20°C , Mostly cloudy | Kigali-Rwanda

Nyuma yo gutaha amara masa muri Miss Career Africa 2019, Umulisa ahataniye Miss Rwanda 2020

Yanditswe na Gisubizo Gentil M.

Ku ya 27-01-2020 saa 05:13:13
Umulisa Rose Mary arashaka ikamba rya Miss Rwanda 2020 nyuma yo kubura amahirwe muri Miss Career Africa 2019

Umulisa Rose Mary wari uri mu bakobwa 30 bari bahataniye  kwegukana ibihumbi 5.000 by’amadorari muri Miss Career Africa 2019 ariko nta mahirwe, ubu ahanze amaso ku irushanwa rya Miss Rwanda 2020.

Abakobwa 20 bavuye mu Mujyi wa Kigali basanze abandi 34 batoranyirijwe mu ntara enye z’u Rwanda kuva mu Kuboza 2019.

Umulisa Rose Mary wahawe Nomero 31 ni we mukobwa wa nyuma wanyuze imbere y’Akanama Nkemurampaka.

  1. Miss Rwanda 2020: Abahatanira kuba Nyampinga w’u Rwanda bahawe nomero
  2. Miss Rwanda 2020: Bamwe batashye bimyiza imoso, banga kuvugisha itangazamakuru
  3. Impinduka mu irushanwa rya Miss Rwanda 2020

Nyuma y’uko atsindiye itike yo gukomeza muri Miss Rwanda yavuze ko yishimiye kuba yarabashije gukomeza, mu kiciro gikurikira.

Mu kiganiro kihariye yagiranye n’Imvaho Nshya Umulisa yagize ati “Ndishimye kuba ngize amahirwe yo gukomeza mu irushanwa rya Nyampinga w’u Rwanda, ikindi ndabishimira Imana.”

Yavuze ko kimwe mu bintu byatumye atagira umwanya mwiza muri Miss Career Africa ari uko yari afite ubwoba kandi akaba nta bunararibonye bwo kuvugira mu ruhame yari afite.

Ati “Nari nitabiriye Miss Career Africa 2019 ntibyagenda neza ariko ubu ikintu nongeyemo imbaraga ni ukwigirira ikizere no kongera ubushobozi bwo kuvugira mu ruhame. Nagize ubunararibonye kubera Miss Career Africa, byamfashije gusubiza neza uyu munsi”.

Yavuze ko icyo agiye kongeramo imbaraga ari ugukora ubushakashatsi ku mushinga we kugira ngo azabashe kuboneka mu bakobwa 20 bazitabira umwiherero wa Miss Rwanda 2020.

Yavuze ko yasoje amashuri yisumbuye mu ishami ry’Imibare Ubukungu n’Ubumenyi bw’Isi. Yabajijwe ibyiza bya siporo, asubiza ko ‘Irinda indwara’.

Uyu mukobwa afite umushinga wo kurwanya imirire mibi, ateganya kuzajya ategura imigoroba y’ababyeyi. Yahawe ‘Yes’ eshatu na Mutesi Jolly, Dr Higiro Jean Pierre na Umurerwa Evelyne.

Umulisa yaje muri Miss Rwanda 2020 nyuma yaho yari ari mu bakobwa 30 bashakishwagamo Miss Career Africa 2019, yahuriyemo n’abakobwa bo mu RDC, Burundi, Kenya, Tanzania, Sudan, Uganda n’u Rwanda ariko nta bwo yabashije kubona amahirwe yo kugira ikamba na rimwe yegukanamo.

Muri Miss Career Africa, uyu mukobwa w’imyaka 22 yari afite umushinga yise Stand and shine, ugamije kurinda abagore n’abakobwa ingaruka zo gusezerana mbere y’igihe ariko nta bwo yabashije kwegukana ikamba na rimwe cyangwa se kuza mu myanya y’imbere.

Igikorwa cya Miss Rwanda kizasozwa tariki 22 Gashyantare 2020 ari bwo hazamenyekana uzegukana ikamba rya Nyampinga w’u Rwanda 2020 uzasimbura Nimwiza Meghan ufite irya 2019.

Umwanditsi:

Gisubizo Gentil M.

Tanga Igitekerezo

Email yanyu ntigaragazwa ku rubuga. Amazina na Email ni ngombwa.