Mugabo C John ‘uvugana n’Imana’ yeruye byinshi ku ‘marozi ya Ntagwabira’

Yanditswe na Nshimyumukiza Janvier Popote

Ku ya 22-02-2019 saa 19:07:21
Mugabo C John aganira n'Imvaho Nshya ku bukilisitu n'ibyo azi ku mikoreshereze y'amarozi muri football

Mugabo C John ni urugero rwiza rw’umuntu wavuye mu isayo y’ibyaha akagandukira Imana. We mu magambo ye bwite ahamya ko yabaye ‘icyaremwe gishya’.

Avuga ko nyuma yo kwivuruguta mu byaba binyuranye birimo ubusambanyi, ubusinzi n’ibiyobyabwenge birimo urumogi, Imana yamwiyeretse mu bihe bitandukanye, bagirana ibiganiro mu KINYARWANDA.

Uyu mugabo w’imyaka 43 y’amavuko, magingo aya ni umuhanzi w’indirimbo zihimbaza Imana, aho asengera mu itorero rya East Winds (Agape Love Church) riherereye mu Murenge wa Niboye mu Karere ka Kicukiro.

Indirimbo ye igezweho yitwa ‘Wambereye mwiza’. Ni imwe mu zo ahamya ko atari we uzitekerereza, ahubwo ngo ni Imana imuha ibyo aririmba akabiririmba ntacyo ahinduyeho.

Mugabo yavukiye mu muryango w’Abakilisitu Gatulika, aza gutera umugongo ‘Kiliziya’ ayoboka ‘Umusigiti’, ariko hanyuma na Isilamu ayivamo, amara imyaka 3 mu bupagani.

Mu mwaka wa 2003, nk’uko abisobanura, ni bwo yavuye muri Isilamu, aza gutangira gusenga mu Itorero rya Bethel riri i Remera mu Mujyi wa Kigali  mu mwaka wa 2006, agenda yiyegurira Yesu gake gake.

Avuga ko ubwo yinjiraga mu bukilisitu, iteka yumvaga ashaka ko Imana imwiyereka akayibona n’amaso ye nk’uko abona abantu n’ibintu, ibintu bitigeze bibaho, ariko ngo BARAVUGANYE.

Mugabo asobanura ko avugana n’Imana akumva ijwi ryayo bwa mbere, yari yajyanye i Rubavu n’Ikipe ya ATRACO FC yari abereye team manager (ushinzwe imibereho y’abakinnyi).

Ngo yari muri Hotel Serena mu gitondo, amaze iminsi mu masengesho asaba Imana kumwiyereka, abona umuyaga uhuha cyane mu biti biri imbere ya hoteli, ugurukana n’ibintu mu muhanda ugana Grande Barrière. Hari mu mwaka wa 2006.

Avuga ko atabitinzeho, yagize ngo ni ibisanzwe ku kiyaga  cya Kivu kuko atari amenyereye kujya aho hantu, ariko akabona uwo muyaga urenze uwo yabogana mu Kiyaga cya Victoria muri Tanzania, aho yakuriye.

Asobanura ko icyamutangaje kigasa n’ikimuteye n’ubwoba, ari ukuntu umuyaga wahushye no mu Kiyaga cya Kivu cyari imbere ye, amazi atangira kubirindura.

Uwo muyaga ngo warahushye cyane, hashize akanya urahagarara, ubundi aho yari yicaye kuri ‘balcon’ (urubaraza) uhuha uturutse inyuma mu cyumba cye, ari bwo yumvise ijwi ry’Imana.

Ati, “Numvise umuyaga mu cyumba usa n’urimo guterura amashuka, mu mutwe wanjye ntangira kwibuka ko maze iminsi ibiri mpamagara Imana.”

Yibajije ukuntu umuyaga uvuye mu mazi y’ikiyaga ukimukira mu cyumba cye kandi umuryango w’imbere w’icyumba yasize awufunze, yibaza inkomomo yawo biramuyobera, atangira gutekereza ko ari Imana ishaka kumwiyereka.

Ati, “Imiryango yose yari ifunze usibye uwo nguwo nari ndiho, ntangira kwibaza nti ibintu birimo kuba hano hirya mu cyumba gikurikiyeho birimo biraba? Mu kureba aho nabashije kugeza amaso, mbona hose haratuje.

