19°C , Partly cloudy | Kigali-Rwanda

Nange niteguye guhanganira umwanya-Rwatubyaye

Yanditswe na BIZIMANA ERIC

Ku ya 11-05-2018 saa 06:33:16
Rwatubyaye Abdoul utangaza ko agiye gukora cyane akabona umwanya uhoraho muri Rayon Sports

Nyuma yo gukina umukino we wa mbere amaze umwaka afite imvune, Rwatubyaye Abdoul myugariro wo hagati wa Rayon Sports yavuze ko ari umwe mu bagiye guharanira umwanya uhoraho muri iyi kipe.

Rwatubyaye Abdoul utangaza ko agiye gukora cyane akabona umwanya uhoraho muri Rayon Sports

Rwatubyaye yakinnye umukino w’umunsi wa 21 wa shampiyona   tariki 09 Gicurasi 2018   aho Rayon Sports  yanganyije na  Mukura 0-0. Mu kumuha ikaze, yahawe igitambaro cy’ubukapiteni. Amakuru Imvaho Nshya yavanye ku kibuga avuga ko ngo biri mu masezerano ye ko agomba kwambara iki gitambaro mu gihe ari muzima.

Nyuma y’umukino, Rwatubyaye yashimiye bikomeye abakinnyi, abayobozi n’abakunzi bamubaye hafi mu bihe bikomeye anabizeza ko agiye kugaruka mu bihe bye. Ati ”Kugirwa kapiteni ni ikizere nakiranye ibyishimo byinshi, ni ibintu ntari niteguye, ni ibintu byantunguye, bampereye igitambaro mu rwambariro, ni ibintu by’agaciro ngomba kandi gukorera iki gitambaro  n’ubwo ari icy’agateganyo, ibintu biragenda neza kandi nabyishimiye”.

Rwatubyaye yavuze ko aje guhanganira umwanya na ba myugariro b’iyi kipe barimo Manzi Thierry, Mugabo Gabriel, Usengimana Faustin na Mutsinzi Ange.

Ati ”Nta kibazo, niteguye guhanganira umwanya, mwabonye uko nitwaye, ngiye kumenyera guhanganira umwanya, ndakeka ko ninkomeza gutya nta kizambuza kubona umwanya ubanzamo”.

Uyu myugariro arizeza abakunzi b’ikipe ye ko ameze neza kandi yakize neza. Ati ”Narangije umukino wose, sinavuga ko nari najya mu bihe byange ariko uko nitwaye muri rusange byari byiza. Reka mbisubiremo ndashimira bagenzi bange bakomeje kumfasha, ngomba kwitwara neza ku buryo ntazasubira hasi”.

Umutoza wa  Rayon Sports, Ivan Minnaert nawe yishimiye ko Rwatubyaye yagarutse  aho yerekana ko bizamufasha kujya aruhutsa ba myugariro mu marushanwa atatu iyi kipe irimo. Ati ”Ni umukinnyi mwiza, azakomeza kubona imikino. Ibyo bizadufasha kuruhutsa abandi bakinyi, nko ku mukino wa Mukura twahaye ikiruhuko Gabby na Faustin, umukino utaha tuzaruhutsa Ange”.

 

 

 

Umwanditsi:

BIZIMANA ERIC

Tanga Igitekerezo

Email yanyu ntigaragazwa ku rubuga. Amazina na Email ni ngombwa.