19°C , Mostly cloudy | Kigali-Rwanda

NPC: Muvunyi na Uwitije nta bwo babashije  kwitwara neza muri shampiyona y’Isi

Yanditswe na BUGINGO FIDELE

Ku ya 16-11-2019 saa 13:10:55
Muvunyi Hermas (iburyo) Uwitije (uwa kabiri ibumoso) bari baserukiye u Rwanda muri shampiyona y'Isi i Dubai

Kuva tariki 07 kugeza 15 Ugushyingo 2019 i Dubai muri Leta zunze Ubumwe z’Abarabu habereye shampiyona y’Isi y’imikino ngororamubiri ku bafite ubumuga “World Para Athletics Championships 2019”.

Iyi mikino yari yitabiriwe n’abakinnyi babiri b’Abanyarwanda ari bo Muvunyi Hermas   mu kiciro cyo gusiganwa ku maguru  na  Uwitije Claudine ufite ubumuga bw’ubugufi bukabije   aho yarushanwe mu gutera ingasire (Lancer Disque) no mu gutera intosho (Lancer Poids).

Muvunyi Hermas  ni we mukinnyi w’u Rwanda wakinnye bwa mbere aho  yasiganwe muri metero 1500 ntiyabasha kwitwara neza kuko  yasoreje  ku mwanya wa 11 akoresheje  iminota 4 n’amasegonda 8 n’ibice 70 mu bakinnyi 14. Muri iki kiciro uwabaye uwa mbere ni Hristiyan Stoyanov wo muri Bulgaria wakoresheje iminota 3 n’amasegonda 50 n’ibice 87. Ku mwanya wa 2 haje Roeger Michael ukomoka muri Australia (3’51”99) naho ku mwanya wa 3 haza Iaremchuk Aleksandr ukomoka mu Burusiya (3’54”40).

Byari biteganyijwe ko Muvunyi Hermas asiganwa muri metero 400 ariko nk’uko abitangaza ngo yagezeyo asanga nta bwo   yashyizwe ku rutonde rw’abazakina muri iki kiciro.

Uwitije Claudine wari witabiriye iyi mikino ku nshuro ya mbere yakinnye mu kiciro cyo  gutera ingasire (Lancer Disque)  tariki 12 Ugushyingo 2019   aho yabaye uwa nyuma (15) aho  yateye kugera muri metero 13. Tariki 14 Ugushyingo 2019 yarushanwe mu gutera intosho (Lancer Poids) nabwo aba uwa  nyuma (15) aho  yateye kugeza muri metero 5,6.

Biteganyijwe ko aba bakinnyi baserukiye u Rwanda bagaruka kuri uyu wa Gatandatu tariki 16 Ugushyingo 2019.

Aba bakinnyi bombi babonye ibihe bibemerera “Minima” kuzitabira iyi shampiyona y’Isi ya 2019 nyuma y’uko bitwaye neza mu irushanwa “Meeting International de Marrakech” ryabereye muri Maroc kuva tariki 24-27 Mata 2019.

Muvunyi ni inshuro ya 3 yari yitabiriye shampiyona  y’Isi kuko bwa mbere muri 2013 mu Bufaransa  yitwaye neza yegukana umudari wa zahabu mu gusiganwa metero 800. Muri 2015 i Doha muri Qatar yaritabiriye ariko ntiyabasha kwegukana umudari naho muri 2017 nta bwo yitabiriye.

Aba bakinnyi bakaba batangaza ko bagiye gukomeza kwitegura kugira ngo bazitware neza mu marushanwa ari imbere harimo n’imikino y’Afurika “All African Games 2020”  izabera muri Maroc muri Mutarama 2020.

Umwanditsi:

BUGINGO FIDELE

Tanga Igitekerezo

Email yanyu ntigaragazwa ku rubuga. Amazina na Email ni ngombwa.