PAC yasabye ko abacunze nabi umutungo wa Leta batarahanwa bahanwa byihuse

Yanditswe na Nshimyumukiza Janvier Popote

Ku ya 20-03-2019 saa 18:23:03
Bamwe mu badepite bagize PAC ubwo baganiraga na MIFOTRA ku gicamunsi cyo kuwa Gatatu tariki 20 Werurwe 2019

Komisiyo y’Inteko Ishinga Amategeko ishinzwe gukurikirana ikoreshwa ry’umutungo wa Leta (PAC), yasabye ko abakozi ba Leta bakoze amakosa mu micungire y’imari bahanwa byihuse.

Minisiteri y’Abakozi ba Leta n’Umurimo (MIFOTRA) ku gicamunsi cyo kuri uyu wa 20 Werurwe 2019, yitabye PAC ibazwa impamvu hari benshi batarahanwa kandi barakosheje.

Ni icyemezo kireba ibigo 36 bya Leta, byagaragaweho n’amakosa y’imicungire y’umutungo muri raporo ebyiri z’umugenzuzi w’imari ya Leta zo mu myaka ya 2014/2015 na 2015/2016.

Ibiro by’Umugenzuzi Mukuru w’Imari ya Leta (OAG: Office of the Auditor-General) byasabye ko ibigo bitashyize mu bikorwa inama byagiriwe ku kigereranyo cya 60% bifatirwa ibihano.

Ngabitsinze Jean Chrisostome uyobora PAC, yibukije MIFOTRA ko yasabwe gukora urutonde rw’ibyo bigo no gukurikirana ko byahannye abakozi bagize uruhare mu makosa yagaragaye.

Ati, “Mwasabwe kwerekana raporo igaragaza ibyo bavugwagaho n’ibyo bashoboye gukemura, dusanga ibyo bigo hafi 12 bitarashoboye gutanga ibisubizo bishimishije, 10 babashije gutanga ibisubizo ariko na byo biri aho”

Yunzemo ati, “Twari dukeneye raporo irambuye y’uburyo icyo kibazo cyakurikiranwe ku nzego zose zavuzwe muri uwo mwanzuro, iyo raporo ntayo twabonye, tukaba dukeneye ibisobanuro birambuye.”

Minisitiri w’Abakozi ba Leta n’Umurimo, Rwanyindo Kayirangwa Fanfan, yabanje gutanga urutonde rw’ibyo bigo, avuga ko byose byandikiwe amabaruwa asaba guhana abakoze amakosa.

Ibigo bitubahirije inama za OAG nibura kuri 60%, yavuzemo Sena, MINAFET, MINEMA, MINIRENA, MINISANTE, MINAGRI, MINISPOC, RDB, REB, RPPA, RSSB, RTDA, uturere twa Musanze, Bugesera, Kamonyi, Ngororero, Gatsibo, Rusizi, Nyarugenge, Nyamagabe na Muhanga.

Asobanura uko ikibazo cyakurikiranwe, Minisitiri Kayirangwa yavuze ko inzego 10 zahanishije abakozi ibihano byo mu rwego rw’akazi, izo zikaba zirimo MINISPOC (abakozi babiri bahanishijwe kwihanangirizwa), RDB (umwe yahagaritswe amezi atatu, undi umwe arihanangirizwa), RTDA (hasheshwe amasezerano y’akazi y’abakozi babiri), Akarere ka Gakenke (umukozi umwe yahawe igihano cyo guharikwa amezi atatu adahembwa), Rwamagana na Rulindo (abakozi batanu bahanishijwe kwihanangirizwa), Kamonyi (batatu bahanishijwe kugawa undi arirukanwa burundu, undi basesa amasezerano ye y’akazi), Rusizi (batatu birukanwe burundu abandi 12 bashyikirijwe inkiko).

Usibye izo nzego zahannye abakozi, Minisitiri Kayirangwa yabwiye Inteko Ishinga Amategeko ko izindi nzego 11 zagaragaje ko zitabona amakosa abakozi bazo bakoze, muri izo hakaba harimo MININFRA, RPPA, Sena, MINAFFET, MINAGRI na MINECOFIN.

Usibye izo nzego, Minisitiri Kayirangwa yavuze ko hari izindi nzego zatanze ibisobanuro ariko ntizagaragaza abakozi bagize uruhare mu bibazo by’imicungire y’imari byagaragaye.

Hari kandi inzego zivuga ko inama zagiriwe n’Umugenzuzi w’Imari ya Leta zazishyize mu bikorwa ku kigereranyo kiri hejuru ya 60%, zikavuga ko zitumva impamvu Umugenzuzi w’Imari ya Leta yazishyize ku rutonde rw’abatarageze kuri icyo kigereranyo. Muri izo harimo REB na MINEMA. Minisitiri yavuze ko uku kudahuza kwazo na OAG bizasuzumwa.

Usibye izo nzego, Minisitiri Kayirangwa yasobanuye ko hari n’izindi nzego zo zivuga ko abakozi bazo batanze ibisobanuro byumvikana ku buryo zasanze nta mpamvu ifatika ihari yo kubahana, izo zikaba zirimo MINISANTE, n’uturere twa Gicumbi na Bugesera.

Hari kandi inzego zavuze ko zatangiye inzira zo gukurikirana abo bakozi, zikaba zirimo Akarere ka Karongi, Rutsiro, Musanze, Ngororero, Nyarugenge, Gasabo, Nyamagabe, Nyabihu na RBC.

