazi na Visi Perezida Twagirayezu (ibumoso) n'umuyobozi ushinzwe ibikorwa muri La Palisse Hotel, Uwimana (ibuyo) nyuma yo gusinya amasezerano y'ubufatanye

Ikipe ya Rayon Sports na Hoteli La Palisse basinye amasezerano y’ubufatanye mu gihe cy’umwaka umwe aho abakinnyi ba Rayon Sports bazajya bahakorera umwiherero iminsi ibiri mbere y’umukino.

Aya masezerano yashyizweho umukono tariki 25 Nzeri 2019 hagati y’ubuyobozi bwa Rayon Sorts bwari buhagarariwe Perezida wa Rayon Sports, Munyakazi na Visi Perezida, Twagirayezu Thadée ndetse n’umuyobozi ushinzwe ibikorwa muri La Palisse Hotel, Uwimana Derrick.

Perezida w’ikipe ya Rayon Sports, Munyakazi yatangaje ko muri aya masezerano bagiranye na La Palisse Hotel harimo ko abakinnyi bazajya bahakorera umwiherero iminsi ibiri mbere y’umukino aho bazajya bahabwa ibyumba ku buntu, ubundi ibindi bakenera bakagabanyirizwa 30%.

Si abakinnyi gusa kuko n’abakunzi b’ikipe ya Rayon Sports bafite ikarita «MK Card» isanzwe ikoreshwa ku bijyanye no kugura ibikomoka kuri peterori na bo bazajya bagabanyirizwa 30% mu byo bafashe naho abifuza gukora siporo bagabanyirizwe 50%.

Perezida wa Rayon Sports, Munyakazi akaba anashishikariza abakunzi ba Rayon Sports kugana La Palisse Hotel aho anemeza ko byatangiranye na Nyandungu ariko ko mu minsi iri imbere bizanakomereza i Nyamata na Gashora.

Uwimana Derrick, umuyobozi ushinzwe ibikorwa muri La Palisse Hotel yatangaje ko bishimiye gufatanya na Rayon Sports. Yakomeje avuga ko ibi bizatuma abakunzi b’iyi kipe bakoresha iriya karita «MK Card» kugira ngo na bo babone ibyo bageneye abo mu muryango mugari wa Rayon Sports.

Uyu muyobozi yagize ati: «Rayon Sports ifite abakunzi benshi kandi tuzabungukamo byinshi kuko iyo ufite abantu uba ufite byose.»

Rayon Sports yanagiranye ubufatanye na CCMU

Ubuyobozi bw’ikipe ya Rayon Sports bwanasinye amasezerano na kampani yitwa «CCMU » izajya ikora ibijyanye no kwamamaza ibikorwa n’imishinga ya Rayon Sports.

Perezida wa Rayon Sports, Munyakazi Sadati yavuze ko muri iyi minsi ikipe irimo kunguka abafatanyabikorwa benshi akaba avuga ko bifuje kuzafatanya n’aba bantu ngo bazage babimenyekanisha.

Yakomeje avuga ko aba bazafasha mu kuzamura umutungo w’ikipe binyuze mu bafatanyabikorwa kugira ngo ikipe ikomeze kubaho.

Ukuriye CCMU, Mugabo Valentin yavuze ko hari imishinga myinshi Rayon Sports ifite ariko ko hari imwe idatanga umusaruro uko bikwiye akaba avuga ko bo icyo bazakora ari ukuyimenyekanisha mu bakunzi b’iyi kipe kandi ko bafite abantu basanzwe bafite uburambe mu kumenyekanisha ibikorwa.

Gakumba yateguriye ibirori ikipe ya Rayon Sports

Gakumba Patrick usanzwe akora akazi ko gushakira abatoza n’abakinnyi amakipe akaba nawe yaragize uruhare mu guhuza Rayon Sports na La Palisse Hotel yatangaje ko tariki 29 Nzeri 2019 yateguye ibirori byo kwakira ikipe ya Rayon Sports aho azababagira ikimasa nk’uko yari yarabyemeye ubwo yavugaga ko iyi kipe nitwara igikombe cya shampiyona ya 2018-2019 azabikora.

Ibi birori bizabera muri La Palisse Hotel Nyandungu, ikipe ikazitabira ibi birori ivuye i Ngoma aho iri mu mwiherero yitegura umukino wa “Sur Cup 2019” izakina na AS Kigali tariki 01 Ukwakira 2019 ndetse n’umukino ufungura shampiyona izakina na Gasogi United tariki 05 Ukwakira 2019.

Umwanditsi:

Bugingo Fidèle

Tanga Igitekerezo

Email yanyu ntigaragazwa ku rubuga. Amazina na Email ni ngombwa.