Kigali-Rwanda

Mostly cloudy
26°C
 

Rayon Sports na AS Kigali  zamenye amakipe zizahura nayo mu mikino y’Afurika

Yanditswe na BUGINGO FIDELE

Ku ya Jul 21, 2019

Ikipe ya Rayon Sports yegukanye shampiyona  ya 2018-2019  ndetse na AS Kigali yegukanye igikombe cy’Amahoro 2019 ni zo zizaserukira u Rwanda mu mikino y’Afurika ya 2019-2020 izatangira mu kwezi gutaha kwa Kanama 2019.

Rayon Sports izahura na Al Hilal yo muri Sudani

Ikipe ya Rayon Sports izaserukira u Rwanda mu mikino y’Afurika y’amakipe   yabaye aya mbere iwayo “Total CAF Champions League 2019-2020”. Iyi kipe mu ijonjora rya mbere izahura na Al Hilal yo muri Sudani.

Umukino ubanza uzabera i Kigali tariki 09,10 cyangwa 11 Kanama 2019 naho umukino wo kwishyura ubere muri Sudani  hagati y’itariki ya 23,24 na 25 Kanama 2019.

Ikipe izakomeza hagati ya Rayon Sports na Al Hilal izahura n’izaba yakomeje hagati ya Enyimba FC yo muri Nigeria na Rahimo FC yo muri Burkina Fasso. Hanyuma izabasha gutsinda muri iki kiciro cya kabiri ihite ijya mu matsinda naho iyatsinzwe ikomeze  mu mikino y’amakipe yitwaye neza iwayo “Total CAF Confederation Cup 2019-2020” aho ikina ikiciroo cya gatatu kibanziriza kujya mu matsinda.

Iyi kipe ya Al Hilal si ubwa mbere igiye guhura na Rayon Sports kuko mu 1994, Rayon Sports  yayisereye mu mikino y’Afurika ku bitego 4-2 gusa Rayon Sports ntabwo yakinnye ikiciro gikurikiraho kubera Jenoside yakorewe Abatutsi mu 1994.

Umwaka ushize wa 2018, Al Hilal yageze muri ¼ mu mikino y’Afurika  aho yari yageze mu matsinda izezereye Mukura yo mu Rwanda ku bitego 3-1. Ikipe ya Rayon Sports  ubwo iheruka mu mikino y’Afurika muri 2018 yagarukiye muri ¼.

AS Kigali izatangira ikina na KMC yo muri Tanzania

Ikipe ya AS Kigali yaherukaga kwitabira imikino y’Afurika  muri 2014 muri uyu mwaka izaserukira u Rwanda mu mikino y’Afurika y’amakipe yitwaye neza iwayo “Total CAF Confederation Cup 2019-2020”.

Iyi kipe mu ijonjora rya mbere izakina n’ikipe ya KMC yo muri Tanzania. Umukino ubanza uzabera i Kigali hagati y’itariki ya 09, 10 na 11 Kanama 2019 naho uwo kwishyura ubere muri Tanzania hagati y’itariki ya 23,24 na 25 Kanama 2019.

Ikipe izakomeza hagati ya AS Kigali na KMC  mu kiciro cya kabiri izahura n’izakomeza hagati ya Proline FC yo muri Uganda  na  Masters Security Services FC yo muri Malawi.

Urutonde rw’abakinnyi amakipe y’u Rwanda azifashisha

Rayon Sports: Kimenyi Yves, Iragire Saidi, Rutanga Eric, Rugwiro Herve, Nshimiyimana Amran, Runanira Hamza, Ulimwengu Jules Nizeyimana Mirafa, Mohamed N’Diaye, Mugabo Ciza Hussein, Commodor Olokwei, Mugisha Gilbert, Irakoze Saidi, Iradukunda Eric, Nyandwi Saddam, Irambona Eric, Sarpong Michael, Habimana Hussein, Iranzi Jean Claude, Bikorimana Gerrard, Bizimana Yannick, Sekamana Maxime, Ndizeye Samuel, Niyomwungeri Mike, Mugheni Fabrice, Oumar Sidibe, na Mazimpaka Andre.

AS Kigali: Shamiru Batte, Ndayishimiye Eric, Hategekimana Bonheur, Bishira Latif, Muryango Mussa, Nshimiyimana Marc Govin, Rurangwa Mossi, Rusheshangoga Michel, Songayingabo Shaffy, Ishimwe Christian, Ahoyikuye Jean Paul, Niyonzima Haruna, Ntamuhanga Tumaini, Benedata Janvier, Nsabimana Eric, Kalisa Rashid, Nova Bayama, Cyitegetse Bogarde, Allogomba Rick Martel, Fosso Fabrice Raymond, Ssentongo Seif Farouk, Nshimiyimana Ibrahim, Ekandjoum Essombe Aristide Patrick na Makon Nlonga Thierry.

 

Ikipe ya Rayon Sports igiye kongera guhura na Al Hilal mu mikino y’Afurika nyuma y’imyaka 25

 

Bamwe mu bakinnyi ikipe ya AS Kigali izifashishamu mikino y’Afurika