Kigali-Rwanda

Partly cloudy
19°C
 

Ngoma: Garden TVET School imaze gutoza abarenga 5,000 kwihangira imirimo

Yanditswe na Ntawitonda Jean Claude

Ku ya 19-11-2018 saa 12:20:01
Rugambage André Umuyobozi w’Ikigo cya Garden TVET School, aratwereka imashini yitwa Injection Pump Test ikoreshwa cyane mu bukanishi (Ifoto Manishimwe N)

Ubuyobozi bw’Ishuri ryigisha ubukanishi no gutwara ibinyabiziga Garden TVET School bugaragaza ko intego yatumye rishingwa yagezweho kuko rimaze gushyira ku isoko ry’umurimo abarenga 5,000 ndetse abenshi muri bo bafite akazi bakesha ubumenyi bahaherewe.

Ikigo Garden TVET School giherereye mu Karere ka Ngoma, Umurenge wa Kibungo, mu Kagari ka Mahango hafi y’umuhanda wa kaburimbo werekeza ku Rusumo mu birometero bitarenga 2 uvuye ku biro by’Akarere ka Ngoma.

Rugambage André Umuyobozi w’Ikigo Garden TVET School ari na we wagitangije, yabwiye Imvaho Nshya ko yagishinze agamije gufasha urubyiruko kwiga imyuga n’ubumenyingiro kugira ngo rubashe kwihangira imirimo.

Yagize ati “Iki kigo nagishinze mu mwaka wa 2012 kigamije guteza imbere urubyiruko no gufatanya na Leta muri gahunda yo guteza imbere uburezi bushingiye ku bumenyingiro. Kugeza ubu abanyeshuri bamaze kurangiza mu bijyanye no gukanika imodoka bagera ku 1,000 n’abandi barenga ibihumbi 4,000 bize gutwara moto n’imodoka; ubu bafite impushya zo gutwara (permis) bakuye mu ishuri dufite ryitwa ‘Star Driving School’.”

Yakomeje avuga ko iri shuri rifite abakozi bahoraho biganjemo abarimu bagera kuri 14, ibyumba by’amashuri n’aho abanyeshuri bacumbikirwa hahagije.

Ibyumba by’amashuri bifite aho abanyeshuri bigira n’aho bashyirira mu bikorwa ubumenyingiro hari ibikoresho nka “injection pump test”, moteri yigishirizwaho gukanika, “electronic milti-power”, “electronic warranty cards” na za mudasobwa by’agaciro ka miliyoni 130 z’amafaranga y’u Rwanda.

ABARANGIJE MURI GARDEN TVET SCHOOL BARAHAVUGA IMYATO

Abenshi mu rubyiruko rwize mu Ishuri Garden TVET bamaze kwiteza imbere kuko hari ababonye akazi k’ubukanishi mu magaraji atandukanye n’abatwara imodoka mu Rwanda no mu mahanga.

Kamana Pascal w’imyaka 30 y’amavuko ukorera umwuga w’ubukanishi mu Mujyi wa Kigali, yize gukanika muri Garden TVET School mu mwaka 2012.

Yagize ati “Ndi umukanishi ni byo bintunze nkorera i Kigali kandi nabyize muri Garden TVET; iyo nakoze neza ku munsi nkorera amafaranga ari hagati ya 30,000 na 50,000. Naguze isambu y’amafaranga 700,000 ntunze umuryango wange kandi ngiye no kuzuza inzu i Remera (i Kibungo) imaze kuntwara arenga miliyoni n’ibihumbi 200.”

Gasana Everigiste wiga mu mwaka wa 6, yizeye ko ashingiye ku bumenyi bahabwa yiteguye neza ikizamini cya Leta kandi atazaba umushomeri nyuma yo gusoza amasomo.

Ati “Niga ubukanishi bw’imodoka, tubyiga ku buryo bw’amagambo, tukanabishyira mu ngiro hano kuko ibikoresho bigezweho birahari. Ndumva nindangiza ntazaba umushomeri.”

Mu mwaka ushize abiga muri Garden TVET School, bakoze ibizamini bya Leta mu mashuri yisumbuye y’Imyuga n’Ubumenyingiro, batsinze ku kigero cya 99%.

Mu Rwego rwo gufasha urubyiruko kwihangira imirimo ku buryo burambye, Ubuyobozi bwa Garden TVET bwafashije urubyiruko rugera ku 150 gushyiraho Koperative y’Abamotari yitwa “Le Professionel.”

Garden TVET School yakira abantu bose bashaka kwiga baba abagize amahirwe yo kwiga n’abatarize. Uje atarize asabwa kuba yujuje imyaka 16 y’amavuko mu gihe abandi bose barangije Ikiciro rusange cy’amashuri yisumbuye (Tronc Commun) bemerewe kuhiga.

Iri shuri rimaze gufasha abana batishoboye barenga 100 kwigira ubuntu.

Abanyeshuri biga Ubukanishi muri Garden TVET ubu babarirwa muri 300 (Ifoto Garden TVET)

Ibikoresho bitandukanye bifasha abiga gushyira mu ngiro ibyo biga, Garden TVET School ifite ibifite agaciro ka miliyoni 130 (Ifoto Manishimwe N)

Rugambage André Umuyobozi w’Ikigo cya Garden TVET School, aratwereka imashini yitwa Injection Pump Test ikoreshwa cyane mu bukanishi (Ifoto Manishimwe N)

Rugambage André Umuyobozi w’Ikigo cya Garden TVET School (Ifoto Manishimwe N)

Uko abanyeshuri biyongera ni ko n’ibyumba by’amashuri byongerwa

Umwanditsi:

Ntawitonda Jean Claude

One Comment on “Ngoma: Garden TVET School imaze gutoza abarenga 5,000 kwihangira imirimo”

  1. twishimiye iri menyesha ariko nta adress y’uko twavugana n’abayobozi bishuri twabonyeho mudufashe kubona adress murakoze

Leave a Reply to Butera Anselme Cancel reply

Email yanyu ntigaragazwa ku rubuga. Amazina na Email ni ngombwa.