Kigali-Rwanda

Partly cloudy
19°C
 

Rally: Carl Tundo yiyongereye amahirwe yo kwegukana shampiyona y’Afurika 2021

Yanditswe na BUGINGO FIDELE

Ku ya 23-10-2021 saa 20:20:00
Imodoka ya Carl Tundo ubwo yari iri mu isiganwa i Gako

Kuri uyu wa Gatandatu taliki 23 Ukwakira 2021 ni bwo hakinwe umunsi wa mbere w’isiganwa  mu muhanda  muri Rwanda Mountain Gorilla Rally 2021, isiganwa  ritanga amanota ku mukinnyi uzegukana shampiyona y’Afurika ya 2021 “FIA African Rally Championship 2021”.

Carl Tundo wo muri Kenya ubu uyoboye urutonde rw’Afurika  n’amanota 90 ni we ufite amahirwe menshi yo kwegukana iri siganwa   nyuma y’umunsi wa mbere aho mu duce 6  tureshya na kilometero 76.2 twakiniwe i Gako mu Karere ka Bugesera  amaze gukoresha iminota 35 n’amasegonda 31.

Ku mwanya wa kabiri hari Patel Karan (Kenya) akaba amaze gukoresha iminota 35 n’amasegonda 46. Ku mwanya wa 3 hari Kimathi McRae (Kenya) umaze gukoresha iminota 40 n’amasegonda 38 naho ku mwanya wa 4 hari Gakwaya Jean Claude (Rwanda) umaze gukoresha iminota 44 n’amasegonda 56.

Uyu munsi wa mbere, imodoka zagombaga  gusiganwa uduce 8 ariko agace ka  7 n’aka 8 twakiniwe ku Ruhuha  nta bwo twabazwe kuko  abantu babaye benshi hafi y’umuhanda bituma abakinnyi badakina uko bikwiye.

Mu modoka 15 zatangiye isiganwa ubu hasigayemo 10 aho 5 zavuyemo kubera impanuka. Izi zirimo iya Guy Botterill wo muri Afurika y’Epfo ufite amanota 73 ku rutonde rw’Afurika. Giancarlo Davite ukinira u Rwanda  wari mu bahabwa amahirwe yo kwegukana isiganwa ry’uyu mwaka na we yavuyemo hamwe na  Nshimiyimana Adolphe (Rwanda), Mayaka Felekeni (Rwanda) na Anwar Hamza (Kenya).

Imodoka ya Giancarlo Davite yavuye mu isiganwa
Guy Botterill wo muri Afurika y’Epfo wari uri ku mwanya wa 3 muri Afurika na we yavuye mu isiganwa

Kuri iki Cyumweru taliki 24 Ukwakira 2021 ni bwo hasozwa Rwanda Mountain Gorilla Rally 2021 hakinwa uduce 4. Hari umuhanda wa  Kamabuye (27.07 km), abasiganwa bawunyuramo inshuro 2 ndetse n’umuhanda wa Gako (8.4 km) na wo banyuramo inshuro 2 bagasoza bakoze intera ya kilometero 70,94.

Abakinnyi 10 basigaye mu isiganwa n’imodoka batwaye

Rwanda : Gakwaya Jean Claude & Mugabo Jean Claude (Subaru Impreza N11), Jean Jean Giesen & Kevin Mujiji (Toyota Celica),  Elefterios Mitraros & Paganin Paolo (Subaru Impreza N10), Kanangire N. Christian & Karingirwa Regis (Subaru Impreza GC8).

Kenya: Carl Tundo & Jessop Timothy (VW Polo), Wahome Maxime & Ayuko Linet (Subaru impreza N10), Kimathi McRAE & Kioni Mwangi (Ford Fiesta) na Patel Karan & Khan Tauseef (Ford Fiesta).

Uganda : Nasser Yasin & Ali Katumba (Subaru Impreza GVB).

Burundi: Din Imtiaz & Alain Rukundo (Subaru Impreza N12).

Umwanditsi:

BUGINGO FIDELE

Tanga Igitekerezo

Email yanyu ntigaragazwa ku rubuga. Amazina na Email ni ngombwa.