19°C , Mostly cloudy | Kigali-Rwanda

PAC ntiyanyuzwe n’ibisobanuro byatanzwe na REB

Yanditswe na Imvaho Nshya

Ku ya 16-09-2020 saa 06:35:12
REB yisobanuye ku mikoreshereze mibi y'imari n'umutungo bya Leta ariko PAC ntiyanyurwa

Ku munsi w’ejo ku wa Kabiri tariki 15 Nzeri 2020, Komisiyo y’Abadepite ishinzwe gukurikirana imikoreshereze y’imari n’umutungo by’Igihugu (PAC), yitabwe n’abayobozi b’Ikigo k’Igihugu gishinzwe guteza imbere Uburezi mu Rwanda (REB) aho yisobanuraga ku ikoreshereze mibi y’imari n’umutungo bya Leta.

Icyo gikorwa cyabaye hifashishijwe ikoranabuhanga, abagize PAC n’abafatanyabikorwa bayo bari mu cyumba k’Inteko Ishinga Amategeko mu gihe abayobozi ba REB bayikurikiranye bari ku kicaro gikuru, kugira ngo hirindwe ikwirakwira ry’icyorezo cya COVID19.

Depite Uwimanimpaye Jeanne d’Arc yavuze ko mu myaka itanu ishize, kuva 2014 kugeza 2019, REB yagiye icunga umutungo wa Leta budahwitse bityo ko imicungire mibi yatumye ibona ikitwa ‘Biragayitse’ muri iyo myaka yose.

Dr Ndayambaje René, Umuyobozi Mukuru wa REB, yagaragaje ko gukurikiza inama z’Umugenzuzi Mukuru w’Imari ya Leta bigoye, ari yo mpamvu babonye amanota ya ‘Biragayitse’ ariko ngo bisaba urugendo.

Yagize ati: “Si ukwanga gushyira mu bikorwa inama tugirwa n’Umugenzuzi Mukuru w’Imari ya Leta ahubwo kuzishyira mu bikorwa 100% biragoye, ni urugendo rusaba abafatanyabikorwa benshi”.

Abagize Komisiyo ya PAC bakomeje guhata ibibazo abayobozi b’inzego n’ibigo bya Leta hifashishijwe ikoranabuhanga

Dr Ndayambaje avuga ko atari amahitamo yabo bahisemo yo kubona “Biragayitse”. Yongeraho kandi ko byaterwaga n’ibibazo bidasanzwe REB yabaga ifite bigatuma inama yahawe n’Umugenzuzi Mukuru w’Imari ya Leta, itubahirizwa.

REB yisobanuye ku kibazo k’imicungire mibi y’itangwa ry’amasoko y’ibitabo. Yabwiye PAC ko amashuri menshi nta masomero agira bityo bagahitamo gushyikiriza ibitabo ikigo, umunyeshuri agatizanya n’undi ariko bigakurikiranwa.

Ibibazo bikomeye by’itangwa ry’amasoko muri REB, ubuyobozi bwayo busobanura ko itangwa ry’amasoko ari agashami kakomeje kugira ibibazo, n’ubu ngo nta muyobozi wako gafite kuva mu 2014.

Dr. Ndayambaje ati: “Hari imyanya yagiye igira ibibazo kubera kutagira abantu bayikoramo”.

Abagize PAC bahise bagaragaza kutanyurwa n’ibisobanuro bwatanzwe n’ubuyobozi bwa REB.

PAC yabajije impamvu imyenda ingana na miriyoni 124 REB imaze imyaka 3 itishyura kandi ntibinagaragare mu bitabo by’ibaruramari.

Umuyobozi Mukuru wa REB, Dr Ndayambaje yasubije ati: “Abo tubereyemo imyenda twarabandikiye, bamwe batubwira ko nta mafaranga tubafitiye, abandi bakatwemerera ko serivisi baduhaye zishyuwe. Hari ibitabo dufite bigaragaza ko dufite imyenda”.

PAC ntiyanyuzwe ariko REB igaragaza ko abenshi mu bakozi bakoze ayo makosa batagikora muri REB.

Ku mafaranga 19.300.000 adafitiwe inyandiko, REB yasobanuye ko byatewe ni inyandiko zitari zibitse neza bigatuma ntaho agaragara mu nyandiko.

Ku rundi ruhande, Umugenzuzi Mukuru w’Imari ya Leta Obadiah Biraro, yagaragaje ko REB ifite ubushake bwo gutera imbere. Akomeza avuga ko mu igenzura yakoze ry’ibitabo, uyu mwaka habayemo kwikebura mu kwandika ibitabo ariko ikibazo gisigaye kiri mu kutubahiriza amategeko.

Umugenzuzi Mukuru w’Imari ya Leta abona REB ikwiye gufashwa mu makosa agaragara mu gutanga amasoko no kubahiriza amategeko, kuko ngo harimo amakosa akomeye, akemeza ko mu 2018-2019 REB yabonye amanota ya ‘byakwihanganirwa’.

Umwanditsi:

Imvaho Nshya

Tanga Igitekerezo

Email yanyu ntigaragazwa ku rubuga. Amazina na Email ni ngombwa.