Queen Cha na Arstide batandukanye na The Mane Music Label

Yanditswe na GISUBIZO Gentil M.

Ku ya 19-04-2021 saa 13:04:30
Queen Cha na Aristide Gahunzire wari umujyanama w’abahanzi batandukanye na The Mane Music Label

Umuhanzikazi Mugemana Yvonne wamamaye nka Queen Cha na Aristide Gahunzire wari umujyanama w’abahanzi muri The Mane Music Label basezeye muri iyi nzu ifasha abahanzi.

Gahunzire ni we wabanje gushyira hanze itangazo agaragaza ko ari icyemezo yafashe ku mpamvu ze bwite ndetse ashimira ubuyobozi bwa The Mane muri rusange n’abandi bayibamo.

Yagize ati: “Natangira nshimira ikipe yose igize The Mane irimo abahanzi, uko bampaye ikaze ku munsi wa mbere nzamo nk’ushinzwe gukurikirana ibikorwa bya The Mane. Mbashimiye uburyo mworoheje akazi kanjye […] byari ibyishimo kuba umwe mu bagize itsinda rya The Mane mu mwaka umwe n’igice wari ushize. N’agahinda kenshi mboneyeho kubamenyesha ko ngiye gutandukana na The Mane Music Label guhera kuri uyu wa 19 Mata 2021, ku bw’impamvu zanjye bwite”.

Gahunzire yinjiye muri The Mane Music Label muri Nzeri 2019. Yaje abisikana na Rwema Denis wari usanzwe akurikirana ibikorwa bya The Mane, akaza kugirana ubwumvikane buke na Bad Rama wayishinze biturutse ku bwumvikane buke.

Nyuma gato y’itangazo ry’uyu wahoze ari umujyanama w’abahanzi, Queen Cha wari umaze imyaka itatu muri The Mane na we yashyize hanze ibaruwa yandikiye The Mane avuga ko ahagaritse amasezerano ye n’iyi nzu.

Iyi baruwa ifite umutwe ugira uti “Guhagarika amasezerano yo kureberera inyungu umuhanzi”. Yatangiye ashimira The Mane uburyo yamufashije mu guteza imbere umuziki we mu myaka itatu yari amazemo. Avuga ko ari umuhamya wo gukora cyane kw’iyi nzu ifasha abahanzi, ikagera ku cyo yiyemeje.

Ariko agiye gusoza yagize ati “Bitewe n’impamvu zitunguranye, mbabajwe no kubamenyesha ko amasezerano yanjye na The Mane asheshwe guhera kuri uyu wa 19 Mata 2021”. The Mane yashinzwe mu 2017 na Mupenda Ramadhan cyangwa se Bad Rama ubu isigayemo abahanzi Marina na Calvin Mbanda.

Umwanditsi:

GISUBIZO Gentil M.

Tanga Igitekerezo

Email yanyu ntigaragazwa ku rubuga. Amazina na Email ni ngombwa.