Kigali-Rwanda

Mostly cloudy
21°C
 

Rayon Sports yashyikirijwe igikombe cya shampiyona   yegukanye ku nshuro ya  9

Yanditswe na BUGINGO FIDELE

Ku ya Jun 1, 2019

Rayon Sports 3-0 Marines FC

Mukura 1-1 Gicumbi FC

Espoir FC 0-0 AS Muhanga

Sunrise FC 0-0 Etincelles FC

Police FC 0-2 APR FC

Amagaju FC 2-1 AS Kigali

Bugesera FC 3-2 Kirehe FC

Musanze FC 1-0 Kiyovu

Tariki ya 01 Kamena 2019 ni bwo  habaye imikino y’umunsi wa 30 ari nawo wa nyuma wa shampiyona y’ikiciro cya mbere ya 2018-2019  mu bagabo. Ikipe ya Rayon Sports yegukanye iki gikombe nyuma yo gutsinda umukino w’umunsi wa 29 yashyikirijwe igikombe yegukanye ku nshuro 9.

Ubwo shampiyona yasozwaga, ikipe ya Rayon Sports yatsinze Marines FC ibitego 3-0 byatsinzwe na Manishimwe Djabel, Mugisha Gilbert ndetse na Ulimwengu Jules.

Ikipe ya Rayon Sports yasoje imikino ya shampiyona n’amanota 72  aho yari imaze imikino 19 idatsindwa. Iyi kipe nyuma y’umukino w’umunsi wa 30 wabereye kuri Sitade Amahoro i Remera yashyikirijwe igikombe cya shampiyona ya 2018-2019 kikaba ari icya 9 yegukanye mu mateka yayo (1975, 1981, 1997, 1998, 2002, 2004, 2013, 2017 na 2019).

Abakinnyi b’ikipe ya Rayon Sports ubwo bari bamaze gushyikirizwa igikombe cya shampiyona ya 2018-2019 (Foto: Gisubizo G.)

Rayon Sports yaherukaga igikombe cya shampiyona muri 2017 ubwo yatozagwa na Masudi Djuma.

Nyuma yo kwegukana igikombe cya shampiyona ya 2018-2019, Rayon Sports izahagararira u Rwanda mikino y’Afurika y’amakipe yatwaye ibikombe iwayo “CAF Champions League 2019-2020”, imikino izatangira muri Kanama 2019.

Mu gihe Rayon Sports yegukanye igikombe cya shampiyona, ikipe y’Amagaju FC yari imaze imyaka 9 mu kiciro cya mbere ndetse na Kirehe FC yari imazemo imyaka 3 zasubiye mu kiciro cya kabiri.

Ikipe y’Amagaju FC yasoje itsinda AS Kigali ibitego 2-1 naho Kirehe FC itsindwa na Bugesera FC ibitego 3-2.

Indi mikino ya shampiyona yabaye

Mu yindi mikino isoza shampiyona yabaye,  Mukura  yanganyije igitego 1-1 na Gicumbi FC, Espoir FC  inganya na AS Muhanga 0-0,  Sunrise FC  inganya na Etincelles FC 0-0, APR FC itsinda Police FC ibitego 2-0 naho Musanze FC  itsinda Kiyovu igitego 1-0.

Uko amakipe akurikiranye

Rayon Sports yasoje ari iya mbere n’amanota 72, ikurikirwa na APR FC n’amanota 65, Mukura (60), Police FC (50), Kiyovu (43), Espoir FC (40), AS Kigali (39), Etincelles  FC (37), AS Muhanga (36), Musanze FC (36),  Marines FC(35), Bugesera FC (35), Sunrise FC (34), Gicumbi FC (31), Kirehe FC (27) naho Amagaju FC (21).

Abatsinze ibitego byinshi

Muri iyi shampiyona y’ikiciro cya  mbere ya 2018-2019,  rutahizamu wa Rayon Sports, Ulimwengu Jules ni we watsinze ibitego byinshi (20) aho akurikiwe na Michael Sarpong nawe ukinira Rayon Sports akaba afite ibitego 16, ku mwanya wa 3 haza Hakizimana Muhadjiri  ukinira APR FC ufite 15 naho ku mwanya wa 4 hari Bizimana Yannick ukinira AS Muhanga watsinze ibitego 14.

Mu mafoto Rayon Sports ishyikirizwa igikombe

Igikombe cya shampiyona ya 2018-2019 cyahawe Rayon Sports (Foto: Ntare J.)

Abakinnyi ba Marines FC bakoze imirongo ibiri kugira ngo Rayon Sports itambuke mu rwego rwo kubaha icyubahiro nk’ikipe yegukanye igikombe (Foto: Ntare J.)

Imidari, igikombe ndetse na sheki ya miriyoni 25 byahawe ikipe ya Rayon Sports (Foto: Gisubizo G.)

Abakinnyi ba Rayon Sports bamaze kwambikwa imidari (Foto: Gisubizo G.)

Kapiteni wa Rayon Sports, Manzi Thierry ashyikirizwa sheki ya miriyoni 25 (Foto: Gisubizo G.)

Perezida wa FERWAFA, Sekamana ashyikiriza kapiteni wa Rayon Sports igikombe cya shampiyona ya 2018-2019 (Foto: Gisubizo G.)

Byari ibyishimo ku bakinnyi ba Rayon Sports (Foto: Gisubizo G.)

Abakinnyi bose ba Rayon Sports ndetse n’abatoza bishimira igikombe (Foto: Gisubizo G.)

Abafana ba Rayon Sports bari bitabiriye ari benshi (Foto: Gisubizo G.)