Kigali-Rwanda

Partly sunny
21°C
 

Rayon Sports irakina na Enyimba mu mukino ubanza  wa ¼ mu mikino y’Afurika

Yanditswe na BUGINGO FIDELE

Ku ya 16-09-2018 saa 07:21:18
Abayobozi batandukanye ba Rayon Sports ubwo bari kumwe n'abakinnyi nyuma y'imyitozo ya nyuma mbere yo guhura na Enyimba FC

Uyu munsi

Rayon Sports-Enyimba (Nyamirambo-15h00)

Uyu munsi tariki 16 Nzeri 2018, ikipe ya Rayon Sports irakina na Enyimba FC yo muri Nigeria mu mukino ubanza wa ¼ mu mikino y’Afurika  y’amakipe yitwaye neza iwayo “Total CAF Confederation Cup 2018”.

Abayobozi batandukanye ba Rayon Sports ubwo bari kumwe n’abakinnyi nyuma y’imyitozo ya nyuma mbere yo guhura na Enyimba FC

Uyu mukino urabera  kuri Sitade ya Kigali i Nyamirambo saa kenda (15h00). Ikipe ya Rayon Sports   yari imaze iminsi yitegura uyu mukino yageze muri iki kiciro  nyuma yo kwitwara neza mu mikino yo mu matsinda aho yazamutse ari iya kabiri   mu itsinda D aho yari iri kumwe na USM Alger yo muri Algeria, Gor Mahia (Kenya) na Yanga (Tanzania).

Yaba abakinnyi ndetse n’umutoza wa Rayon Sports, Roberto Oliveira Goncalves do Carmo   bavuga ko biteguye gukomeza gukora amateka bakitwara neza imbere ya Enyimba FC  isanzwe ari ikipe ikomeye muri Afurika.

Uretse Mukunzi Yannick ndetse na Manzi Thierry abandi bakinnyi bose bameze neza. Iyi kipe kandi iraba yagaruye Ndayisenga Cassim, umunyezamu wa kabiri  ndetse na Christ Mbondi bari bahawe ibihano na CAF ndetse na Niyonzima Olivier Sefu wari wasibye umukino uheruka kubera amakarita abiri y’umuhondo.

Ikipe ya Enyimba  yageze mu Rwanda  tariki  14 Nzeri 2016, ejo tariki 15 Nzeri 2018 ikorera imyitozo  kuri Sitade ya Kigali i Nyamirambo ahaza kubera umukino. Umutoza w’iyi kipe Usman Abdallah akaba atangaza ko intego yabo ari ukwitwara neza bagakomeza muri ½ .

Iyi kipe irakina umukino w’uyu munsi idafite kapiteni wayo, Mfon Udoh ndetse  Mohammed Farouk wahagaritswe umukino umwe nyuma yo kubona amakarita  abiri y’umuhondo.

Ikipe ya Rayon Sports mu mikino y’Afurika 4 yakiniye kuri iyi Sitade ya Kigali i Nyamirambo, ibiri yarayihatsindiye  aho yatsinze Costa do Sol ibitego 3-0 na Yanga igitego 1-0. Yahanganyirije umukino umwe wa Gor Mahia igitego 1-1 ihatsindirwa umukino umwe na USM Alger, ibitego 2-1.

Umukino ubanza wa ¼ hagati ya Rayon Sports urasifurwa n’abasifuzi  bakomoka muri Algeria bayobowe na  Mustapha Ghorbal   akaza kuba yungirijwe na Abdelhak Etchiali   na Mokrane Gourari.

Nk’uko tubikesha ubuyobozi bw’ikipe ya Rayon Sports, kwinjira kuri uyu mukino ni  ibihumbi 30 mu myanya y’icyubahiro, ibihumbi 5 ahatwikiriye n’ibihumbi 3 ahasigaye hose.

Nyuma y’uyu mukino ubanza, Rayon Sports igomba kujya gukina na Enyimba FC muri Nigeria, umukino uzaba tariki 23 Nzeri 2018. Ikipe izabasha gukomeza izahura n’izakomeza hagati  CARA Brazzaville yo muri Congo Brazzaville  na       Raja Casablanca yo muri Maroc.

 

Umwanditsi:

BUGINGO FIDELE

Tanga Igitekerezo

Email yanyu ntigaragazwa ku rubuga. Amazina na Email ni ngombwa.