Ntangira kwibaza nti Imana ndayibona nte? Iraza se mu gicu nk’uko nayisomye? Iraza se mu nkingi y’umuriro? Ntangira noneho gukanura amaso. Nagiye kubona mbona rido (rideau) y’ibumoso inyuma yanjye ivuyeyo.”

Mugabo avuga ko yari yafunguye amarido, atangazwa no kubona umuyaga uhuha rido y’iburyo n’iy’ibumoso zihurira imbere ye zikora urukuta ku buryo atabashaga kureba imbere.

Ati, “Uzi icyabaye? Nagiye kumva numva ijwi MU KINYARWANDA, numva Imana iravuze ngo urabona iki? Nti ni umuyaga. Iti urabona umuyaga? Nti yego. Iti subiramo, urabona iki? Nti umuyaga. Imana insubirishamo, ariko nanjye ndimo ndatekereza cyane, ntangira kwiyumvisha ko nta muyaga ndimo mbona, nti ndabeshye. Ese koko umuyaga ndawubona? Iti urabona umuyaga? Nti oya nta muyaga mbona, iti urabona iki? Nti ndabona ibikorwa by’umuyaga. Iti wabonye iki? Ndatangira mbisubiramo akantu ku kandi.”

Mugabo avuga ko ubwo yabwiraga Imana ibyo yabonye kuva kuri wa muyaga wahuhaga cyane mu biti no mu kiyaga kugeza ku gitangaza cy’amarido, yarimo ahinda umushyitsi.

Asobanura ko icyamutangaje cyane ari ukuntu amarido yihurije imbere ye akahaguma kandi nta kiyahafatiye kigaragara, hanyuma akaza kuvaho agasubira mu mwanya wayo, ari bwo ngo Imana yamuvugishije.

Ngo Imana yaramubajije it, “Imana ushaka kubona ni iyihe? Iti nimba ubona ibikorwa by’umuyaga ukabyitirira umuyaga nkagusubirishamo inshuro nyinshi ukavuga ngo ubonye umuyaga kandi atari wo wabonye wabonye ibikorwa byawo, ni gute njyewe Imana yawe, imbwira mu Kinyarwanda, nkora ibikorwa birenga, iratangira (irabinyibutsa), ndavuga nti Mana rekera aho…”

Mugabo avuga ko aho ari ho yabatirijwe mu mwuka, akavuga ko iyo ari imwe mu nshuro Imana yamuganirije mu Kinyarwanda, bityo ibyo gushidikanya ku kubaho kwayo bimushiramo.

Ati, “Aho ni ho natangiye kuvugira mu mwuka, indimi za mbere nazivugiye muri hoteli, aho ni ho naboneye Imana mu buryo budasanzwe. Iyo nkubwira ngo nshobora kuvugana na yo Vis-à-vis (imbonankubone) ntugire ngo ndagenda nkayiha censi, nkayihobera nkayiha pushi cyangwa tugahoberana tugahuza imisaya, oya…”

Abajijwe niba ataratekereje ko yaba ari n’umuntu uri kumuvugisha ari inyuma ye mu cyumba, yavuze ko bidashoboka kwitiranya ijwi ry’Imana nk’uko utakwitiranya imodoka za Perezida.

Ati, “Ujya ubona imodoka za Perezida? Wowe ubwawe ntuba mu bajepe ntuba no mu bapolisi, ariko uzi kuzitandukanya n’iz’abaminisitiri. Ntibishoboka rero ko Imana yaza ngo (uyiyoberwe).”

Mugabo avuga ko mu byamuhamirije imbaraga z’Imana, ari uko umuyaga wahushye mu cyumba akagira ngo wagurukanye n’amashuka kubera ingufu wahuhanaga, ariko yajya kureba agasanga buri kintu kiri aho cyari kiri.

Ati, “Aho nasize telefoni yanjye ni aho (nayisanze), izo ntambara zose zabaye, utugomba kuba mu mwanya watwo twagumye mu mwanya watwo, icyo kinyemeza ko Imana yacu atari Imana y’umuvurungano ahubwo ni Imana ya gahunda.”

Avuga ko mu bikorwa akora uyu munsi mu itorero rya East Winds byo kuramya, kuvuga mu ndimi, kubwiriza ubutumwa, ibyamubayeho icyo gihe i Rubavu bikomeje kumubera impamba.

