17°C , Partly cloudy | Kigali-Rwanda

Nyaruguru: Agashya “Terimbere mwana” abaturage bihangiye kabafashije kurwanya igwingira

Yanditswe na TUMUKUNDE GEORGINE

Ku ya 20-04-2021 saa 12:41:35
Umubyeyi Judith yagarutse ku nyungu yabonye muri Terimbere Mwana

Abaturage bo mu Mudugudu wa Nyamyumbya, mu Kagari ka Murambi, Umurenge wa Mata, mu Karere ka Nyaruguru bihangiye agashya bise “ Terimbere Mwana” kabafasha gukurikirana imikurire y’abana binyuze mu irerero, bakabarinda imirire mibi n’igwingira, bakanateganyiriza ejo hazaza habo.

Uretse guhuriza abana mu irerero bagatekerwa indyo yuzuye, bagahabwa inyigisho zo gukangura ubwonko, bafite na gahunda yo kubagurira amatungo hagamijwe gukomeza kurwanya imirire mibi n’igwingira, babazigamira n’ibizabafasha mu mibereho yabo bacutse batangiye amashuri abanza, bikazakomeza no muri kaminuza.

Umubyeyi Judith utuye mu Mudugudu wa Nyamyumba, ni umwe mu baganiriye n’Imvaho Nshya, yagarutse ku cyo yungukiye mu irerero rifite n’agashya ka “Terimbere Mwana”.

Ati: “Nagiyemo ntazi guteka indyo yuzuye ubu narabimenye, mfatanya n’abandi babyeyi gutekera abana bacu kandi n’iwanjye umwana ndabimutekera, namujyanye mu irerero afite ibiro 10 ariko nyuma y’ukwezi kumwe Abajyanama b’ubuzima baje kudupimira abana basanga afite ibiro 12,5. Mbere naramupimishaga nkabona ntiyiyungura ibiro ariko ubu mbona akura neza, afite imyaka itatu n’amezi 5”.

Yongeyeho ati: “Mbere nta tungo nagiraga iwanjye, none ubu ndoroye nahereye ku ngurube ngeze ku nka n’ihene, mbona ifumbire, ndahinga nkeza bikamfasha kubona uko nita no kuri ya ndyo yuzuye, mu minsi mike inka izaba impa amata”.

Dusabimana Claudine na we ati: “…maze kubyara nagize ikibazo, umwana ntiyigera akora ku ibere na rimwe, irerero ryahise riza ndijyamo umwana afite imyaka 2 afite ibiro bitandatu, baduha amata, tugahuriza hamwe ibiryo, buri kwezi yagiye yiyongeraho ikiro n’amagarama […]. Umwaka ushize bampaye ihene irororoka ndayigurisha nongeraho amafaranga nguramo inka n’ihene. Ayo matungo aranyunganira mu kwita ku buzima bw’umwana”.

Ababyeyi bashyizeho umwarimu wigisha abana

Nsengimana Felix ashima Leta yabashyiriyeho gahunda zo kwita ku mikurire y’abana kandi na bo baterwa ishema no kuyigiramo uruhare bagahanga n’udushya.

Yagarutse ku musanzu abagabo batanga mu irerero agira ati: “Nk’iyo bagiye guteka tubasiriza inkwi, tukabavomera n’amazi, tugira gahunda yo gusimburana, abagabo bagenda bitanga buri umwe akaza akareba icyo abafasha”.

Ahakomotse “Terimbere Mwana”

Ingabire Jeannette urerera muri iri rerero ryitwa “Ubumwe” unarikuriye, yasobanuye ahakomotse “Terimbere mwana”.

Ati: “Yavuye ku mukecuru umukazana yatanye umwana afite umwaka umwe, adafite uburyo bwo kumurera, turiyegeranya nk’ababyeyi dushakira uwo mwana uburyo yabaho, twamushyize mu irerero kugira ngo tubashe kumukurikirana”.

Basanze kumukurikirana mu irerero gusa bidahagije batekereza n’uburyo yazagira ejo heza igihe yacutse, batangiza gahunda yo kurengera abana nk’abo bari mu miryango itishoboye.

Ingabire ati: “Twashyizeho amafaranga yo kwizigamira kugira ngo ari abana abakobwa babyariye iwabo, ari abo batawe, bajye babona uko babaho”.

