22°C , Partly cloudy | Kigali-Rwanda

Rayon Sports yasezereye LLB mu mikino  y’ Afurika

Yanditswe na BIZIMANA ERIC

Ku ya Feb 22, 2018

LLB 0-1 Rayon Sports (1-2)

Ikipe ya Rayon Sports yitwaye neza ejo hashize tariki 21 Gashyantare 2018, isezerera ikipe ya LLB y’i Burundi mu majonjora  y’imikino y’Afurika  mu makipe yabaye aya mbere iwayo “Total CAF Champions League 2018” .

Ikipe ya Rayon Sports yitwaye neza itsindira LLB iwayo ihita ikomeza mu kiciro gikurikiraho mu mikino y’Afurika

Iyi kipe yatsindiye LLB iwayo igitego 1-0 mu mukino wo kwishyura bituma ihita ikomeza mu kiciro gikurikiraho ku nsinzi y’ibitego 2-1 kuko umukino ubanza wari wabereye mu Rwanda, LLB yari yanganyije na Rayon Sports igitego 1-1.

Igitego cya Rayon Sports cyatsinzwe na Shaban Hussein Tchabalala ku munota wa 28 w’umukino ari nako umukino waje kurangira. Uyu rutahizamu utamaze igihe kinini muri Rayon Sports dore ko yayigezemo muri Mutarama 2018 ni nawe wari watsinze igitego cyo kwishyura ku mukino ubanza.

Uyu mukino, Umutoza Karekezi Olivier, yashakaga gusatira nyuma yo kunganya na LLB igitego 1-1 i Kigali.

Bijyanye n’umusaruro amaze iminsi agaragaza, Ismaila Diarra yashyizwe hanze maze Hussein Tchabalala ahabwa inshingano zo kuza gusatira nka rutahizamu wo hagati.

Kwizera Pierrot umurundi wubashywe mu gihugu ke yari yahawe inshingano zo kugirwa kapiteni muri uyu mukino.

Mu gice cya mbere, LLB ni yo yatangiye yerekana ko ishobora kwinjiza ibitego ku buryo bwabonywe na Jules Ulimwengu na Ndizeye Thompson babanje kugora cyane ba myugariro ba Rayon Sports. Nyuma ariko Rayon Sports yinjiye mu mukino ibona igitego iniharira umupira ishaka ibindi bitego.

Mu gice cya kabiri, Karekezi Olivier yahisemo kwinjiza Ismaila Diarra asimbuye Manishimwe Djabel, Muhire Kevin aha umwanya Bimenyimana Caleb naho Mukunzi Yannick yinjiramo asimbuye Nahimana Shassir. Mbere y’uko umukino urangira, LLB yokeje  igitutu Rayon Sports ariko umunyezamu Ndayishimiye Eric Bakame na ba myugariro be bagerageza kwihagararaho kugeza umukino urangiye.

Rayon Sports ikaba  izahura na  Mamelodi Sundowns  yo muri Afurika y’Epfo aho umukino ubanza uzabera mu Rwanda hagati ya tariki 06-07 Werurwe 2018 naho uwo kwishyura ube  tariki ya 16-18 Werurwe 2018.