Kigali-Rwanda

Partly cloudy
19°C
 

Rally: Carl Tundo ni we wegukanye shampiyona y’Afurika 2021

Yanditswe na BUGINGO FIDELE

Ku ya 24-10-2021 saa 21:35:00
Carl Tundo na Jessop Timothy begukanye Rwanda Mountain Gorilla Rally 2021

RGMR 2021 (147.14 km)

1. Carl Tundo 01h29’42″

2. Patel  Karan 01h29’57″

3. Kimathi  McRae 01h40’17″

4. Gakwaya Jean Claude 01h50’40″

Kuri iki Cyumweru taliki 24 Ukwakira 2021 ni bwo hasojwe isiganwa rya «Rwanda Mountain Gorilla Rally 2021» ryari irya gatanu ku ngengabihe y’amarushanwa y’Afurika muri uyu mwaka wa 2021.

 Carl Tundo wo muri Kenya  ni we wegukanye iri siganwa ndetse anahita yegukana shampiyona y’Afurika 2021  “FIA African Rally Championship 2021”.

Iri siganwa ryari ryitabiriwe n’imodoka 15 hagasoza 10, abakinnyi  basiganwe uduce 10 tureshya twose hamwe na kilometero 147,14. Carl Tundo  ukomoka muri Kenya wakinishije imodoka ya « VW Polo  R5» ni we wegukanye Rwanda Mountain Gorilla Rally 2021 aho yakoresheje isaha 1, iminota 29 n’amasegonda 42.

Ku mwanya wa kabiri yakurikiwe na Patel  Karan (Kenya)  wakinishije “Ford Fiesta R5” wakoresheje isaha 1, iminota 29 n’amasegonda 57. Ku mwanya wa 3 haje  Kimathi McRae (Kenya) wakinishije “Ford Fiesta” akoresha isaha 1, iminota 40 n’amasegonda 17.

Ku mwanya wa 4 haza  Gakwaya Claude ufatanya na Mugabo Jean Claude bakomoka mu Rwanda, bakinishije imodoka ya « Subaru Impreza N11 »  bakaba bakoresheje isaha 1, iminota 50 n’amasegonda 40.

Ikipe yitabiriye iri siganwa igizwe n’abagore, Wahome Maxime na Ayuko Linet (Kenya) yasoreje ku mwanya wa 6 naho Nasser Yasin  na  Ali Katumba bari ku mwanya wa 3 ku rutonde rw’Afurika baje ku mwanya wa 7.

 Nyuma yo kwegukana «Rwanda Mountain Gorilla Rally 2021», Carl “Flash” Tundo ufite imyaka 48 y’amavuko akaba yaratangiye gusiganwa muri 2002 yahise anegukana shampiyona y’Afurika “FIA African Rally Championship 2021” mu gihe hagisigaye isiganwa ryo muri Afurika y’Epfo rizaba   taliki 26 na 27 Ugushyingo 2021 gusa rikaba nta cyo ryahindura.

Carl Tundo yahise agira amanota 120, ku mwanya wa kabiri haza Guy Botterill wo muri Afurika y’Epfo ufite amanota 73 akaba atarabashije gusoza  iri siganwa ryo mu Rwanda. Ku mwanya wa 3 hari Nasser Yasin (Uganda) n’amanota 56 naho ku mwanya wa kane hari Patel  Karan (Kenya) n’amanota 48.

Manvir Baryan (Kenya) ni we wari ufite shampiyona y’Afurika kuva 2017 kugeza 2019. Umwaka ushinze wa 2020 nta bwo yabaye kubera COVID-19.

Carl “Flash” Tundo yatangaje ko yishimiye kwegukana iri siganwa ryabereye mu Rwanda. Yakomeje avuga ko bagize ibihe byiza ndetse ko n’isiganwa ryari ryiza muri rusange.

Carl Tundo

Umunyamabanga w’ishyirahamwe ry’umukino wo gusiganwa mu modoka mu Rwanda “RAC”, Cyatangabo Ange François yatangaje ko bishimiye uko iri siganwa ryagenze bakurikije igihe  cyari gishize hataba isiganwa kubera COVID-19.

Yakomeje avuga ko imbogamizi bafite ubu ari ikibazo cy’imihanda itangiye kuba mike. Ati : « Gako ni ho twari dusigaranye ariko hatangiye guturwa kandi dusabwa gukorera  ahadatuwe.»

Cyatangabo avuga ko bakomeje kuganira n’inzego zibafasha mu gutegura kandi barizera ko bazabona ibisubizo  vuba.

Umunyamabanga waRAC, Cyatangabo Ange François

Indi mbogamizi  bagize, Cyatangabo avuga ko kubera COVID-19 batabonye abaterankunga bahagije ariko ababonetse babafashije kandi babashimira.

Abafashije RAC mu gutegura «Rwanda Mountain Gorilla Rally 2021» barimo  Minisiteri ya Siporo mu Rwanda “MINISPORTS”, Polisi y’Igihugu, Akarere ka Bugesera, Kigali Arena, SP, Prime Insurance, RwandAir, ABG, cfao, Printex, esri Rwanda, Akagera Aviation, Onomo Hotel, Fastnet na Dynamic Business Group.

Umwanditsi:

BUGINGO FIDELE

Tanga Igitekerezo

Email yanyu ntigaragazwa ku rubuga. Amazina na Email ni ngombwa.