Batangiye bizigamira igiceri cy’ijana buri cyumweru, bagera ku mafaranga 200, ubu bageze kuri 300. Umwaka ushize bari bafite bwizigame bw’amafaranga miliyoni imwe n’ibihumbi 600, baguramo amatungo baha abana bari mu irerero, asagutse n’ababyeyi barigurira.

Mukankaka Triphine, umukecuru igitekerezo cyo gushinga “Terimbere Mwana” cyatangiriyeho, ubu umwana arera ari hafi kuzuza imyaka itatu, ashima ubuyobozi n’ababyeyi bamubaye hafi.

Abana bagera ku myaka ine bazi gusoma no kwandika

Yagize ati: “Ndashimira Ubuyobozi bwazanye irerero ryatumye umwana akura, ababyeyi baraje baransura barambwira bati umwana tuzamufasha, tuzagukorera imirimo y’amaboko kandi mu irerero tugiye gushyiraho amafaranga y’ingoboka azajya agoboka abana n’uyu wawe arimo, ibyo barabitangiye; umwana yarwara bagakora muri ya ngoboka nkamujyana kwa muganga”.

Yunzemo ati: “Nabonye ubufasha bwa Leta impa ifu ya Shisha Kibondo, mu irerero bampa amata, bampaye ihene, inzu barayikurungiye, njye n’umwana tuba ahantu heza, iki gitenge nambaye cyavuye mu irerero, impuzankano yambaye zavuye mu ngoboka…”

Umuyobozi w’irerero Ingabire Jeannette yakomeje asobanura iyi gahunda, avuga ko umwana ucutse agiye mu mashuri abanza, umubyeyi we bamugumana akaba umukorerabushake kugira ngo bakomeze gukurikira umwana we, atazagira ibibazo agata ishuri. Bamugurira ibikoresho by’ishuri bakamuha n’itungo rimurengera.

Uwa mbere wacutse ageze mu mwaka wa kabiri w’ amashuri abanza. Irerero ryatangiranye abana 40 ubu hacutse10. Hari abandi 7 barimo gukurikirana bazinjizwa mu irerero bujuje umwaka n’igice.

Uko irerero ryarwanyije imirire n’ igwingira

Ku bijyanye n’uko barwanyije imirire mibi n’igwingira, Ingabire yavuze ko bari barwaje abana 7 ariko ubu bameze neza.

Ati: “Twabonye ko irerero nirikora umunsi umwe rya gwingira ritazarangira, twahise dushyiraho gahunda yo gukora buri munsi. Twari duhanganye n’ikibazo cy’abimukiraga mu kagari kacu baje gushaka akazi ko gusoroma icyayi, abana babo bagasigara mu ngo bakicwa n’inzara, bagakurizamo imirire mibi”.

Ababyeyi bahuriza hamwe ibiribwa bagatekera abana

Yunzemo ati: “Twahise twiyegeranya nk’ababyeyi tureba muri iyo Terimbere mwana yacu aho ituvanye n’aho itugejeje mu myaka ibiri tuyimaranye (yatangiye muri 2019), twitoramo umwarimu uzajya ukurikirana abana barimo na babandi bacumbika baje gusoroma icyayi kugira ngo akagari kacu cyangwa akarere katazongera kurangwa n’imirire mibi”.

Ku birebana no kubagaburira, Ingabire Jeannette yavuze ko buri munsi buri mubyeyi azana icyo afite bakabihuriza hamwe ibindi bakabigura.

Ati: “Ibishyimbo muri Terimbere mwana yacu turabigura, tukagura amavuta n’umunyu, Leta iduha injanga n’ifu y’igikoma, tugafata n’amatsinda y’ababyeyi; buri tsinda rikagira ibyo rizana; bamwe bakazana imboga, abandi intoryi, ibijumba, ibirayi n’amateke. Tugira amahirwe ko imirima y’igikoni tuyifite”.

Umubyeyi wese agira uruhare mu irerero, bagenda basimburana babiri babiri bagateka.

Ati: “Abana tubatekera indyo yuzuye; ibitera imbaraga ibyubaka umubiri n’ibirinda indwara. Iyo hari ikibuze dukora mu isanduku yacu tukakigura”.

