19°C , Partly sunny | Kigali-Rwanda

Nyagatare: Abaturage barasabwa kubaka ibikorwa by’ubutwari mu miryango

Yanditswe na Imvaho Nshya

Ku ya 05-02-2020 saa 07:29:23
Umuhanda Nyagatare-Rukomo-Gicumbi uri mu mihanda ikomeje kwagura ubuhahirane mu Karere ka Nyagatare

Ubuyobozi bw’Akarere ka Nyagatare burasaba abagaturiye n’Abanyarwanda muri rusange, guharanira ibikorwa by’ubutwari bakomeza gushyigikira iterambere ry’umuryango n’Igihugu muri rusange.

Umuyobozi w’Akarere ka Nyagatare Mushabe Claudian, yatangaje ko mu gihe u Rwanda rwizihiza Umunsi w’Intwari ku nshuro ya 26 Abanyarwanda bakwiye kuzirikana ibikorwa by’ubutwari byaranze Intwari z’u Rwanda bikabatera guharanira ubutwari buhera mu miryango.

Mu Kiganiro n’Imvaho Nshya, Mushabe yagize ati: “Abanyarwanda ndabifuriza kugira Umunsi mwiza w’Intwari ariko na none twongera kureba mu rugo rwa buri wese ngo bimeze bite? Ndifuza ko buri rugo rwagira ibikorwa by’ubutwari, tukagira umuryango ufite ubutwari. Ubutwari bufite ibisubizo by’abana bacu, buharanira kugira isuku mu ngo zacu, kwizigamira no guteganyiriza ahazaza, kubaka ingo zizira amakimbirane n’ibindi.”

Akomeza ashimira Intwari z’u Rwanda zitangiye Igihugu, ubu kikaba kigeze ku iterambere ryishimirwa mu mpande zose, aho Akarere ka Nyagatare kari kagizwe n’ishyamba mbere y’imyaka 25 ishize kabayeho, ubu kakaba ari n’intangarugero mu bikorwa bitandukanye by’iterambere.

Isura nshya y’Akarere ni ubutwari bw’Abanyarwanda

Mu myaka Akarere ka Nyagatare kamaze kabayeho karatuwe kagura ibikorwa by’iterambere ry’ubukungu, imiyoborere ndetse n’imibereho myiza y’abaturage.

Uko Akarere kagiye gaturwa ni ko ibikorwa by’ubuhinzi n’ubworozi byagiye byaguka mu bice byose bikagize nubwo mbere y’imyaka 25 ishize wasangaga igice cyako kinini ari ishyamba. Hakorwa ubworozi bwa kijyambere butanga umukamo uhagije mu muryango bagasagurira n’amasoko.

Kuri ubu gafite imihanda ya kaburimbo n’iy’ibitaka yoroshya ubuhahirane. Leta y’u Rwanda irabafasha kuzuza umuhanda Nyagatare-Rukomo- Base uhuza aka karere n’Intara y’Amajyaruguru ndetse n’uwa Rusumo-Kagitumba ugahuza n’aka Kirehe.

Meya Mushabe ashimangira ko imirenge yose icanirwa n’umuriro w’amashanyarazi ndetse hagenda haboneka amasoko y’amazi meza, ibitarigeze bibaho mu myaka 25 ishize.

Avuga ko mu bindi bishimira harimo ubuvuzi bwegerejwe abaturage aho hafi mu tugari hose hagejejwe amavuriro y’ibanze, akoroshya ubuvuzi aho nta muturage ukirembera mu rugo.

Ati: “Muri aka Karere twari dufite utuzu tubiri abantu bivurizagamo, ariko ubu twubakiwe Ibitaro bigezweho bya Nyagatare, hari kubakwa Ibitaro bya Gatunda ndetse buri murenge ufite ikigo nderabuzima. Hari amavuriro y’ibanze yegerejwe abaturage muri buri kagari, aho ntawukirembera mu rugo yabuze aho yivuriza. Uyu mutara ntawateraga igiti ngo gikure nyamara kuri ubu Nyagatare ni Akarere gatoshye kagwamo imvura kuko ibidukikije byitaweho.”

Ubuyobozi bw’Akarere ka Nyagatare kandi bwishimira kuba mu burezi bamaze kugwiza amashuri abanza, ayisumbuye ndetse na Kaminuza zirimo iya Leta n’iyigenga, ndetse ibikorwa byo kubaka ibyumba by’amashuri birakomeje.

Abaturage na bo bishimira kuba batarasigaye inyuma mu iterambere baharaniye mu gihe bagendaga bigizayo igice kigeze kuba Pariki.

Ku wa 1 Gashyantare 2020, Umunsi w’Intwari wizihirijwe mu Murenge wa Karama ku rwego rw’Akarere mu gihe ku zindi nzego wizihirizwa ahantu hatandukanye. Insanganyamatsiko y’uyu mwaka iragira iti: «Ubutwari mu Banyarwanda, Agaciro kacu.»

Urwego rushinzwe Intwari z’Igihugu, Imidari n’Impeta by’Ishimwe (CHENO), rwasabye inzego z’ibanze gushimira no guhemba abakoze ibikorwa by’ubutwari mu mwaka ushize.

Ibiro by’Akarere ka Nyagatare

 

Umuyobozi w’Akarere ka Nyagatare Mushabe Claudian

Umwanditsi:

Imvaho Nshya

Tanga Igitekerezo

Email yanyu ntigaragazwa ku rubuga. Amazina na Email ni ngombwa.