Ngororero: Bamenye akamaro k’imboga baca ukubiri no kurya “inkumbagare”

Yanditswe na TUMUKUNDE GEORGINE

Ku ya 29-03-2021 saa 04:00:08
Abaturage bavuga ko baciye ukubiri no kurya ibiryo bitarimo imboga

Abaturage bo mu Karere ka Ngororero bavuga ko basobanukiwe akamaro ko kurya imboga; bamaze kubona ko uwaziriye ntaho aba ahuriye n’utazirya, baca ukubiri n’ifunguro zitarimo bita “inkumbagare”.

Abaganiriye n’Imvaho Nshya bo mu Murenge wa Kageyo, basobanuye ko iryo funguro bahoreraga ryabaga ari ingereke y’ibishyimbo n’imyumbati, amateke cyangwa ibijumba, kubera kudasobanukirwa imboga ntibazihe agaciro.

Ubu ngo bamenye ko uwariye imboga agira ubuzima bwiza agaca ukubiri no kurwaragurika no kugira imirire mibi. Bamwe bati: “Uwariye imboga aba akeye mu maso, afite itoto”.

Ni muri urwo rwego bitabiriye guhinga uturima tw’igikoni, tubafasha kuzibona hafi batazihashye, bityo ntizibure mu ifunguro.

Mukansanga Vestine utuye mu Mudugudu wa Kariha, Akagari ka Kageshi ati: “Iyo ngiye guteka, mfata akabugita ngakeka imboga ngateka, abana bakarya ibiryo byiza, tukarya indyo yuzuye tukumva tuguwe neza. Mbere twapfaga guteka, tugateka ibijumba n’ibishyimbo, tukagerekeranya muri make, ariko ubu dusigaye duteka tugashyiraho n’utuboga tukarisha”.

Umugabo we Tabaro Dominique yunzemo ati: “Dufite akarima k’igikoni, tubasha kurya indyo yuzuye. Imboga zirwanya imirire mibi, iyo umuntu aziriye agira ubuzima bwiza […]. Mbere twateguraga amafunguro imboga ntituzihe agaciro ariko aho tubihuguriwe usanga tubyitayeho cyane”.

Mukansanga Vestine n’umugabo we Tabaro Dominique bitabiriye akarima k’igikoni, ubu ntibagipfa guteka indyo biboneye

Uzabakiriho Francine utuye mu Mudugudu wa Cyungo Akagari ka Kageshi, Umurenge wa Kageyo, afite imyaka 62, umwuzukuru arera yari yararwaye imirire mibi, amara igihe kinini mu bitaro, avuga ko byamuhaye isomo ku buryo adashobora gusiba imboga mu ifunguro.

Ati: “Mfite akarima k’igikoni ntikajya kaburaho imboga n’abaturage baraza nkabaha kuko sinifuza ko hari uwahura n’ikibazo nagize cyo kurwaza imirire mibi. Ubu namenye ko imboga zifite akamaro gakomeye mu buzima, […]. Muri icyo gihe umwana arwaye natekaga imboga, ikirayi, umwumbati n’udushyimbo duke ngacucumira muri za mboga nkamuhesha ikiyiko, ubu yarakize neza. Kumurwaza byampaye isomo, ubu ntegura indyo yuzuye”.

Ndagijimana François wo mu Mudugudu wa Kariha akaba anawuyoboye, ni umwe mu bafashe iya mbere mu kugira akarima k’igikoni kugira ngo abo ayobora bamurebereho.

Ati: “Nk’Umuyobozi w’Umudugudu, nkimara kumenya ubwiza bw’akarima k’igikoni nagashishikarije abaturage ariko nanjye mbanje kwiheraho. Twitabiriye kurya indyo yuzuye irimo ibitera imbaraga, ibyubaka umubiri n’ibirinda indwara twasanze ko bigomba kuba birimo imboga”.

