22°C , Partly sunny | Kigali-Rwanda

Mu mashuri yigenga abana ntibazakunda uburezi abarimu babayeho nabi

Yanditswe na Rutayisire Emile

Ku ya 12-10-2019 saa 16:54:39
Umunyamabanga Mukuru wa SYNEDUC Nkotanyi Abdon Faustin (Foto Rutayisire E)

Nkotanyi Abdon Faustin, Umunyamabanga Mukuru wa Sendika y’Abarimu n’abandi bakozi bakora mu burezi mu bigo byigenga (SYNEDUC), avuga ko igihe mu mashuri yigenga umwarimu azaba adahembwa neza kandi adahemberwa igihe, atagira ubwishingizi mu kwivuza, bizatuma abana badakunda umwuga w’uburezi.

Nkotanyi asaba ubuyobozi bw’ibigo byigenga kwita ku mibereho y’abarimu n’abandi bakozi babikoramo niba bashaka kunguka no gukora uwo mwuga igihe kirekire.

Agira ati “Usibye ibibazo bigaragara hamwe na hamwe byo kudahemberwa igihe, aho usanga ubushobozi bwa mwarimu bwo kurihira abana amashuri ari buke cyane kubera kubura n’uburyo bwo kwaka inguzanyo, nk’ubu mu bigo byigenga dufite ikibazo kinini cyane no kuba abarimu usanga bafite amasezerano y’umurimo y’igihe gito ibyo bigatuma badashobora kuba bajya nko muri SACCO ngo bigurize inguzanyo z’igihe kirekire. Iki ni ikibazo gikomereye ibyo bigo kuko bishobora kuzagera igihe bikabura abarimu kuko abarimu badafatwa neza cyangwa bigatuma abana bakura banga uwo mwuga, n’igihugu kikabihomberamo.”

Nkotanyi akomeza agaragaza ibindi bibazo bigaragara mu bigo by’amashuri yigenga nk’aho ibigo byinshi bitagira ubwishingizi bw’ubuvuzi ku barimu, agasanga ibyo byose bica intege umwarimu kuko iyo arwaye agakenera kwivuza udufaranga yari afite twose tumushiraho bidasize igihe umugore yarwaye cyangwa n’umwana we yarwaye. Avuga kandi ku barimu badahabwa amasezerano y’igihe kirekire, aho badahabwa ubwishingizi, abadahembwa mu gihe k’ibiruhuko n’ibindi.

Ati “Mu bigo byigenga byinshi harimo ibibazo bitandukanye bikwiriye gukemuka kugira ngo abarimu babyo babeho neza ndetse n’abo bigisha bazamuke bakunze uwo mwuga.”

Nkurunziza Alain Pierre ni umwarimu umaze imyaka 32 mu mwuga wo kurera, yatangarije Imvaho Nshya ko yabaye mwarimu kubera ko yabonaga mwarimu yari umuntu wiyubashye ndetse n’abana be babayeho neza.

Agira ati “Navukiye mu kitwaga Nyamagabe. Twari duturanye n’umwarimu wigishaga ku kigo nigagaho. Abantu bose baramwubahaga, ari intangarugero, ari we ufite abakozi benshi mu rugo bamukorera imirimo y’ubuhinzi n’ubworozi, abana be bose biga kandi ari abahanga mu ishuri. Nakuze numva ngomba kuba mwarimu kubera ubuzima bwiza nabonaga abamo n’umuryango we.”

Akomeza avuga ko yabaye mwarimu kandi abikunda ariko ko imibereho ya mwarimu muri iki gihe yagombye guhinduka, agafatwa neza ntiyifuze nk’uko biri iki gihe aho yifuza inguzanyo ntayibone kubera uko ahembwa n’ibindi. Ati “Abana baba babibona nta bwo bashobora kwifuza kuba mu buzima nk’ubwo abamo muri iki gihe.”

Mukamurigo Clemence ni umwarimu mu ishuri ryigenga mu Mujyi wa Kigali, avuga ko iyo umwarimu adafashwe neza bimuca intege. Akagira ati “Kudahembwa neza bica intege umwarimu kuko abeshwaho n’akazi ko kwigisha  nta kindi kintu akora, iyo ukwezi kumwe gushize, ukwa kabiri kugashira umwarimu adahembwa acika intege, nta bwo agaruka afite intege. Babihe agaciro kuko ashobora no kwitotomba bikagwa mu matwi y’abana.”

Umwanditsi:

Rutayisire Emile

Tanga Igitekerezo

Email yanyu ntigaragazwa ku rubuga. Amazina na Email ni ngombwa.