20°C , Partly cloudy | Kigali-Rwanda

Niyonzima yatangiye kwitegura “Commonwealth Games 2018”

Yanditswe na NKOMEJE GUILLAUME

Ku ya 09-02-2018 saa 07:07:23

Niyonzima Vedaste yamaze gutangira imyitozo yitegura kuzajya guhatana mu mikino ihuza ibihugu bikoresha ururimi rw’icyongereza “Commonwealth Games 2018”  izabera muri Australia kuva tariki 04-15 Mata 2018.

Niyonzima Vedaste watangiye kwitegura imikino ya Commonwealth Games 2018

Umukinnyi uzaserukira igihugu mu kiciro cy’abafite ubumuga mu guterura ibiremereye “Para Powerlifting”. Mu kiganiro Imvaho Nshya yagiranye n’umuyobozi ushinzwe Tekinike muri Komite y’igihugu y’imikino y’abafite ubumuga mu Rwanda “NPC-Rwanda”, Nsengiyumva Jean Marie yatangaje ko Niyonzima Vedaste azakora iyi myitozo mu byiciro bigera kuri bitatu.

Avuga ko ikiciro cya mbere kigizwe n’imyitozo akorera mu rugo, akaba ayikora wenyine gusa akaba akora ibijyanye n’amabwiriza aba yabwiwe n’umutoza we, Nsengiyumva Jean Paul. Iyi myitozo arimo gukora kuri ubu, yayitangiye mu byumweru bibiri bishize.

Nsengiyumva Jean Marie asobanura ko nyuma y’uko azaba arangije iyi myitozo akora ku giti cye, azakurikizaho imyitozo akorana n’umutoza we. Aha akazakora ibyumweru bigera kuri 4, aho azajya akora mu mpera z’icyumweru, buri wa Gatanu, ku wa Gatandatu no ku Cyumweru.

Uyu muyobozi avuga ko Niyonzima azakora umwiherero uzatangira tariki 10 Werurwe 2018 kugeza asoje imyitozo ye, ari nabwo azahita ahaguruka mu Rwanda yerekeza muri Australia ahazabera aya  marushanwa.

Umutoza we, Nsengiyumva Jean Paul atangaza ko afite intego yo kuba yakura Niyonzima ku bilo asanzwe aterura (biri hagati ya 115 na 120), akaba yamuzamura akagera ku biro 150.

Yizera ko azabigeraho kubera ko bafite umwanya uhagije wo kwitegura. Avuga ko  impamvu yabyo nta yindi ari uko naramuka abashije guterura hagati y’ibilo 140 -150, hari amahirwe menshi yo kuba yakegukana umudali muri ayo marushanwa.

Niyonzima Vedaste kandi waje no guhagararira igihugu muri shampiyona y’isi mu kiciro cy’abafite ubumuga mu  guterura ibiremereye “World Para Powerlifting 2017” yabereye muri Mexique kuva tariki 29 Ugushyingo – 7 Ukuboza 2017, ntabwo yitwaye neza kuko mu batarengeje ibilo 54 mu guterura ibilo hagati ya 115-120  yasoreje  ku mwanya wa 12.

Umwanditsi:

NKOMEJE GUILLAUME

Tanga Igitekerezo

Email yanyu ntigaragazwa ku rubuga. Amazina na Email ni ngombwa.