Iby’amarozi yakoreshwaga n’umutoza Jean Marie Ntagwabira

Ubwo iryo bonekerwa ryabaga, Mugabo yari team manager (ushinzwe imibereho y’abakinnyi) wa ATRACO FC, mu gihe nyakwigendera Jean Marie Ntagwabira yari umutoza mukuru w’iyo kipe.

Mugabo avuga ko Ntagwabira yiyambazaga amarozi mu gushaka intsinzi, ibintu byanavugwaga ubwo uyu mugabo watoje ATRACO, APR FC, Rayon Sports na Kiyovu Sports yari akiriho.

Mu buhamya bwa Mugabo, avuga ko nk’umuntu wakoranaga umunsi ku munsi na Ntagwabira iby’amarozi ye yabibonaga, akavuga ko mu barozi yiyambazaga harimo umugore wa Kinyinya mu Karere ka Gasabo witwa Hajati, uwitwa Mwalimu w’i Kinshasa muri Congo, uwo muri Maroc n’uwo baje kubana mu nzu aho yari atuye kuri Godiyari yitaga Mzee wo muri Tanzania.

Iryo bonekerwa ry’i Rubavu ngo ryafunguye amaso ye y’umwuka ku rwego rukomeye, ku buryo bitamugoraga kumenya ko umukino runaka urimo amarozi cyangwa atarimo ndetse n’uyu munsi ngo areba match agahita abibona.

Avuga ko no mu buzima busanzwe utamwishushanyaho kabiri gatatu atarakuvumbura. Ngo Imana ihita ibimwereka. Ati, “Nkugizeho ikibazo, mpita njya gusenga, biroroshye cyane, ibyawe mpita mbibona uko byakabaye.”

Mugabo avuga ko mu gihe cy’imyaka hafi ibiri yamaze ari team manager wa ATRACO FC, yabonye ibintu byinshi bijyanye no kwiyambaza “imbaraga za sekibi” ku mutoza Jean Marie Ntagwabira.

Uko amarozi yakoreshwaga muri ATRACO FC

Mugabo avuga ko mu gihe yamaranye na Jean Marie Ntagwabira muri ATRACO FC, yabonye byinshi byamuhamirije ko Satani na we afite ingufu.

Nubwo Ntagwabira yakoreshaga ayo marozi ariko, ngo ntiyabikoraga kubera urwango cyangwa ikindi, ahubwo ngo yabiterwaga n’ishyaka yagiriraga ikipe ye ryatumaga ahora anyotewe insinzi.

Ati, “Imana ishimwe ko Jean Marie yakijijwe (mbere yo kwitaba Imana). Yari umugabo ukunda insinzi ku rwego rwo kuba yatanga ubuzima bwe, njyewe narabimukundiraga pe, ariko uburyo iyo nsinzi yashakwaga byari biteye agahinda.”

Avuga ko byamubereye ibibazo gukorana n’umuntu wizerera mu marozi kandi we ari umukozi w’Imana, akabifata nk’ikigeragezo yari ahuye na cyo, ati “Nabayeho ku bwo gusenga nijoro” kuko nta kazi ikipe igira nijoro “keretse abo batoza babaga bapanga ibyabo bidasobanutse.”

Yunzemo ati, “Amasaha yanjye menshi ntiyari ayo kuryama, yari ayo gusenga kandi uko nasengaga ni ko Imana yanyerekaga ibirimo kuba, ahubwo nzashaka umwanya mfate amafaranga, ibi bintu mbikoremo documentaire (inkuru mbarankuru).”

Mbere yo kwinjira muri ATRACO FC, Mugabo yakogara muri gare y’i Remera, aho yahembwaga ibihumbi 15 ku kwezi, ashinzwe ibijyanye n’umutekano muri iriya gare yo mu Giporoso yacungwaga na ATRACO.

Nubwo yahembwaga amafaranga ibihumbi 15 ariko, yabaga mu nzu y’amafaranga ibihumbi 35. Andi yavagahe? Muri ruswa n’izindi nzira zitemewe, nk’uko yabibwiye Imvaho Nshya.

