20°C , Mostly cloudy with showers | Kigali-Rwanda

Odette Nyiramilimo yavuze kuri Rusesabagina wabaye inshuti y’umuryango

Yanditswe na Imvaho Nshya

Ku ya 11-09-2020 saa 09:40:51
Odette Nyramilimo avuga ko atabona Rusesabagina nk'intwari n'ubwo yamufashije kubona ubuhungiro nk'inshuti ye

Ibishyira umuntu mu rwego rwo kuba intwari bikomeza kugibwaho impaka zitandukaye bitewe n’uburyo hari bamwe bigenda bigaragara ko bagendera ku kantu gato karanga ubutwari bugacya bitiriwe kuba zo mu gihe intwari z’ukuri rimwe na rimwe hari ubwo bigorana kuvuga ibigwi byabo.

Hari abantu benshi bagaragaje ubutwari budasanzwe barokora Abatutsi muri Jenoside yakorewe Abatutsi ariko batigeze bavugwa ibigwi mu ruhando mpuzamahanga nka Rusesabagina wabaye icyamamare kubera firimi yakinwe ku nkuru yasizwe umunyu ariko itagaragaza ukuri kwimbitse kw’imyitwarire n’imikorere yamuranze mu gihe cya Jenoside yakorewe Abatutsi.

Mu bantu bamwe bagize ibikorwa by’ubutwari bagaragaza nta kindi bagambiriye harimo nka Capt. Mbaye Diagne wakomokaga muri Senegal, akaba yari umwe mu ngabo zari mu butumwa bw’ amahoro bwa Loni (MINUAR) muri Jenoside wishwe agerageza guhungisha Abatutsi bicwaga.

Hari abandi batandukanye barimo nka Nyakwigendera Zula Karuhimbi watabarutse mu mpera z’umwaka wa 2018,  warokoye Abatutsi basaga 100 yigize umupfumukazi.

Zula Karuhimbi watabaye Abatutsi barenga 100 nta kindi agambiriye, uretse umutima w’ubutwari wamuranze kugeza atabarutse

Ubundi ni ibiki biranga intwari ? Ese haba hari utunyangingo tw’amaraso tuba mu maraso y’abantu b’intwari nyakuri? Ubushakashatsi bwagaragaje ko ubutwari bukunze kwitiranywa no kugira umutima ukomeye (bravery), mu gihe ari kimwe mu byunganira indi myitwarire iranga intwari nyayo mu buzima busanzwe.

Umuntu usanzwe ahobora kugira umutima ukomeye rimwe na rimwe, ariko intwari iwuhorana ibihe byose.

Muri ibi bihe uzasanga n’abakinnyi b’ibyamamare  muri siporo, mu mikino njyarugamba ndetse no mu mafirimi, bitirirwa kuba intwari no mu buzima busanzwe,  bidasobanuye ko ibyo bagaragaza mu mikino yabo ari na byo biranga imico mbonera iranga ubutwari.

Rusesabagina ni umwe mu bantu bagizwe intwari ku nkuru yagaragaye muri firimi yiswe “Hotel Rwanda”, itandukanye n’imico ndetse n’ubuzima bwe bwaranzwe n’ubugwari nk’uko bishimangirwa n’abantu bamuzi ndetse n’abo avuga ko yarokoye mu gihe cya Jenoside yakorewe Abatutsi.

Ubuhamya bwa Odette Nyiramilimo wemeza ko Rusesabagina yari inshuti y’umuryango we mbere no mu gihe cya Jenoside yakorewe Abatutsi, yagaragaje izingiro ry’ubugwari bwashyizwe ahagaragara by’umwihariko no kugirwa icyamamare mu ruhando mpuzamahanga.

Paul Rusesabagina wagizwe icyamamare n’iyo firimi imwerekana nk’uwarokoye Abatutsi 1,268 muri Hotel des Mille Colliness mu gihe cya Jenoside mwaka wa 1994, yazamuye impaka zitandukanye nyuma yo gutabwa muri yombi akurikiranyweho ibikorwa by’ubwicanyi n’iterabwoba yagabye ku Rwanda.

