19°C , Partly cloudy | Kigali-Rwanda

Rayon Sports yakomereje umwiherero i Kigali yitegura umukino wa AS Kigali

Yanditswe na Bugingo Fidèle

Ku ya 30-09-2019 saa 06:26:56
Abakinnyi ba Rayon Sports ubwo bari bavuye mu karere ka Ngoma aho bari bamaze iminsi 10 mu myitozo

Tariki 01-10-2019
Rayon-AS Kigali (Amahoro-15h00)

Kuri uyu wa Kabiri tariki 01 Ukwakira 2019, ikipe ya Rayon Sports yegukanye shampiyona iheruka ya 2018-2019 izakina na AS Kigali yegukanye igikombe cy’Amahoro 2019 mu mukino w’igikombe kiruta ibindi “Super Cup 2019”.

Ikipe ya Rayon Sports yari imaze iminsi 10 ikorera imyitozo mu karere ka Ngoma yagarutse i Kigali tariki 28 Nzeri 2019 aho bakinnyi bakomeje umwiherero aho bari muri La Palisse Hotel Nyandungu yasinye amasezerano y’u Bufatanye n’iyi kipe.

Ku ruhande rw’ikipe ya AS Kigali tariki 28 Nzeri 2019 yari i Kampala muri Uganda aho yakinaga n’ikipe ya Proline FC mu mukino wo kwishyura mu mikino y’Afurika y’amakipe yitwaye neza iwayo “Total CAF Confederation Cup 2019-2020” ikaba yarasezerewe ku bitego 3-2.

Uyu mukino wa “Super Cup 2019” biteganyijwe ko uzabera kuri Sitade Amahoro i Remera (15h00).

Rayon Sports na AS Kigali zaherukaga guhurira kuri uyu mukino muri 2013 aho AS Kigali yegukanye igikombe itsinze Rayon Sports igitego 1-0. Rayon Sports iheruka kwegukana igikombe muri 2017 ubwo yatsindaga APR FC ibitego 2-0.

Igikombe giheruka muri 2018, APR FC ni yo yakegukanye itsinze ikipe ya Mukura ibitego 2-0, umukino wabereye kuri Sitade ya Rubavu.

Ikipe yegukanye igikombe kiruta ibindi ihabwa miriyoni 5 z’amafaranga y’u Rwanda.

Nyuma y’uyu mukino aya amakipe agomba no kwitegura shampiyona ya 2019-2020 aho ikipe ya AS Kigali ari yo izakina umukino ufungura tariki 04 Ukwakira 2019 ihura na APR FC.Umukino ukazabera kuri Sitade ya Kigali i Nyamirambo.

Ku rundi ruhande, ikipe ya Rayon Sports izaba ifite umukino ukomeye aho izakina na Gasogi United yazamutse mu kiciro cya mbere uyu mwaka tariki 05 Ukwakira 2019, umukino ukaba uzabera kuri Sitade Amahoro i Remera.

Umwanditsi:

Bugingo Fidèle

Tanga Igitekerezo

Email yanyu ntigaragazwa ku rubuga. Amazina na Email ni ngombwa.