Natangajwe nuko Abanyarwanda bafite umuhate wo kwiteza imbere – Amb. Vrooman

Yanditswe na KAYITARE JEAN PAUL

Ku ya 25-09-2018 saa 08:03:48
Ambasaderi Vrooman ubanza ibumoso mu bicaye, Prof Harerimana umuyobozi wa RCA iburyo n'abandi bagize amakoperative yahawe inkunga (Foto Amani A.)

Ambasaderi wa Leta Zunze Ubumwe z’Amerika (USA) mu Rwanda Peter H. Vrooman, avuga ko yatangajwe n’uburyo Abanyarwanda bashyira imbaraga mu gukora kugira ngo biteze imbere.

Ambasaderi Vrooman ubanza ibumoso mu bicaye, Prof Harerimana umuyobozi wa RCA iburyo n’abandi bagize amakoperative yahawe inkunga (Foto Amani A.)

Ibi yabigarutseho ejo hashize ku wa Mbere tariki ya 24 Nzeri 2018 ubwo Ambasade y’Amerika yahaga inkunga amakoperative ane y’abahinzi borozi mu mishinga yayo yari yagaragaje ko ikeneye guterwa inkunga.

Amb. Vrooman avuga ko USA zimaze gutera inkunga amakoperative yo mu Rwanda 144 kuva mu 1994, akaba yizeye ko izi koperative zatewe inkunga zizatera imbere, agashima ubufatanye bwa Leta y’u Rwanda n’ambasade ahagarariye mu iterambere ry’umuryango.

Ati “Nishimira ko ambasade yifatanya na Leta y’u Rwanda ndetse hiyongereyeho n’amashyirahamwe adaharanira inyungu kugira ngo umuturage w’u Rwanda ashobore gutera imbere. Natangajwe cyane no kubona ukuntu Abanyarwanda bafite umuhate wo kwiteza imbere ubwabo n’abo bafatanya.”

Avuga ko koperative zahawe inkunga, imwe imwe itarengereje amadolari y’Amerika 15 000 akemeza ko mu minsi iri imbere azasura izi koperative.

Ati “Ndifuza kuzabasura nkareba uko mukomeje kwiteza imbere kandi ubwo nasuraga bamwe muri mwe, nasuye ibikorwa by’umushinga wo kororera mu byuzi nsanga bimeze neza. Nkuko mubizi ambasade itera inkunga imishinga itandukanye nko kwihangira imirimo, iterambere ry’ubukungu, no guhanga umurimo nyawo ku rwego rw’ibanze.”

Yongeyeho ati “Abantu ubwabo bitegurira imishinga ijyanye n’ubukungu bw’imibereho yabo, buri mushinga uri mu ruhare rufatika rw’abagenerwabikorwa. Iyi mishinga ntiri hasi y’ibihumbi 15 by’amadolari y’Amerika ibi kandi binatuma abantu bagira ibyo kurya bihagije no kongera umusaruro w’ubuhinzi mu rwego rwo guteza imbere ubukungu no guhanga udushya, byose bigaturuka ku nkunga tubagenera.”

Prof. Harerimana Jean Bosco, Umuyobozi w’Ikigo k’igihugu gishinzwe amakoperative, avuga ko iyo habonetse amafaranga ubushobozi bw’amakoperative nabwo bwiyongera. Ati “Bikwiye kubera urugero andi makoperative atarabonye inkunga ku buryo ashobora kureberaho akaba yanyura muri banki agafata inguzanyo, imirimo n’akazi bikarushaho kwiyongera muri koperative, koperative ikaba inzira umuntu anyuramo kugira ngo yunguke. Twizera ko inkunga yatanzwe n’Ambasade y’Amerika izateza imbere amakoperative.”

Prof. Harerimana akomeza agira inama amakoperative yo gukoresha inkunga icyo bayisabiye. Ati “Turasaba ko inkunga bahawe bayikoresha icyo bayisabiye. Ukurikije uko imishinga banditse iteguye, baramutse bayikurikije nta kabuza amakoperative yakwiteza imbere.”

Mukasabaginama Joseph uyobora koperative Kora Mworozi ikorera mu karere ka Gicumbi mu murenge wa Mukarange ashima inkunga basabye, bakaba bahawe ingana n’amadolari y’Amerika ibihumbi 15.

Ati “Iyi nkunga izadufasha mu bibazo dusanzwe dufite kuko mu kuyisaba twagira ngo twongere ubushobozi bw’ibyuma byakira amata kuko ibyuma dufite bidahura n’ubushobozi bw’amata twakira. Ikindi bizadufasha, ni uburyo bw’ubuziranenge bwayo kubera uburyo bwo kuyakira ndetse no kuyohereza ku isoko ntibwari bwujuje ubuziranenge.”

Koperative Kora Mworozi mu gihe k’izuba ibona umusaruro uri hagati ya litiro 1000 na 2000 ariko igihe k’imvura nibura ikabona uri hagati ya litiro 2000 na 2500.

Rutikanga Laurent, umwe mu bahinzi b’ibisheke unahagarariye abahinzi b’ibisheke mu murenge wa Ntarama mu karere ka Bugesera mu Ntara y’Iburasirazuba, ati “Kubera umwuzure ukunda kudutwarira ibisheke, ariko inkunga twahawe n’Ambasade y’Amerika, dusanga izadufasha bityo tukongera umusaruro w’ibisheke tukava kuri toni 70 tukabona toni 100.”

Murenzi Athanase uhagarariye abahinzi b’umuceri bibumbiye muri koperative CORIMARU ikorera mu murenge wa Mwogo mu karere ka Bugesera mu gishanga cya Rurambi avuga ko koperative yabo yahawe inkunga y’ibihumbi 12 z’amadolari y’Amerika, biteguye kuyikoresha neza.

Ati “Twiteguye gukoresha neza inkunga mu mirimo twayisabiye. Mu by’ukuri twasabye iyo nkunga tugira ngo twubake ubwanikiro kuko dufite buke. Tugiye gutunganya imbuga y’aho tuzajya twanika byose bikazakorwa mu nkunga twahawe.”

Mu makoperative 50 yatanze imishinga yagombaga guterwamo inkunga, amakoperative 4 yatoranyijwe ni COPROMA, CORIMARU, SUFACO na Kora Mworozi. Izi koperative ni nazo zagaragaje kwiteza imbere.

 

 

Umwanditsi:

KAYITARE JEAN PAUL

One Comment on “Natangajwe nuko Abanyarwanda bafite umuhate wo kwiteza imbere – Amb. Vrooman”

Tanga Igitekerezo

Email yanyu ntigaragazwa ku rubuga. Amazina na Email ni ngombwa.