Uko yagendaga yigarurira Imana ariko atarayisobanukirwa neza, ngo yayisabye kumuha akazi kamuhemba nibura ibihumbi 50 ku kwezi ubundi akareka ruswa kuko yayifataga nk’icyaha ariko akibaza uko yatungwa n’ibihumbi 15 bikamubera iyobera.

Icyo gihe, ruswa yari isoko y’amafaranga yamubeshagaho, ariko uko yinjizaga menshi akaba ari na ko ayasesagura, ku buryo ngo yigeze gusohokana n’umukobwa barya amafaranga ibihumbi 300 mu minsi ibiri, bukeye nyir’inzu aza kumwishyuza ikode araribura, kuva ubwo yanzura kuva ku nzoga kuko ngo yari yaraye anyoye inzoga nyinshi.

Mugabo avuga ko muri ibyo bihe yagiye mu masengesho asaba Imana kumutunga mu gihe yaba aretse ruswa, asoje amasengesho atungurwa no kubona ubuyobozi bukuru bwa ATRACO bumugira team manager.

Umushahara w’ibihumbi 50 yasabaga Imana ngo areke ruswa, bawukubye inshuro avuga ko zitabarika, kuri ibyo hakiyongeraho n’imodoka imutwara, ibintu avuga ko ari Imana yumvise gusenga kwe.

Icyamutangaje ni uko nyuma gato yo kugirwa team manager wa ATRACO FC, wa mushahara yasengeraga w’ibihumbi 50 wahawe abo bakoranaga muri gare, ibyo na byo, kuri we, bigashimangira ko gusaba Imana atari ugucurangira abahetsi.

Ageze muri ATRACO FC, nk’umuntu wari ushinzwe guhuza abatoza na ba nyir’ikipe ndetse akita ku mibereho y’abakinnyi, avuga ko muri ubwo buzima yahuriyemo n’ibigeragezo bya ruswa ndetse z’amafaranga menshi ndetse ahura n’ibibazo by’imikoreshereze y’amarozi mu ikipe.

Uko Jean Marie Ntagwabira yajyaga mu barozi byose ngo yarabibonaga nubwo yabanje kubimuhisha, ariko ubwo yasangaga igikeri muri lavabo byabaye ngombwa ko Jean Marie amwerurira ko gutsinda bisaba kwiyambaza imbaraga zidasanzwe.

Mugabo avuga ko umunsi umwe yaje agasanga igikeri muri lavabo y’umweru aho babaga muri ‘local’ ku Isano i Gikondo i Mburabuturo, yibaza uko cyayigezemo, asabye umukozi wabakoreraga kugikuramo aragitinya.

Avuga ko yabajije uwo mwana impamvu afite ubwoba bwo kugikuramo, umwana abanza kwanga kumusobanurira, undi akomeje kumubaza amubwira ko cyazanwe na ‘coach mukuru’ (Ntagwabira Jean Marie). Icyo gihe Jean Marie yari yungirijwe na Ruremesha Emmanuel.

Undi munsi ngo Jean Marie yamubwiye ko afite inshuti yo muri Maroc igomba kubasura, aramubwira ati nta kibazo naze, atazi ko ari umurozi uje mu kazi.

Muri ibyo bihe byo gushaka insinzi hiyambajwe abarozi, Mugabo avuga ko we atari ashyigikiye abaroga ariko ko byabaye ngombwa ko abyinjiramo kugira ngo amenye neza uko byakorwaga.

Ati, “Byabaye ngombwa ko Jean Marie atumiza umwarabu, amwishyurira indege, amwishyurira hoteli, arambwira ati akunda kumfasha kandi urabizi dushobora kujya muri biriya bihugu by’abarabu gukinayo bityo reka tumwakire neza nta kibazo, cyane ko ntari businyire amafaranga yo kumutunga.

Kugira ngo rero menye ko ari umurozi, twebwe twagiye gukina tumusiga aho, kugaruka yari yatashye, ntiyongeye kurara ariko abashinzwe isuku mu Isano, nahasanze intambara, ndababwira nti nyamuneka ntimugire umuntu wundi mubibwira, bigarukire kuri njye mubibwiye, ikindi ingaruka zose byateje muzimbaze, niba ari icyishyurwa ndacyishyura niba ari isuku mwakoze idasanzwe ndayishyura.”