Minisitiri w’Abakozi ba Leta n’Umurimo, Madame Kayirangwa Fanfan n’abandi bayobozi bo muri iyo minisiteri, baganira na PAC

PAC yanyuzwe igice

Abadepite bagize PAC bavuze ko MIFOTRA yakoze byinshi nk’uko yabisabwaga n’Umugenzuzi Mukuru w’Imari ya Leta mu gukurikirana ko abakozi bakoze amakosa bahanwa, ariko bongeraho ko bikwiye kwihutishwa kurushaho kuko hari abatarahanwa kandi raporo zagaragajwemo ayo makosa zimaze imyaka myinshi.

Umunyamabanga Uhoraho muri MIFOTRA, Musonera Gaspard, yavuze ko MIFOTRA yifuza ko ibyemezo byafashwe bishyirwa mu bikorwa vuba, ariko ko bisaba igihe kirekire bitewe n’imiterere yabyo.

Ati, “Aka kazi gasaba igihe kinini, gukora igenzura, iyo urwego rutarasubiza ntabwo duceceka, tugenda dukurikirana.”

Ngabitsinze Jean Chrisostome uyobora PAC yagaragaje ko atemeranya na Musonera uvuga ko igihe bahawe cyo gukurikirana iki kibazo ari gito, avuga ko atumva ishingiro ry’ubuto bwacyo.

Ati, “Iyi raporo ni iya kera, byakabaye byarakozwe mu mezi umunani, turavuga raporo ya 2015 ubu turi muri 2019, ibidakozwe mu mezi umunani byakabaye bigaragazwa nk’ibikeneye ikindi gihe.”

Yongeyeho ko bidakwiye ko imyanzuro ya raporo zo mu myaka ine, itanu, ishize iba itarashyirwa mu bikorwa, avuga ko PAC izabiganiraho na Minisitiri w’Intebe bakarebera hamwe ikibazo cy’imyanzuro yambukiranya imyaka.

Ati, “Wenda tuzabiganiraho na Minisitiri w’Intebe, n’ubundi hari umwanzuro yambukiranya imyaka ariko mukwiye kugaragaza icyo mwayikozeho, ariko ndabona mwarakoze byinshi.”

Depite Bakundufite Christine na we yagaragaje ko igihe MIFOTRA yahawe ngo ikurikirane iki kibazo atari gito, ati, “PS (Umunyamabanga Uhoraho wa MIFOTRA) ati bahabwa raporo ariko bagakenera umwanya muremure, ntabwo twumvikana, kumenya icyo umuntu yakoze ntibyatwara umwaka, iyi raporo bayihabwa umwaka urarenga, bahawe amezi umunani, ababahaye amezi umunani ni uko babonaga ahagije, nkavuga nti nk’icyo kigo abantu batarakurikiranwa, hakaba haciye imyaka ibiri igiye kurangira, ni ukuvuga ngo ya makosa bashobora kuyasubiramo kuko batabiryojwe.”

Minisitiri Kayirangwa Fanfan yakomeje kubwirwa n’Abadepite bagize PAC ko guhana abakoze amakosa bagaragajwe muri ziriya raporo bitagakwiye kurenga igihe cy’amezi umunani, avuga ko koko hari intege nke mu buryo iki kibazo cyakurikiranwe, yizeza ko agiye kugihagurukira.

Yagize ati, “Imbogamizi ni uko hashakishwa amakuru, kubanza kumenya abakozi bafitanye isano n’ayo makosa agaragara, akenshi tubona ko inzego zitinda gushaka amakuru, ariko hagomba no kuba uburyo buri coordinated (buhuriweho) bw’inzego zose zirebwa n’icyo kibazo kugira ngo zibashe guhana amakuru mu kwihutisha inzira zo guhana abakozi. Nka MIFOTRA twarushaho gukora follow up (kubikurikirana), tugomba kubashyira on pressure (ku gitutu) kugira ngo babikore vuba.”

Atanga inama z’uburyo ishyirwa mu bikorwa ry’uyu mwanzuro ryakwihutishwa, Depite Izabiriza Marie Mediatrice yasabye ko ibyemezo by’Umugenzuzi Mukuru w’Imari ya Leta byajya bishyirwa muri gahunda z’ingenzi zitekerezwaho mu kigo, nk’uko hakorwa izindi nama zitandukanye z’ubuyobozi buri cyumweru cyangwa nyuma y’igihe runaka, gito.

Ati, “Gushyira mu bikorwa imyanzuro ya OAG usanga inzego zimwe zidakunze kubiha priority (kubigira nyambere), nk’uko mukora gahunda y’umwaka, mugakora management meeting (inama y’ubuyobozi) ya buri cyumweru, mujye muzirikana n’imyanzuro ya OAG, ntitujye tubona imyanzuro imaze imyaka ibiri itarashyirwa mu bikorwa kandi mwarahawe amezi umunani. Ibyo bifasha gutuma akazi kagenda neza, umutungo wa Leta ucungwa neza.”

Minisitiri Kayirangwa yijeje PAC ko abakozi ba Leta batarahanwa kandi barakoze amakosa mu micungire mibi y’umutungo wa Leta agiye kubahagurukira

Ngabitsinze Jean Chrisostome asanga amezi umunani ahagije ngo uwakoze ikosa abe yahanwe, akavuga ko atari ikintu gisaba ubugenzuzi bwimbitse ku buryo cyambukiranya imyaka

Umwanditsi:

Nshimyumukiza Janvier Popote

Tanga Igitekerezo

Email yanyu ntigaragazwa ku rubuga. Amazina na Email ni ngombwa.