Abenshi mu bo avuga ko yarokoye nta n’umwe umucira akari urutega bitewe n’imyitwarire yabagaragarije igihe bari bihishe muri hoteri abereye umuyobozi.

Rusesabagina yagendeye ku nkuru yamwamamaje ahitamo gushinga ishyaka n’imitwe yitwara gisirikare irwanya Leta y’u Rwanda

Abaharokokeye bavuga uko batabawe n’Ingabo za RPA Inkotanyi kuko n’ubundi byarangiye bahererekanyijwe nk’imbohe z’intambara mu rwego rwo gutabara abajenosideri bari bafashwe n’izo ngabo zabohoye u Rwanda.

Mu kiganiro na The East African, Odette Nyiramilimo nk’umwe mu barokokeye muri Hotel des Mille Colline ari kumwe n’abana ndetse n’umugabo we, yavuze ko adahakana ko Rusesabagina yashyize ubuzima bwe mu kaga kugira ngo atabare ubwe n’ubw’umuryango we.

Ati: “Simpakana ko Rusesabagina yashyize ubuzima bwe mu kaga kugira ngo anshakire ubuhungiro hamwe n’umuryango wange. Twari twihishe mu rugo rwacu i Nyamirambo, nyuma yo kumva izina ryange riri mu yatangajwe nk’abantu bamaze kwicwa. Twahaga ruswa umuporisi buri munsi kugira ngo tugume muri ubwo bwihisho. Rusesabagina wari inshuti y’umuryango wange yarahamagaye kugira ngo yumve ko tukiri bazima.”

“[…] Amaze kumva ko tukiri bazima, yohereje abasirikare bo kudutora bakatugeza muri Hotel Mille Collines. Rwari urugendo rubi cyane, byasabye ko badutwara umwe umwe tukagenda dutanga amafaranga kugira ngo turenge za bariyeri tunabeshya ko turi Abahutu. Byari nk’igitangaza kwibona tugeze muri hoteri.”

Nyuma ya Jenoside yakorewe Abatutsi, umuryango wa Nyiramilimo wakomeje kuba inshuti ya hafi ya Rusesabagina n’umuryango we, kugeza mu mwaka wa 2004 firimi ya Hotel Rwanda imaze gusohoka.

Umubano wabo wahise uzamo agatotsi, ati: “Buri wese hano mu Rwanda yari yishimiye kubona iyo firimi. Navuganye n’Umuyobozi w’iyo firimi Terry George musaba ko yaza kuyitangariza bwa mbere hano mu Rwanda. Yaremeye icyo gihe nasabye na Perezida Paul Kagame kwitabira uwo muhango.”

“[…] Terry yagombaga kuzana na Rusesabagina mu muhango wo kwerekana iyo firimi bwa mbere tariki ya 4 Mata 2004. Ariko icyo gihe nakiriye terefoni ya Rusesabagina ambwira ko atagaruka mu Rwanda. Yambwiye ko Perezida Kagame yategetse ko bamufatira ku kibuga k’indege bakamufunga. Sinashoboraga kubyizera, naratunguwe cyane.”

Nyuma y’iminsi mike ni bwo Nyiramilimo yatahuye ko Rusesabagina yamaze “kugurisha roho ye” mu Bafaransa barwanya ubutegetsi bw’u Rwanda, “bari bamwijeje amafaranga menshi mu gihe yaba yemeye guhindukira akarwanya Leta y’u Rwanda .”

Nyiramilimo yakomeje agira ati: “Yagambaniye umugambi byagaragaraga inyuma ko yizeraga. Ni yo mpamvu yanze no kwitabira umuhango wo kwerekana firimi ya Hotel Rwanda i Kigali.” Rusesabagina we yabwiye itangazamakuru ko yananiwe kwitabira uwo muhango kuko yari arwaye…

Nyiramilimo yavuze ko imyitwarire ya Rusesabagina yahinduwe n’uko yifuje guhabwa umwanya ukomeye muri Guverinoma agasa n’aho yirengagijwe mu gihe we yari yifitiye umugambi wa poritiki yihariye mu mutima we.

