Nyabihu: Ababyeyi basabwe uruhare mu gukumira indwara y’igicuri mu bana bavuka

Yanditswe na Uwimana Donatha

Ku ya 10-11-2019 saa 15:15:44
Ngendahayo Jeannette Umuforomo muri Shyira asaba ababyeyi batwite kwipimisha inshuro enye kandi bakabyarira kwa muganga

Ababyeyi batwite bakanguriwe kujya bipimisha inshuro zagenwe no kubyarira kwa muganga mu rwego rwo gukumira indwara y’igicuri mu bana babyara.

Hari mu bukangurambaga bwakozwe n’Umuryango ‘Humanity & inclusion’ aho ugenda usobanurira abaturage indwara y’igicuri n’ibibi byayo.

Mu kiganiro Muneza Gaudelive umukozi w’uyu muryaryango yagiranye n’ababyeyi bo mu murenge wa Bigogwe Akarere ka Nyabihu, yababwiye ko ubuzima bw’umwana bugomba gukurikiranwa agisamwa kuko bimurinda guhura n’indwara zitandukanye harimo n’igicuri.

Yagize ati: “Hari igihe umubyeyi utwite udafite indwara y’igicuri, ashobora kubyara umwana ufite ubwo busembwa bw’igicuri, kimwe n’uko umubyeyi utwite ariko asanzwe afite indwara y’igicuri, ariko afata imiti neza ashobora kubyara umwana utayirwaye. Ni yo mpamvu mu bukangurambaga dukora dukangurira ababyeyi kwipimisha inshuro zose zagenwe ndetse bakabyarira kwa muganga kugira ngo barinde abo bazabyara indwara zirimo n’igicuri”.

Ababyeyi bari bitabiriye ubwo bukangurambaga bahamya ko kwipimisha ku mubyeyi utwite ari ngombwa. Mukabaziga Didacienne yagize ati: “Kutipimisha no kutabyarira kwa muganga byangizeho ingaruka kuko nigeze kwikubita hasi ntwite sinabyitaho kuko numvise ntababara cyane,  nyuma naje kubyara  umwana agize imyaka  8 ni bwo yatangiye kujya yitura hasi , ngiye kwa muganga banganirije amateka ye nza kwibuka ko mu gihe nari mutwite ntagiye kwipimisha, kandi ko nigeze kwitura hasi. Rwose umuntu w’umubyeyi utita ku nama za muganga atwite ahemukira umwana we”.

Ngendahayo Jeannette, umuforomo ushinzwe abafite uburwayi bwo mu mutwe mu bitaro bya Shyira, ashimangira ko igicuri ari indwara ifata udutsi two mu bwonko igatuma umuntu agaragaza ibimenyetso binyuranye.

Yagize ati: “Iyo ubwonko bumaze kwangirika, umurwayi w’igicuri atangira kwitura hasi, akigaragura, akazana urufuzi. Aha rero dusaba ababyeyi kwipimisha inshuro enye, bakabyarira kwa muganga, umwana akonswa gihe k’iminsi 1000, na bwo bamuha imfashabere bakamuha indyo yuzuye, kuko iyo umwana afashe indyo ituzuye bigira ingaruka ku bwonko; umubyeyi kandi akwiye kwirinda gufata imiti ya gakondo, cyangwa se gupfa kwifatira indi miti yose abonye atabibwiwe na muganga”

Ubuyobozi bw’Akarere ka Nyabihu butangaza ko habarurwa abarwayi b’igicuri bagera kuri 344, aho abafata imiti mu buryo bwubahiriza gahunda bagera ku 154.

Umwanditsi:

Uwimana Donatha

Tanga Igitekerezo

Email yanyu ntigaragazwa ku rubuga. Amazina na Email ni ngombwa.