Bafite n’imihigo, aho buri rugo rufite umwana mu irerero rusabwa kugira isuku, kuba rwarakurungiye inzu, rufite umusarane mwiza, aho kwiyuhagirira, kandagira ukarabe, agatara k’amasahani n’ akarima k’igikoni. Hashyizweho komite y’ababyeyi igenzura ko buri rugo rwujuje ibisabwa, kuko basobanukiwe ko umwanda ari intandaro y’igwingira.

“Terimbere Mwana” hari abatangiye kuyigiraho

Nyiragwiza Illuminée Umunyamabanga Nshingwabikorwa w’agateganyo w’Akagari ka Murambi, avuga ko agashya ka “Terimbere mwana” hari abandi bafite irerero batangiye kukigiraho, batangije ikimina kitwa “Ejo Heza” bazigamiramo abana.

Ati: “…kandi buri rugo rw’ikimina ruba rufite akarima k’igikoni, rufite itungo kuko baribagurira mu rwego rwo kurwanya imirire mibi n’igwingira”.

Yagaragaje ko Ubuyobozi bukomeje gushyigikira ibi bikorwa. Ati: “Ubuyobozi bwabafashije kubona imyayi (umurama), buri rugo rwabonye uwa karoti, amashu n’uw’imbwija. Na hano ku kagari twabashyiriyeho uburyo bwo kubaka imirima y’ibikoni igezweho, akaba ari yo bagenda bahingaho ayo moko atatu y’imboga. Ikindi gikomeye tubafasha; buri wa gatatu twoherezayo itsinda rikajya kudupimira ibiro abana bato bari mu irerero”.

Abitabiriye irerero bashyizeho gahunda yo kugurira abana amatungo

Hari na gahunda yo gukomeza gukurikirana ibyo bimina ku buryo buri muturage azahabwa inka.

Kurwanya igwingira bikomeje gushyigikirwa n’umushinga SPRP

Inkunga itangwa n’umushinga SPRP ikomeje gutuma ibikorwa byo kurwanya imirire mibi n’igwingira mu bana birimo amarerero n’ingo mbonezamikurire bishinga imizi.

Karemera Athanase Umuyobozi ushinzwe Ishami ry’Ubuzima mu Karere ka Nyaruguru, yasobanuye ko bakurikirana ingo mbonezamikurire bakunganirwa n’uriya mushinga ugenera Akarere amafaranga y’u Rwanda miliyoni zisaga 96, akagurwamo ifu y’igikoma n’injanga bihabwa izo ngo.

Ati: “Wanahaye ingo mbonezamikurire ibikoresho byo mu gikoni n’ibyo kubaka ubwiherero”.

Wanatanze ibitabo byifashishwa mu gukurikirana imibereho y’abana bari munsi y’imyaka 5 n’ababyeyi batwite, bise “Ikibaho cy’Umudugudu” unahugura ababikoresha barimo Abajyanama b’ubuzima. Amakuru ya buri kwezi akusanyirizwamo agashyikirizwa akagari kakayashyikiriza umurenge, na wo ukayageza ku rwego rw’akarere.

Kugeza ubu muri aka karere habarurwa ingo mbonezamikurire y’abana bato 967, muri buri mudugudu harimo 3.

Akarere ka Nyaruguru kari gafite ikibazo gikomeye cy’igwingira mu bana, aho Ibarura rusange ku mibereho y’abaturage (DHS) muri 2005 ryagaragaje ko kari kuri 54%.

Nk’uko byagarutsweho na Karemera Athanase, gahunda zashyizweho zo kurirwanya zirimo na ziriya ngo, zatumye muri 2010 kagera kuri 45,5%, mu 2015 kagera kuri 41,7%. Muri 2018, iryakozwe na Minisiteri y’Ubuhinzi n’Ubworozi (MINAGRI) ryagaragaje ko kari kuri 48%.

Abana bagaburirwa indyo yuzuye

Dusabimana Claudine amaze kugera ku bworozi bw’inka

Irerero rifite umurima w’igikoni

Ingabire Jeannette ni umwe mu babyeyi barerera mu irerero “Ubumwe” akaba anarikuriye

Mukankaka Triphine, igitekerezo cyo gushinga “Terimbere mwana” cyatangiriyeho

Nyiragwiza Illuminée Umunyamabanga Nshingwabikorwa w’agateganyo w’Akagari ka Murambi

Umwanditsi:

TUMUKUNDE GEORGINE

Tanga Igitekerezo

Email yanyu ntigaragazwa ku rubuga. Amazina na Email ni ngombwa.