20°C , Partly sunny | Kigali-Rwanda

Mu myaka 25 twahereye ku busa tugera ku bikorwa – Kagame

Yanditswe na Twagira Wilson

Ku ya 15-01-2020 saa 08:59:29
Umukuru w'Igihugu Paul Kagame, uwa 2 uvuye ibumoso, mu nama mpuzamahanga ku iterambere rirambye yabereye mu mujyi wa Abu Dhabi, yagaragaje uko u Rwanda rwiyubatse mu myaka 25 ishize haherewe ku busa

Perezida Paul Kagame avuga ko mu myaka 25 ishize Abanyarwanda bahereye ku busa, kandi bagera ku bikorwa bivuye ku busa, asanga ibyo byarashobotse bishingiye ku gushyira hamwe no kujya inama ku cyakorwa mu birebana no gukemura ibibazo birebana n’iterambere rirambye, ibidukikije, iterambere rishingiye ku bukungu n’imibereho myiza y’abaturage, irishingiye ku ituze ndetse  n’umutekano w’Abanyarwanda muri rusange.

Ibyo bikubiye mu butumwa Umukuru w’Igihuu yatangiye muri Leta zunze ubumwe z’Abarabu mu nama mpuzamahanga ku iterambere rirambye irimo kubera mu mujyi wa Abu Dhabi. Mu kiganiro yatangiye muri iyo nama cyagarutse ku ngingo ku hazaza ku iterambere rirambye, aho yagarutse cyane aho u Rwanda ruhagaze ku kugera ku ntego z’iterambere rirambye mu gihugu.

Kagame ati “U Rwanda mu myaka 25 ishize rwatangiriye ku busa, hagira igikorwa muri icyo gihe, erega byose byashobotse bitewe nuko Abanyarwanda bicaye bakajya inama mu rwego rwo kureba icyakorwa, turavuga ngo ntacyo twabura kandi turahari, kandi buri wese agatanga umusanzu wafasha guteza imbere igihugu ndetse no ku giti ke.”

Ku ngingo irebana no kurengera ibidukikije, Perezida Kagame yabwiye abayobozi bari muri iyo nama mpuzamahanga ku iterambere rirambye, ko Abanyarwanda bakoze uburyo bwose bushoboka bashoboraga gukoresha mu kwiteza imbere ariko bidasabye amikoro ahambaye, agaruka ku ngero zo guca ikoreshwa ry’amasashi mu gihugu n’icyayasimbura.

Umukuru w’Igihugu ati “Gukora byatanze amahirwe y’ishoramari, ubucuruzi, n’ibikorwa by’ubukungu byafashije gusimbura ibikoresho by’amasashi,  byatangiye mu gihe hari ikibazo cyo gutsemba  amashyamba menshi mu gihugu  abantu bashaka ibicanwa n’ibindi, ariko nyuma hashyizwe imbaraga mu gutera ayandi mashyamba mashya, aho mu gihe gito yiyongereye ku 10% hose mu gihugu”.

Agaruka ku ruhare rw’ubuyobozi mu iterambere rirambye, Perezida Kagame yibukije ko byumvikana mu myumvire ya buri muyobozi wese, ko ibikorwa badashobora kubigeraho bonyine, hatarimo uruhare rw’abaturage nk’abagenerwabikorwa.

Ati “Birumvikana mu myumvire yacu nk’abayobozi ko abayobozi ntacyo bageraho hatarimo uruhare rw’abaturage, na bo uruhare rwabo ni ngombwa kuko ari nabwo na bo bashobora kugira icyo bageraho kibateza imbere”.

Ku birebana n’urujya n’uruza rw’abaturage barimo urubyiruko bahunga ibyaro bajya gushakira ubuzima mu migi, Perezida Kagame avuga ko u Rwanda rwitondeye icyo kibazo kandi kibonerwa igisubizo kirambye kuko byashobotse binyuze mu gushyiraho imigi yunganira Kigali abantu batangiye kwimukiramo.

Yagize ati “Ni ikibazo twiganye ubushishozi kandi kirashoboka ku buryo ubu hari imigi yunganira Kigali imaze gutera imbere mu turere dutandukanye tw’Igihugu, abantu benshi batangiye kuyijyamo, kandi bashishikarizwa kugira icyo batangira kuyikoreramo ngo itere imbere”.

Ku ishoramari, yatanze urugero ku ishoramari rikomeye ryakozwe mu iterambere ry’ubuhinzi hagamijwe ko abakora ubuhinzi bava mu buhinzi bwa gakondo bakajya mu buhinzi bubyara umusaruro mu buryo bw’amafaranga, binyuze mu gusagurira umusaruro wabo ku masoko.

Ku munsi wa mbere muri iyo nama ku iterambere, Perezida Kagame uri mu ruzinduko muri Leta Zunze Ubumwe z’Abarabu yakiriwe agirana ibiganiro byihariye n’Igikomangoma cya Abu Dhabi Mohamed bin Zayed Al Nahyan,  bagaruka ku mubano w’u Rwanda na Leta zunze ubumwe z’Abarabu n’uburyo uwo mubano warushaho kwaguka.

Umwanditsi:

Twagira Wilson

Tanga Igitekerezo

Email yanyu ntigaragazwa ku rubuga. Amazina na Email ni ngombwa.