Nyaruguru: Abafite ubumuga barishimira ikibuga cy’imikino bubakiwe

Abantu bafite ubumuga bo mu Karere ka Nyaruguru  barishimira ko ubuyobozi bwabafashije kubona  ikibuga kibafasha   mu myidagaduro  bakabasha gusabana  n’abandi.

Akarere ka Nyaruguru kabubakiye ikibuga kigezweho  cyashyizwe ku   kigo cy’ishuri cya  GS  Marie Mercie i Kibeho kikazabafasha  mu mikino ya Sitball na Sitting Volleyball ( imikino  abafite ubumuga bakina bicaye) kikaba cyanafasha n’abandi baturage bakunda imikino y’amaboko nka volleyball na Basketball.

Umuhuzabikorwa w’Inama y’Igihugu y’abafite ubumuga  mu Karere ka Nyaruguru, Semanzi  Vedaste avuga ko iki kibuga  cyaje gikenewe cyane  kubera ko abafite ubumuga bw’amaguru byabagora gukinira ahandi hantu hatameze neza bikaba byanababiviramo  gukomereka.

Yagize   ati: “Turishimira cyane  ko Leta yacu ikomeje kwita ku baturage by’umwihariko natwe  nk’abantu bafite ubumuga. Mbere  uburyo twakinaga; abafite ubumuga bashoboraga no gukomereka bikaba byanabaviramo ubundi bumuga, ubu rero urabona ko  tubonye ikibuga  tuzajya dukiniramo  nta kibazo”.

Akomeza agira ati: “Kuba iki kibuga cyashyizwe kuri iri shuri, bizafasha abana bafite ubumuga kwitabira imikino ndetse  binafashe n’abandi bana kumva ko  abantu bafite umubuga dushoboye kandi bizanadufasha nkatwe  bo muri Nyaruguru  kwakira andi makipe mu mikino ya Sitball na Sitting Volleyball”.

Semanzi  Vedaste yasabye abafite ubumuga  kubyaza umusaruro amahirwe yose  Leta ibagenera  harimo na kiriya kibuga.

Ikipe y’ Akarere ka Nyaruguru  y’Abafite ubumuga ya Sitball na Sitting Volleyball   isanzwe  yitabira shampiyona ngarukamwaka ku rwego rw’igihugu.