Mugabo avuga ko yaje bamubwira ko uwo Munyamaroc hari ibintu yatwikiye mu cyumba, byinshi cyane, harimo urupapuro n’uruhu, ati, “Ibyo baranabinyeretse, nti ibi mwabikuyemo hariya? Bati yego, nti mu cyumba cy’uriya mwarabu? Bati yego.”

Mugabo avuga ko icyo kintu cyamubereye ihurizo rikomeye, amenya ko uburozi bukoreshwa na ATRACO FC bugeze ku rwego rwo hejuru “niba basigaye barenga imbibi z’u Rwanda bakajya kuzana abarozi b’Abarabu.”

Avuga ko yakomeje kwiyegereza Jean Marie ngo akomeze akusanye ibimenyetso, cyane ko yasengaga Imana ikamwereka ko hari ibintu bibi birimo kuba ikanamwizeza kujya ibimwereka.

Abajijwe niba koko kuroga byaratumaga batsinda, yagize ati, “Yego, birakora, Satani afite igice akoramo akagaragaza ibikorwa bye.”

Mu gukurikirana amakuru ngo amenye byimbitse uko uburozi bwakoreshwaga, Mugabo avuga ko yiyegereje cyane Jean Marie, akamwigiraho inshuti “ubundi atangira kujya yitaba telefoni avugana n’abo barozi turi kumwe”.

“Batangiye kujya bajya muri ibyo bintu turi kumwe, banyiyumvamo uko tugenda dutindana, uko banamenya ko namenye ibyo bintu, nta kiramira kuko kadogo (wa mwana wanze gukura igikeri muri lavabo) uko biri kose yarabibabwiye.” Ngo hari muri 2007.

Mbere y’uko amenya ko Jean Marie arogesha, ngo yakundaga kumubwira ngo yarose, akaba yamubwira ko yarose batsinze nka 3-1, kandi koko bikaba, hanyuma aza kumenya ko atabaga yarose koko ahubwo yabaga yabibwiwe n’abarozi yiyambaje kuko ngo bakubwiraga ibitego muza gutsinda mbere y’umukino.

Abajijwe niba yarigeze agira inama Jean Marie yo guhagarika ibyo kwiyambaza abarozi, Mugabo yavuze ko bigeze kwicara arabimusaba, cyane ko ngo bari batangiye kumubwira ko na we akwiye kujya atanga uruhare rwe rw’amafaranga ngo haboneke ayo kugura insinzi.

Ati, “Bashakaga ko niba ari ugutanga amafaranga dufatanye, nimba ari ugutegura match dufatanye, kuko iyo twamaraga gutsinda nanjye nabonaga prime (agahimbazamusyi) kandi bo bagafata ku mafaranga yabo bagatanga bishyura abantu babafashije, njyewe ngafata Bibiliya ngashima Imana nkitahira.”

Mu bimenyetso Mugabo avuga yakusanyije bigaragaza uburozi bwakoreshwaga na ATRACO FC, avuga ko harimo n’ibishobora kuba bibitswe muri FERWAFA niba barafashe amashusho.

Avuga ko yibuka neza ko hari match bakinnye na Rayon Sports bayitsinda kimwe ku busa, babona insinzi bayikesheje ‘Mwalimu’ w’i Kinshasa waroze Jimmy Kidega wa Rayon. Gusa ntiyibuka neza igikombe bahataniraga niba ari Shampiyona cyangwa icy’Amahoro.

Nk’uko Mugabo abisobanura, mbere y’uwo mukino wabereye kuri Stade Amahoro, Jean Marie Ntagwabira yasabye abakinnyi bose kwirinda kunywa inzoga no kubonana n’abagore batari ababo. Ayo mabwiriza ngo yayabahereye i Shyorongi mu myitozo ya nyuma, Mugabo atangira kwibaza niba Jean Marie yakiriye agakiza kuko yumvaga ari inama nziza za kirokore.

Uko byaje kugenda rero, Manfred Kizito ngo yasabye uruhushya rwo kujya hanze, Jean Marie ararumuha, agezeyo anywa inzoga, bituma ‘umuti’ wa Mwalimu upfa, bisaba kumwongera amafaranga ngo aroge Kidega bakinaga ku mwanya umwe.

