20°C , Partly cloudy | Kigali-Rwanda

Rayon Sports nyuma yo gutsinda AS Kigali irakira Police FC

Yanditswe na BUGINGO FIDELE

Ku ya 02-06-2018 saa 07:27:06
Irambona Eric (iburyo) ubwo yari amaze gutsinda igitego cyahesheje amanota 3 Rayon Sports imbere ya Police FC mu mukino uheruka wa shampiyona

Rayon Sports-Police FC (Nyamirambo-15h30)

Miroplast FC-Mukura (Mironko-15h30)

Ejo tariki 03-6-2018

Etincelles FC-Marines FC (Rubavu-15h30)

Uyu munsi  tariki 02 Kamena 2018, shampiyona y’ikiciro cya mbere  irakomeza hakinwa imikino y’ibirarane. Ikipe ya Rayon Sports yegukanye igikombe cya shampiyona umwaka ushize wa 2017 irakira Police FC, Miroplast FC yakire Mukura naho ejo tariki 03a Kamena 2018, Etincelles FC izakire Marines FC.

Irambona Eric (iburyo) ubwo yari amaze gutsinda igitego cyahesheje amanota 3 Rayon Sports imbere ya Police FC mu mukino uheruka wa shampiyona

Ikipe ya Rayon Sports  nyuma yo gutsinda AS Kigali igitego 1-0 mu mukino w’ikirarane uheruka,  irakira  Police FC nayo imaze iminsi yitwara neza  gusa ikaba imaze hafi imyaka 3 itabasha gutsinda Rayon Sports.

Mu mukino ubanza wa shampiyona, Rayon Sports yatsinze Police FC igitego 1-0 cyatsinzwe na Irambona Gisa Eric wari winjiye mu kibuga asimbura.

N’ubwo Police FC  yatangiye umwaka w’imikino  wa 2017-2018 ititwara neza byanaviriyemo kwirukana umutoza Seninga, ubu imaze iminsi yitwara neza kuko imaze gutsinda imikino 4 yikurikiranya ya shampiyona iri kumwe n’umutoza mushya ukomoka muri Zambia, Albert Mphande.

Kuva muri 2010 izi kipe zimaze gukina imikino 17 ya shampiyona, Rayon Sports yatsinze imikino 6, Police FC itsinda 4 naho 7 izi kipe ziranganya. Mu mikino 5 iheruka ntabwo Police FC irabasha gutsinda Rayon Sports kuko  zanganyije imikino 2 indi 3 Rayon Sports ikayitsinda.

Kuri uyu mukino w’uyu munsi, Police FC irakina idafite  bamwe mu bakinnyi bayo igenderaho barimo Nzarora Marcel usanzwe ari umunyezamu wa mbere, Mico Justin na Ndayishimiye Celestin bafite imvune.

Ku ruhande rwa Rayon Sports Usengimana Faustin wagize ikibazo k’imvune ku mukino wa AS Kigali, Nova Bayama, Yaccin Mugume na Ismaila Diarra ntabwo baza kugaragara muri uyu mukino .

Indi mikino iteganyijwe

Uretse uyu mukino wa Rayon Sports na Police FC w’umunsi wa 20 utarakiniwe igihe, uyu munsi tariki 02 Kamena 2018, haraba undi mukino w’umunsi wa 22  na wo utarakiniwe igihe  uhuza ikipe ya Miroplast FC  na Mukura.

Izi kipe zombi ntabwo zimerewe  neza kuko umukino uheruka ikipe Miroplast FC yatewe mpaga na Rayon Sports kuko abakinnyi banze kuza ku kibuga kubera  ibirarane by’imishahara iyi kipe ibabereyemo ndetse ikaba iri no ku mwanya wa nyuma ku rutonde rwa shampiyona.

Ku ruhande rwa Mukura na yo imaze iminsi ititwara neza kuko yatsinzwe imikino 2 ya shampiyona iheruka mu rugo bituma ijya mu makipe ashobora  kumanuka mu kiciro cya kabiri.

Ejo tariki 03 Kamena 2018, imikino izakomeza hakinwa umukino w’umunsi wa 21 nawo utarabereye igihe aho  Etincelles FC  izakira  Marines FC  kuri Sitade Umuganda i Rubavu. Izi kipe zikaba zikunze guhangana cyane kuko zisangiye umugi. Gusa Etincelles FC ni yo ihagaze neza kuko iri ku mwanya wa 6 n’amanota 38 naho Marines FC iri ku mwanya wa 13 n’amanota 24.

Kugeza ubu APR  FC irayoboye n’amanota 50 ikurikiwe na AS Kigali n’amanota 48  na Rayon Sports n’amanota 43 naho Miroplast FC iri ku mwanya wa nyuma wa 16 n’amanota 17.

 

 

 

Umwanditsi:

BUGINGO FIDELE

Tanga Igitekerezo

Email yanyu ntigaragazwa ku rubuga. Amazina na Email ni ngombwa.