17°C , Thunderstorms | Kigali-Rwanda

Musanze: Aborozi ntangarugero bahawe ibikoresho bizabafasha kuba bandebereho

Yanditswe na Uwimana Donatha

Ku ya 21-09-2019 saa 18:27:16
Ibikoresho bitandukanye byahawe aborozi ntangarugero

Mu rwego rwo gukomeza kuba hafi Aborozi Ntangarugero (Model Farmers) batoranyijwe mu Matsinda y’Aborozi yashyizweho muri Gahunda y’Ishuri ry’Aborozi mu Murima no mu Kiraro (LFFS: Livestock Farmers Field School) no kubashishikariza gufasha bagenzi babo guhindura imyumvire no kubongerera ubumenyi, abo borozi bahawe ibikoresho bibafasha kurushaho kwihutisha imirimo yabo no kunoza ibyo bakora bagakomeza kuba bandebereho.

Ibyo bikoresho bigizwe n’imashini zikata ubwatsi bw’inka zororerwa mu bikumba rusange (mu Murenge wa Gataraga n’uwa Gacaca) n’aborozi ntangarugero bo mu Mirenge ya Muko, Nkotsi, Cyuve, Kinigi, Musanze na Nyange, banahabwa imifuka 2 y’isima n’ibiro bibiri by’imisumari kuri buri muntu bizifashishwa mu kwita ku biraro by’inka zabo.

By’umwihariko, umwe muri abo borozi ntangarugero ufite inka zirenze eshatu zikamwa, Madamu Mumporeze Leonie, yanongerewe n’imashini ikama.

Aba borozi bahawe ibi bikoresho ku bufatanye n’Umushinga Uteza Imbere Ubworozi bw’Inka Zitanga Umukamo, RDDP (Rwanda Diary Development Project) wa MINAGRI ukorera muri aka Karere.

Muri iki gikorwa, Ubuyobozi bw’Akarere bwari buhagarariwe n’Umuyobozi w’Ishami ry’Ubuhinzi n’Ubworozi n’Umutungo Kamere, Ngendahayo Jean, washimiye aba borozi akanabashishikariza kurushaho gusigasira no kubyaza umusaruro aya mahirwe bakomeje kwegerezwa n’Ubuyobozi bwiza buri mu Gihugu, burajwe ishinga n’iterambere rya buri wese kandi muri byose, anabizeza ubufatanye buhoraho.

Ku ruhande rw’aba borozi batashye biyemeje guhinga ubwatsi bwinshi no kwimakaza umuco w’isuku aho bari hose hagamijwe kongera umusaruro w’amata mu bwinshi no mu bwiza, kwiteza imbere ubwabo binyuze mu mishinga itandukanye, cyane ko RDDP ibishyurira 50% by’agaciro kayo no kubihamagarira abandi.

Ubuyobozi bw’Akarere ka Musanze buvuga ko ibikoresho bahawe bifite agaciro kangana na miriyoni umunani z’amafaranga y’ u Rwanda (8,000,000RWF).

Umwanditsi:

Uwimana Donatha

Tanga Igitekerezo

Email yanyu ntigaragazwa ku rubuga. Amazina na Email ni ngombwa.