Kigali-Rwanda

Partly sunny
26°C
 

Munyaneza yegukanye intera ya kabiri yo kwitegura Tour du Rwanda 2018

Yanditswe na BUGINGO FIDELE

Ku ya 23-07-2018 saa 08:03:59
Munyaneza Didier umwe mu bakinnyi b'u Rwanda bashobora kuzitwara neza muri Tour du Rwanda 2018

Karongi-Rubavu (95,1 km)

1.Munyaneza Didier 2h33’41”

2.Nsengimana Jean Bosco 2h33’43

3.Byukusenge Patrick       2h33’48”

4.Manizabayo Eric 2h35’39”

5.Hakiruwizeye Samuel 2h36’33”

Munyaneza Didier wegukanye shampiyona y’u Rwanda ya 2018 akaba yari yasoje  ku mwanya wa kabiri mu ntera ya mbere y’isiganwa ritegura Tour du Rwanda 2018 yitwaye neza yegukana intera ya kabiri y’isiganwa ryo gutegura Tour du Rwanda 2018.

Munyaneza Didier umwe mu bakinnyi b’u Rwanda bashobora kuzitwara neza muri Tour du Rwanda 2018

Tariki 21 na 22 Nyakanga 2018 habaye isiganwa ryitabirwa n’abakinnyi 19 bari mu mwiherero wo kwitegura Tour du Rwanda 2018 izaba tariki 05 kugeza 12 Kanama 2018. Intera ya mbere ya Musanze-Rutsiro-Karongi yakinwe tariki 21 Nyakanga 2018 yegukanywe na Nsengimana Jean Bosco wegukanye Tour du Rwanda 2015 yakurikiwe na Munyaneza Didier bombi bakinira  ikipe ya Benediction.

Ku munsi wa kabiri tariki 22 Nyakanga 2018 aba bakinnyi bahagurutse Karongi baca Rutsiro basoreze i Rubavu (95,1 km). Munyaneza Didier ufite imyaka 22 y’amavuko ni we wegukanye iyi ntera aho yakoresheje amasaha 2, iminota 33 n’amasegonda 41 yakurikiwe ku mwanya wa kabiri na Nsengimana Jean Bosco wari wegukanye intera ya mbere naho ku mwanya wa 3 haza Byukusenge Patrick. Aba bakinnyi bose bakaba bakinira ikipe ya Benediction.

Mu bakinnyi 19 bagomba gukina, Hakizimana Didier nta bwo yahagurukanye n’abandi kuri iyi ntera ya kabiri naho, Gasore Hategeka na Ruberwa  ntibabasha gusoza.

Izi ntera zakinwe zikaba ari zimwe mu nzira nshya  zizakoreshwa muri Tour du Rwanda 2018. Musanze-Rutsiro-Karongi izaba ari intera ya 4 izakinwa tariki 08 Kanama 2018 naho Karongi-Rutsiro-Rubavu izaba ari intera ya 5 izakinwa tariki 09 Kanama 2018.

Umwanditsi:

BUGINGO FIDELE

Tanga Igitekerezo

Email yanyu ntigaragazwa ku rubuga. Amazina na Email ni ngombwa.