Yakomeje avuga ko kwitabira uturima tw’igikoni byabagiriye akamaro gakomeye kuko imboga bahinzemo bazifashishije mu gikoni cy’umudugudu, batoza ababyeyi guteka indyo yuzuye bituma abana 3 bari bafite imirire mibi bayikira.

Ndagijimana François uyobora Umudugudu wa Kariha

Ati: “Mu by’ukuri uko twabonaga imyumvire y’abaturage; bafataga ibishyimbo bakagerekaho imyumbati bagateka ibyo bita inkumbagare ntibavangemo imboga ariko ubu turafatanya n’utarazeza araza tukamuha”.

Akamaro k’imboga kanagarukwaho na Tukayisabe Mediatrice uvuga ko imboga zituma abana batagwingira cyangwa ngo bagire imirire mibi.

Ati: “…zifasha abana ndetse n’abantu bakuru, zibungabunga amaso umuntu ntagire ubuhumyi. Ku kigo nderabuzima batwigishije kujya duteka imboga kandi zikagira akamaro ku bana bacu, nanjye ubu ndonsa kandi zimfasha kubona amashereka. Baraduhuguye, abana tukajya tubaha imboga ubu ntawe ukirwaragurika”.

Bafashe ingamba zo guhorana imboga no mu mpeshyi

Abaturage bavuga ko mu gihe cy’izuba ryinshi (impeshyi/icyi) usanga uturima twinshi twuma hakaba hari n’abatabona uburyo bwo kutuvomerera, bityo ngo icyo kibazo bagifatiye ingamba aho usanga bahinga n’izindi mboga zidakangwa n’izuba.

Uturima tw’igikoni twagize uruhare mu kurwanya imirire mibi mu bana

Ndagijimana François yagize ati: “Twitabiriye guhinga imboga kubera akamaro kazo, uretse izo ku karima k’igikoni, ku ruhande duhinga ibiti by’isombe, tugahinga ibishayote, … ku buryo nta rwitwazo rwo kutazirya tuvuga ngo izuba ryazumishije cyangwa se ngo akarima kashaje gakeneye kuvugururwa”.

Abagabo biyemeje kugira uruhare mu itegurwa ry’indyo yuzuye irimo imboga

Abagabo bavuga ko na bo bafite uruhare mu gutegura indyo yuzuye bubaka uturima tw’igikoni kandi bakanahwitura abagore babo kwita kuri iryo funguro.

Tabaro Dominique ati: “Uruhare umugabo agomba kurugira, nko muri uko kubaka akarima k’igikoni, umugore wanjye dufatanya kukitaho”.

Ndagijimana François ati: “Mfite umugore utwite iyo tugiye gutegura indyo yuzuye, dushyiramo n’imboga […], iyo yagiye mu zindi gahunda nanjye imboga ndazisoroma nkamufasha kuziteka”.

Mugenzi we Bakure Celestin na we ati: “Imboga zirwanya igwingira ry’abana, bakagira imikurire myiza, zifasha n’abagore batwite, zifasha abantu bose zikabarinda ubuhumyi. Ndakangurira abagabo bagenzi be kugira uruhare mu guhinga uturima tw’igikoni, bafashe abagore babo kwita ku ndyo yuzuye”.

Mukankubito Clementine Umuyobozi w’Ikigo Nderabuzima cya Kageyo yagarutse ku kamaro k’imboga ku bana, avuga ko zibarinda indwara. Ati: “Umwana ashobora kurwara bwaki kubera ko hari izindi ndwara zuririyeho, uriye imboga cyane cyane imboga rwatsi, zimurinda izo ndwara, zimufasha kubona neza, imboga ni nziza mu mikurire y’umwana”.