Mugabo avuga ko ubwo bavaga kwishyushya (muri echauffement) bitegura gucakirana na Rayon Sports, Jean Marie yabasanze mu rwambariro yarakaye cyane afite umujinya w’umuranduranzuzi.

Ngo yabanje gusohora abayobozi bakuru afunga umuryango, ubundi abazanya umujinya abakinnyi uwanyoye inzoga, bose baraceceka, abaza niba nta mukinnyi wasohotse bamubwira ko Manfred Kizito yagiye hanze akagaruka hashize nk’amasaha ane, ariko bitewe n’uko yamwizeraga yumva ataba ari we warenze kuri ayo mabwiriza.

Ngo yahamagaye Mwalimu, Mwalimu amubwira ko uwanyoye inzoga ari muri 11 babanza mu kibuga, Jean Marie abwira abakinnyi ko uwazinyoye nativuga biza kumugiraho ingaruka zikomeye, bose baraceceka, ahamagara wa murozi wundi babanaga mu rugo (Mzee wo muri Tanzania) amusaba ubufasha, undi ngo amubwira ko we uburozi yakoresheje ari ubutuma hatagira ubangamira ikipe mbere y’uko match igera, naho ibyo mu kibuga muri match agomba kubivugana n’uwo murozi wundi wa Kinshasa.

Jean Marie ngo yabajije uwa Kinshasa (Mwalimu) uko akwiye kubyitwaramo, undi amubwira ko ashobora kubahesha insinzi ariko bakamwongera amafaranga atari munsi y’ibihumbi 400.

Jean Marie ngo yabajije Mwalimu uwanyoye inzoga, Mwalimu amuhishurira ko ari Manfred Kizito, Jean Marie ararakara cyane, undi “isoni zihita zimufata, ahita araba, ahita abyemera”

Nk’uko Mugabo akomeza abisobanura, Mwalimu yabajije Jean Marie niba ashaka ko akura Manfred Kizito mu kibuga, undi amubwira ko bikunze yamureka agakina, Mwalimu amwizeza ko ntacyo bitwaye, ko aza guteza ibibazo umukinnyi wa Rayon bakina ku mwanya umwe.

Mugabo ati, “Ijisho ryanjye nahise ndikanura. Mwalimu yaravuze ngo umukinnyi bakina ku mwanya umwe araza guhura n’ibibazo. Ntabwo yavuze ngo ni Kidega ariko uwo bakina ku mwanya umwe nari muzi.”

“Twageze mu kibuga ifirimbi iravuga, twaratatswe cyane mu minota 10 ya mbere ndavuga nti (turapfuye), ariko uko umukino urangira twavuye mu rwambariro Mwalimu yabitubwiye, ko ari igitego kimwe (ku busa).”

“Ku munota wa 10 uzi icyabaye? Batanze ‘centre’ iva ku ruhande rwa Rayon Sports, Peter Kagabo arazamuka, Kidega na we arazamuka, ntibari begeranye, hagati yabo harimo hafi metero, wenda uwari kurambura ukuboko yari gukora kuri mugenzi we ariko nta wakurambuye. Umupira ntiwatewe na Kidega, watewe na Peter kuko Kidega ntiyawukozeho ariko aramanuka aragwa, aguye amaraso ava mu mazuru no mu kanwa, nararebaga gutya!”

Mugabo avuga ko abaganga baje bamukura mu kibuga bajya kumwitaho, mu kanya agaruka mu kibuga ariko ataranafata umupira acika intege, amanuka buhoro buhoro, aricara, amaraso atangira kuva mu kanwa no mu mazuru, noneho ava no mu maso, bamukura mu kibuga ngo bamujyana ku bitaro bya King Faisal.

Mugabo avuga ko Jean Marie yahujwe na Mwalimu na Patrick Mafisango na we wakinaga muri ATRACO FC, uyu na we akaba ngo yarakoreshaga amarozi ndetse agakeka ko na Mugabo aroga.

Mugabo avuga ko mbere y’uko Mafisango yitaba Imana muri Gicurasi 2012, baganiriye, Mafisango amubwira ko iby’amarozi biba bikenewe, ndetse amubwira ko ari we wahuje Mwalimu na Ntagwabira.