Ati: “Nge simufata nk’intwari. Yego yaramfashije n’umuryango wange, ariko ubu ni inyeshyamba yica Abanyarwanda. Yarahindutse…”

Odette Nyiramilimo  kuri ubu ni Umusenateri akaba yarabaye n’Umunyamabanga wa Leta ushinzwe iterambere ry’Umuryango hagati y’umwaka wa 2000 na 2003.

Bamwe mu baturiye Ishyamba rya Nyungwe baracyafite ibikomere batewe n’inyeshyamba za FLN zashinzwe na Rusesabagina

Imyitwarire y’ubugwari yaranze Rusesabagina muri Hoteri

Inkuru yamamajwe na firimi igaragaza Rusesabagina nk’umutabazi w’abahungiye muri hoteri;  abantu babonye ubuhungiro muri Hotel des Mille Collines bavuga ko ayo ari amakabyankuru.

Uretse Nyiramilimo, mu bandi baharokokeye harimo Bernard Makuza uvuga ko Rusesabagina yabatotezaga, cyane cyane abari badafite amafaranga yo kwiyishyurira ibyumba byo kubamo n’ibyo kurya.

Edouard Kayihura na we ni undi mutangabuhamya mu barokokeye muri iyo hoteri wibuka ko akihagera yasanze iyoborwa n’umugabo ukomoka i Burayi wari umugwaneza kuko yasabye abakozi kutagira icyo bishyuza impunzi zose zari zabahungiyeho.

Yibuka ko yabanye n’inshuti ye mu cyumba kimwe, kuko we nta mafaranga yari afite yo kwiyishyurira, bakajya bajyana kurya muri resitora ya hoteri.

Nyuma y’iminsi itanu uwari umuyobozi amaze gufashwa gusubira iwabo i Burayi, ni bwo Rusesabagina yahasesekaye avuye muri Hotel des Diplomates yakoragamo, nk’ishami rya Hotel des Milles Collines.

Rusesabagina ubu ari mu Rwanda akurikiranyweho ibyaha by’iterabwoba n’ubwicanyi bwakorewe Abanyarwanda baturiye Ishyamba rya Nyungwe

Ibintu byahise bihinduka kuva ubwo, Rusesabagina ategeka abakozi kwishyuza buri muntu wese mbere yo gutanga ibyo kurya, ndetse n’aho bararaga buri wese akajya yishyuzwa umwe umwe nubwo abenshi muri bo nta mafaranga bari bafite.

Yakomeje gushyira amananiza ku bahungiye muri hoteri batagiraga amafaranga, ndetse ngo Rusesabagina ubwe yihamagariye Ingabo zari mu Butumwa bwa Loni (MINUAR) azisaba “kuza kumukiza Abatutsi bahungiye muri hoteri.”

Rusesabagina ngo yahise akupa itumanaho ryo mu byumba by’ababa muri hoteri, ndetse abatarabashaga kwishyura bagakurwa mu byumba babagamo, ibintu birakomera impunzi zibura n’amazi yo kunywa zishoka aya pisine(piscine).

Mu bihe bigoye imfungwa z’intambara zari zafashwe na RPA Inkotanyi zatumye na za mpunzi zigirwa imfungwa z’intambara zihererekanywa kugira ngo ba basirikare ba FAR barekurwe.

Kayihura yanditse ubuhamya bw’imibereho banyuzemo muri Jenoside mu gitabo yise “Inside the Hotel Rwanda: The Surprising True Story … and Why It Matters Today” yafatanyije n’Umwanditsi w’Umunyamerika Kerry Zukus.

Ubushinjacyaha bwashyikirijwe dosiye ya Rusesabagina

Umwanditsi:

Imvaho Nshya

Tanga Igitekerezo

Email yanyu ntigaragazwa ku rubuga. Amazina na Email ni ngombwa.