Mukankubito Clementine Umuyobozi w’Ikigo Nderabuzima cya Kageyo

Yakomeje asobanura ko imboga ziri mu bigize ifunguro ryuzuye. Ati: “Ifunguro ryuzuye umuntu agomba gufata rigomba kubamo ibitera imbaraga (ibirayi, ibijumba, imyumbati,…), ibirinda indwara (imboga n’imbuto), ibyubaka umubiri birimo ibituruka ku matungo (inyama, amagi, indagara,…) n’ibituruka ku bihingwa (ibishyimbo, soya)”.

Uturima tw’igikoni twagize uruhare rukomeye mu kurwanya imirire mibi

Mukamana Soline Umuyobozi w’Ishami rishinzwe Ubuzima mu Karere ka Ngororero, yagaragaje uburyo uturima tw’igikoni twagize uruhare rukomeye mu kurwanya imirire mibi by’umwihariko yari yibasiye Umurenge wa Kageyo aho mu mwaka wa 2019-2020, wabarurwagamo kimwe cya kabiri cy’abana bose bari bayirwaye mu karere.

Ati: “Uyu murenge wari uwa mbere ufite abana bafite imirire mibi, ibikorwa byakozwe mu kurwanya imirire mibi ni byinshi twashyizemo ingufu, ariko cyane cyane twahinze uturima tw’igikoni two gukoresha mu gikoni cy’umudugudu, ku buryo abaturage bahinze imboga zikera, tubereka n’uburyo bazikoresha”.

Yakomeje avuga ko ubu uriya murenge usigaranye umwana umwe ufite imirire mibi (uri mu ibara ry’umuhondo) mu bana 2682 baherutse gupimwa mu kwezi gushize kwa Gashyantare. Mu Karere kose, mu bana 49,404 bari munsi y’imyaka 5, abafite imirire mibi ni 90.

Mukamana Soline ati: “Guhinga imboga biri muri gahunda yo kwihaza mu biribwa, kandi imboga ziri mu biribwa birinda indwara, iyo umwana cyangwa umuntu mukuru yagize uburwayi burya biroroshye cyane no kugira imirire mibi ni yo mpamvu twahinze uturima tw’igikoni dufashijwe n’abafashamyumvire b’ubuhinzi n’abandi bafatanyabikorwa n’abaturage babigizemo uruhare”.

Kugeza ubu mu karere kose hamaze guhingwa uturima tw’igikoni turenze ibihumbi 100. Hari uturima twagiye duhingwa ku bufatanye n’abafatanyabikorwa, urubyiruko rw’abakorerabushake, ubu abaturage na bo bariyegeranya bakagenda bubakira umwe muri bo.

Inzego z’ubuzima zivuga ko imboga zirwanya indwara z’amaso kuko zibonekamo ubwoko bunyuranye bwa  vitamini A ikumira ubuhumyi, irwanya indwara zirimo iz’uruhu, iz’ibiheri ahanini biterwa n’ibura ryazo, ituma abana bakura neza, ikabarinda kurwaragurika. Habonekamo umunyu w’ubutare (fer) utuma hatabaho ibura ry’amaraso mu mubiri.

Uwifitiye akarima k’igikoni asaruraho imboga zigifite ubuziranenge, bitandukanye no kuzigura mu isoko aho zishobora kuba zaraye cyangwa zimazemo iminota runaka, zabitswe mu byuma bikonjesha (frigo) kuko haba hari intungamubiri zatakaje.

Uzabakiriho Francine avuga ko kurwaza imirire mibi byamusigiye isomo ryo guha agaciro imboga

Nyirabaziyaka Patricie uhinga ibishayote avuga ko bifashisha n’imboga zabyo mu kunoza imirire

Tukayisabe Mediatrice avuga ko imboga zimufasha akonsa neza

Bahinga n’isombe ikunganira imboga zo ku karima k’igikoni

Abaturage bagenda bubakirana uturima tw’igikoni

Umwanditsi:

TUMUKUNDE GEORGINE

Tanga Igitekerezo

Email yanyu ntigaragazwa ku rubuga. Amazina na Email ni ngombwa.