Kigali-Rwanda

Mostly cloudy
21°C
 

NPC:  Muvunyi yabonye itike yo kuzakina shampiyona y’Isi i Dubai

Yanditswe na NKOMEJE GUILLAUME

Ku ya Apr 27, 2019

Muvunyi Hermas ukina imikino ngororamubiri yo gusiganwa ku maguru “Athletisme” mu kiciro cy’abafite ubumuga yamaze gukatisha itike yo kuzakina shampiyona y’Isi “2019 World Para Athletics Championships” izabera i Dubai, muri Leta zunze Ubumwe z’Abarabu mu tariki 07 kugeza 15 Ugushyingo 2019.

Uyu mukinnyi usanzwe userukira igihugu mu marushanwa mpuzamahanga, yabigezeho abikesha kwitwara neza yegukana umudari w’umuringa mu irushanwa ryiswe “Meeting International de Marrakech” ririmo kubera muri Maroc kuva tariki 24 rikaza gusozwa  kuri uyu wa Gatandatu tariki 27 Mata 2019.

Muri iri rushanwa ryabaye tariki 25 Mata 2019, Muvunyi yabaye uwa gatatu mu gusiganwa intera ireshya na metero 400 akaba yarakoresheje amasegonda 51 n’ibice 03.

Muvunyi Hermas wegukanye umudari w’umuringa muri Maroc bimuhesha itike yo kuzitabira shampiyona y’isi muri Qatar

Yaje inyuma ya Sadni Ayoub wabaye uwa mbere akoresheje amasegonda 49 n’ibice 21 (49″21) ndetse na Haddi Yassin wabaye uwa 2 (50″60) aho bombi bakomoka muri Maroc.

Aganira n’Imvaho Nshya, Karasira umutoza w’ikipe ya APR y’imikino ngororamubiri ari nayo Muvunyi Hermas asanzwe akinira yatangaje ko yishimiye uburyo uyu mukinnyi yitwaye muri rusange.

Yagize ati : “Uko yitwaye ni byiza n’ubwo ibihe bitabaye byiza kubera uko bakinnye bamaze umwanya munini bavuye mu kwishyushya. Twageze ku kibuga saa munani (14h00) bakina saa moya n’igice (19h30) murumva ko bitari byiza ku bakinnyi.”

Karasira Eric avuga ko uko yitwaye ntacyo bitwaye cyane kuko agifite andi mahirwe imbere yo kuba yarushaho kwitwara neza.

Muvunyi yasubiyeho inyuma isegonda rimwe kuko muri shampiyona y’igihugu yo gusiganwa ku maguru yabereye kuri Sitade Amahoro i Remera tariki 16 Gashyantare 2019 mu gusiganwa ahareshya na metero 400 yari yabaye uwa 3 akoresheje amasegonda 50.

Kuri uyu wa Gatandatu, tariki 27 Mata 2019 biteganyijwe ko Muvunyi nyuma yo kwiruka muri metero 400 aza gusiganwa mu ntera ireshya na metero 200.

Muvunyi Hermas  yaherukaga guserukira igihugu mu mikino mpuzamahanga mu mikino Paralempike “2016 Summer Paralympics” yabereye i Rio de Janeiro muri Brazil muri Nzeri 2016. Yasiganwe mu kwiruka intera ya metero 400 ndetse na metero 1500.

Mbere yo kwitabira shampiyona y’Isi izabera muri Qatar, Muvunyi Hermas akaba ashobora kwitabira  imikino y’Afurika “All African Games 2019” izabera muri Maroc  akaba ari inshuro ya 3 azaba ayitabiriye kuko yayitabiriye muri 2011 na 2015. Ubuheruka muri 2015 muri metero 400  yegukanye umudari wa zahabu akoresheje amasegonda 49 n’ibice 16.