Mafisango ngo yamubwiye ko igihe yakiniraga ATRACO, hari ubwo yigeze kujya kurogesha kwa Mwalimu asaba igikundiro kuko yari umukinnyi mukuru ariko yari atangiye kwicazwa n’abana bato, Mwalimu amubwira ko azakundwa ariko ko bitoroshye ko akundwa n’abayobozi bose kuko harimo umwe na we ukoresha imbaraga zidasanzwe (Mugabo).

Mugabo avuga ko Ntagwabira na Mafisango batekerezaga ko na we ari umurozi ndetse ukaze, ariko we akaba azi neza ko ibyo akora byose abikoreshwa n’Imana yo mu ijuru yemeye ko imubera umwami n’umukiza w’ubuzima bwe.

Mugabo avuga ko mu bintu ashimira Imana ari uko mbere yo gupfa kuwa 3 Gashyantare 2015, Jean Marie yari yaravuye mu gukoresha imyuka ya Satani arabatizwa aba umugaragu w’Imana.

Jean Marie wari warabatijwe muri Gatulika, yabatijwe mu mazi magari kuri Noheli yo mu mwaka wa 2014.

Ntagwabira yabatijwe mu mazi magari hamwe n’abandi, kuwa 25 Ukuboza 2014, nyuma yo kwakira agakiza, ibintu Mugabo avuga ko bishimishije cyane kuba Ntagwabira yaravuye kuri iyi Si amaze kwiyegurira Imana. Ifoto/Inyarwanda.

Ku myaka 41 y’amavuko, uyu mugabo wabaye umutoza w’ikirangirire yaje kugwa mu Bitaro bya King Faisal azize uburwayi. Yari asigaye ari Directeur Technique muri Sunrise FC.

Mugabo avuga ko kuba Ntagwabira yari yarakiriye agakiza ari ibintu byiza cyane, agasaba n’abandi batoza bakoresha amarozi gutera ikirenge mu cya Ntagwabira kuko ngo afite amakuru ko hari benshi bakiri mu bubata bw’izo mbaraga yita iza sekibi.

Reba videos z’ikiganiro twagiranye na Mugabo C John, gikubiyemo ubuhamya bwe.

Umwanditsi:

Nshimyumukiza Janvier Popote

3 Comments on “Mugabo C John ‘uvugana n’Imana’ yeruye byinshi ku ‘marozi ya Ntagwabira’”

  1. NDIFASHE! MUGABO BAMUCUNGIRE HAFI. NONE SE KO YAVUZE KO ATAHURA BYIHUSE AMANYANGA AKORWA NUNDI MUNTU, NKABA MBONA AHUBWO BIMUSABA KUNEKA UWO AKEKAHO IKINTU STEP BY STEP NKUKO BYAGAKOZWE NUTARI UMUHANUZI CG UMUNYAMWUKA? METHODE YAKORESHEJE KU KUNEKA JEAN MARIE IRI VERY CLASSIC NOT AT ALL SPIRITUAL ONE. SO, IBYO YITA UMWUKA UTANGJE NI IBIHE?HANYUMA YABONANYE N’IMANA AYIBWIRA UBUSA BW’UMUYAGA GUSA? IMANA KWELI?

  2. Jean Marie rwose yari umutoza mwiza ariko na mbere akiriho iby’amarozi yabivuzweho cyane ndetse yaje no kubyiyemerera ubwo yakizwaga akabatizwa. Naho Mugabo wowe ibyo by’imyuka byo rwose nabyemera ari uko nanjye bimbayeho, njye sindavugana n’Imana pe ariko ndayemera, nanjye izamvugishe mu Kinyarwanda numve. Gusa birashimishije niba waravuye mu byaha ukaba uri umukirisitu uhamye. Hanyuma biriya numvise muri video uvuga ngo n’intungane bwira icumuye karindwi, ukavuga ko bitari muri Bibiliya, nanjye nari nzi ko birimo, ndaje mbishake ariko nzi ko birimo nubwo ntibuka neza aho byanditse

  3. Ko numva bitoroshye ra, Mugabo kuki wavuye muri Bethel ukajya muri East Winds? Ese kuva mu itorero rimwe ukajya mu rindubona haricyo byongera ku bukilisitu bwumuntu?

Tanga Igitekerezo

Email yanyu ntigaragazwa ku rubuga. Amazina na Email ni ngombwa.