21°C , Partly cloudy | Kigali-Rwanda

Petrovic arakoresha imyitozo nk’umutoza mushya wa APR FC

Yanditswe na BIZIMANA ERIC

Ku ya 02-03-2018 saa 08:29:50
Petrovic ugarutse muri APR FC nyuma yo kuyivamo adasezeye

Nyuma yo kugera mu Rwanda ejo hashize tariki 01 Werurwe 2018, Dr Ljubomir “Ljupko” Petrović bidahindutse agomba gutangira akazi ke kuri uyu wa Gatanu tariki 02 Werurwe 2018.

Petrovic ugarutse muri APR FC nyuma yo kuyivamo adasezeye

Ibi byemejwe n’umwe mu bayobozi  ba APR FC  wavuze ko Dr Ljubomir yageze mu Rwanda ariko kubera ko yananiwe cyane yahawe igihe cyo kubanza kuruhuka mbere yo kwerekanwa biramutse bidahindutse.

Ljubomir agomba gusimbura Jimmy Mulisa wari usanzwe ari umutoza mukuru, bivugwa ko ashobora kuba umunyamabanga mukuru wa APR FC cyangwa akajya gutoza abana ba APR FC .

Kugeza ubu, Imvaho Nshya yagerageje kuvugana na Kalisa Adolphe, umunyamabanga mukuru wa APR FC, kuri iyi ngingo ariko ntibyakunda.

Dr Lubjomir agarutse nyuma yo kuyibera umutoza mu 2015 akagenda adasezeye abayobozi be bakuru. Uyu mugabo ufite imyaka  70 y’amavuko amaze imyaka 36 atoza, aho anafite ibigwi birimo gutwara igikombe cy’amakipe yabaye aya mbere ku mugabane w’u Burayi “UEFA champions League” muri Red Star Belgrade yo muri seribia mu 1991.

Yanatoje amakipe nka Espanyol yo muri Espagne, Olympiacos yo muri Turikia, Al-Ahli Dubai yo mu bihugu byunze ubumwe bw’Abarabu, Shanghai Shenhua na Beijing Guoan zo mu Bushinwa, Lokomotiva Moscow yo mu Burusiya kuva muri  2017 akaba yatozaga Thanh Hóa yo muri Vietnam.

 

 

Umwanditsi:

BIZIMANA ERIC

Tanga Igitekerezo

Email yanyu ntigaragazwa ku rubuga. Amazina na Email ni ngombwa.