Rayon Sports  irashaka kongera gukorera amateka hanze

Yanditswe na BIZIMANA ERIC

Ku ya 21-02-2018 saa 07:08:57

Uyu munsi

LLB-Rayon Sports (Bujumbura-15h30)

Kwizera Pierrot wahawe inshingano zo kuyobora begenzi be kugira ngo babashe gutsinda LLB

Ikipe ya Rayon Sports yaraye isesekaye mu gihugu cy’u Burundi aho ifite umukino wo kwishyura uyihuza na LLB mu irushanwa ry’amakipe yabaye aya mbere iwayo “Total CAF Champions League 2018” .

 

Rayon Sports yahagurutse i Kanombe ejo hashize ku wa Kabiri saa kumi z’umugoroba (16h00) ikora urugendo rw’iminota 20 mu ndege ihagurukana abakinnyi 18 baza kuyifasha kwitwara neza imbere ya  LLB bari banganyije 1-1 mu mukino ubanza  wabereye mu Rwanda i Kigali.

Iyi kipe Rayon Sports yahisemo guha inshingano Kwizera Pierrot zo kuba kapiteni muri uyu mukino mu rwego rwo kumuhesha icyubahiro iwabo inabikora nk’ikintu babona cyatuma bitwara neza nk’uko bivugwa na Ndayishimiye Eric “Bakame”, usanzwe ari kapiteni w’iyi kipe.

Bakame yavuze ko bashaka kongera gukora amateka nk’ayakozwe na bakuru babo bitwaye neza hanze batwara CECAFA y’amakipe mu 1998 bayikuye hanze.

Mbere yo kuva mu Rwanda Bakame yagize ati “Ntitugiye gutembera i Burundi, umugambi ni umwe  ni ugutsinda. Kuva kera nk’uko natwe tubizi Rayon Sports ni ikipe ijya ikora ibintu byiza hanze y’igihugu, kuri ngewe nta kibazo nk’abakinnyi, twizeye insinzi, ku buryo abakunzi bacu bazaza ku kibuga k’indege kutwakira’’.

Rayon Sports iraza gukina umupira usatira nk’uko bisobanurwa na Lomami Marcel, ushinzwe imyitozo ngororamubiri, wagize ati“Baratwiteguye ariko natwe turabiteguye, twe dufite igitutu cyo gushaka ibitego, turaza gusatira  kugeza tubonye insinzi nta byo kunganya dushaka, icyo dukeneye  ni insinzi’’.

Ku rundi ruhande, itangazamakuru ryo mu Burundi ryagarutse ku magambo ya Bankuwiha Emmanuel utoza ikipe ya LLB wavuze ko ibyananiye Rayon Sports i Kigali itaza kubishoborera i Bujumbura.

Amakipe yombi yanakoze ibishoboka byose kugira ngo ashyirireho abakinnyi bayo agashimwe. Nka Rayon Sports biravugwa ko yamaze kwemerera buri mukinnyi ibihumbi 460 by’amafaranga y’u Rwanda nibasezerera LLB. Ni nako Abarundi bazamuye igiciro cyo kwinjira kuri Sitade Louis Rwagasore aho kwinjira mu cyubahiro ari amafaranga y’u Rwanda 49,500 ahatwikiriye na 1500 ahasigaye hose. Indundi.com ivuga ko aya mafaranga yazamuwe kugira ngo hazaboneke agahimbazamusyi kazahabwa abakinnyi ba LLB nibabasha gusezerera Rayon Sports.

Ikipe izakomeza hagati y’izi kipe zombi izahura na Mamelodi Sundowns yo muri Afurika y’Epfo yegukanye iki gikombe muri 2016.

Abakinnyi 18 Rayon Sports  iza kwifashisha

Abanyezamu: Ndayishimiye Eric Bakame na Ndayisenga Kassim.

Myugariro: Manzi Thierry, Usengimana Faustin, Mugabo Gabriel, Rutanga Eric, Mutsinzi Ange, Irambona Eric  na Nyandwi Sadam.

Hagati: Kwizera Pierrot, Niyonzima Olivier Sefu, Mukunzi Yannick, Manishimwe Djabel na Bimenyimana Bonfils Caleb.

Rutahizamu: Ismaila Diarra, Shabani Hussein Tchabalala, Nahimana Shassir na Muhire Kevin.

 

Umwanditsi:

BIZIMANA ERIC

Tanga Igitekerezo

Email yanyu ntigaragazwa ku rubuga. Amazina na Email ni ngombwa.