Kigali-Rwanda

Partly cloudy
19°C
 

Mu turere dushyuha barasabwa gukaza ingamba zo kurwanya malariya

Yanditswe na Mutungirehe Samuel

Ku ya 27-12-2018 saa 13:42:09
Mu turere tw'Intara y'Iburasirazuba n'Amajyepfo hazongera guterwa umuti wica imibu ikwirakwiza marariya umwaka utaha, 2019 guhera Werurwe

Ikigo k’Igihugu cy’Ubuzima (RBC) kirasaba abatuye Intara y’Iburasirazuba n’Amajyepfo gukaza ingamba zo kurwanya no gukumira imibu itera marariya.

Iyo mibu ikundwa kwigaragaza mu gihe cy’umuhindo kirangwa n’imvura ivanze n’imicyo, nk’uko bitangazwa na Aimable Mbituyumuremyi ushinzwe ishami ryo kurwanya malariya muri RBC.

Mu kiganiro n’Imvaho Nshya, Dr. Mbituyumuremyi yavuze ko muri rusange malariya iri hejuru mu Rwanda ariko ijya iba nyinshi mu turere tw’Iburasirazuba n’Amajyepfo bitewe n’imiterere yaho.

Ati “Bitewe n’uko malariya ikwirakwiza n’imibu, imibu yororoka cyane ahantu hashyushye hari n’amazi yaretse adatemba. Ibyo bintu byombi, by’ubushyuhe n’amazi adatemba bikurura imibu mu Burasirazuba n’Amajyepfo ariko noneho bikiyongera nyuma y’umukamuko kubera ko amazi aba yararetse ahantu henshi noneho hatangiye kugenda hava izuba rituma imibu yororoka vuba.

Bivuga rero ko kwiyongera kwa marariya bishobora kuba cyane mu turere tw’Uburasirazuba kurusha wenda mu Majyaruguru, bitewe n’uko hakonja bigatuma imibu itororoka.”

Dr. Mbituyumuremyi akomeza avuga ko ibyo bituma abarwara malariya usanga imibare myinshi igaragara mu Burasirazuba n’Amajyepfo gihe cy’umukamuko w’imvura nko mu mpeshyi na nyuma.

Ati: “Ubutumwa bwa mbere ni ubw’uko hari amezi yo kwiyongera kw’imvura, amezi ari mu gihe cy’umukamuko w’imvura ariko by’umwihariko Iburasirazuba n’Amajyepfo.”

Ku ngamba zihariye mu turere nk’utwo tugaragaramo malariya mu gihe cy’umukamuko w’imvura, Dr. Mbituyumuremyi avuga ko hasanzwe hariho ingamba rusange ku baturage bose mu gihugu nko gushishikariza abantu kurara mu nzitiramibu buri gihe kandi iteye umuti, gutema ibihuru hafi y’ingo no gusiba ibinogo byarekamo amazi bigatuma imibu itera malariya ibona aho yororokera no kwivuza hakiri kare ku bagaragaje ibimenyetso byayo.

Iyo bigeze ku turere izwiho cyane, Minisiteri y’Ubuzima itera imiti yica imibu itera marariya mu ngo aho icyo gikorwa cyakozwe mu Burasirazuba i Nyagatare na Kirehe mu kwezi kwa Nzeri n’Ukwakira 2018, mu kwezi kwa Gashyantare na Werurwe hatewe umuti wica imibu mu karere ka Gatsibo, Gisagara na Bugesera bityo hakaba hazongera guterwa umuti mu kwezi kwa kabiri n’ukwa gatatu 2019 muri utwo turere twose, hakiyongerago Huye na Nyanza, Ngoma, Kayonza na Rwamagana.

Dr. Mbituyumuremyi ati “Ibyo ni ibigamije kugira ngo duhangane n’iriya mibu myinshi mu turere bigaragara ko tuba tuzahaye kurusha utundi, aho inzitiramibu zonyine ziba zidahagije ndetse bakunganirwa n’umuti uterwa mu nzu.”

Ku bijyanye n’abarwayi ba marariya y’igikatu, Dr. Mbituyumuremyi avuga ko imibare ya Minisiteri y’Ubuzima igaragaza ko no muri utwo turere dushyuha ikunze kuba nyinshi, uko abantu bandura ari benshi bituma hari abazahazwa nayo batarajya kwa muganga nubwo ari bake.

Ati “Ariko twavuga ko iyo mibare aho kugira ngo izamuke ahubwo yagiye imanuka cyane muri iyi myaka ibiri ishize, kubera ingamba zashyizweho zirimo kuvurira abaturage mu midugudu bikozwe n’abajyanama b’ubuzima.

Nubwo marariya yakwiyongera muri rusange ariko abazahazwa nayo umubare wagiye ugabanukaho hafi ku rugero ruri hejuru ya 40% kuva muri 2016. Byerekana ko abantu iyo babonye imiti hakiri kare ku midugudu, bakivuza kare marariya y’igikatu itabasha kubageraho.”

Akomeza avuga ko imfu zituruka kuri marariya nazo mu myaka itatu ishize zagabanutseho hafi 43%, nabyo bigizwemo uruhare n’abajyanama b’ubuzima mu midugudu.

Mu bisanzwe umuntu wese agize aho ahurira n’umubu w’ingore utera marariya wa “Anophele” ukamuruma ushobora kumusigamo udukoko dutera marariya, ikazahaza by’umwihariko abana bari munsi y’imyaka itanu n’abagore batwite kubera ubudahangarwa buke bw’imibiri yabo.

Mu turere tw’Intara y’Iburasirazuba n’Amajyepfo hazongera guterwa umuti wica imibu ikwirakwiza marariya umwaka utaha, 2019 guhera Werurwe

Umwanditsi:

Mutungirehe Samuel

One Comment on “Mu turere dushyuha barasabwa gukaza ingamba zo kurwanya malariya”

  1. Izi ngamba zizadufasha guhashya malariya .
    Turashimira uruhare runini abajyanama bUbuzima bagira mu kuvura no kurwanya malariya .

Leave a Reply to MUTUYIMANA Lydia Cancel reply

Email yanyu ntigaragazwa ku rubuga. Amazina na Email ni ngombwa.