21°C , Partly cloudy | Kigali-Rwanda

Mu 2100, 75% by’abatuye Isi bashobora kuzahitanwa n’ubushyuhe

Yanditswe na NYIRANEZA JUDITH

Ku ya 12-07-2020 saa 13:59:50
Ubushyuhe bukomeza kugenda bwiyongera ku buryo byatuma abagera kuri 75% by'abatuye Isi mu 2100 bashobora kuzaba bahitanwa n'ubushyuhe

Uko imyaka ihita ubushyuhe burushaho kuzamuka, ingano y’imvura igwa ikagabanuka nk’uko byagaragajwe mu bushakashatsi bwakozwe n’abashakashatsi bo muri Kaminuza ya Hawaï.

Ubwo bushakashatsi bwakozwe mu 2018 bwatangajwe mu gitangazamakuru “Nature Climate Change”, bwagaragaje ko 30% by’abatuye Isi bazibasirwa n’ubushyuhe bukabije mu gihe k’iminsi irenga 20 mu mwaka.

Byagaragaye kandi ko bahereye ku bipimo by’ubushyuhe, uko bugenda bwiyongera abantu bagera ku ¾ by’abazaba batuye Isi bashobora kuzahitanwa n’ingaruka z’ubushyuhe ku buzima mu mwaka wa 2100.

Impeshyi yo mu 2003 yibasiye cyane u Burayi aho abagera hafi ku 70 000 bapfuye. Kubera ubushyuhe kandi ingaruka zabaye nyinshi harimo inkongi z’umuriro zibasiye amashyamba, imihindagurikire y’urusobe rw’ibidukikije, amazi arenga inkombe n’ibindi.

Mu 2018, hagaragajwe kandi ko izamuka ry’ubushyuhe rishobora kuzikuba kabiri mu gihe k’imyaka 20 rikazahitana ubuzima bw’abantu. Nta bwo bizaba ari kimwe hirya no hino, kuko nk’i Dublin bizikuba kabiri naho i Copenhague buzikube gatanu.

Ubushyuhe buzazamuka, ku buryo ikigo k’iteganyagihe mu Bufaransa gitangaza ko muri rusange, ubushyuhe buziyongera buve ku gipimo bwari busanzweho, buzava kuri dogere seresiyusi 1,06 bukagera kuri dogere seresiyusi 1,62 (1,06 – 1,62°C) hagati y’umwaka wa 2020-2025.

Isesengura ryasohotse mu gitangazamakuru “Nature Climate Change”, ryerekanye ko izamuka ry’ubushyuhe rishobora kuzaguma kuri 2°C nk’uko byateganyijwe n’amasezerano y’i Paris ku miterere y’ikirere.

Iyo ubushyuhe bwiyongereye cyane bituma n’umubiri ukora nabi, hakaba n’abahitanwa nabwo kuko umubiri w’umuntu hari ubushyuhe ndetse n’ubukonje wihanganira.

Ubushyuhe bushobora kuba imvano y’urupfu kuko umuvuduko w’amaraso atembera uriyongera ntabonekemo umwuka mwiza imyanda iri mu mubiri ntisohokemo neza.

Ikindi ni uko uturemangingo twangiritse tudashobora kwisubira. Ubwonko bukora cyane bikazamura ubushyuhe. Kuzamuka k’ubushyuhe bw’umubiri cyane bihindura ibigize amaraso, akaba yazamo utubuyenge.

Nubwo muri rusange ubushyuhe bwinshi bugira ingaruka ku buzima ntibiba kimwe kuri bose kuko nanone bishingira ku bwirinzi bw’umubiri, imyaka, kumenyera ubushyuhe, imyitozo ngororamubiri bigira uruhare mu kubaka ubushobozi bw’umubiri mu guhangana n’ubushyuhe.

Umwanditsi:

NYIRANEZA JUDITH

Tanga Igitekerezo

Email yanyu ntigaragazwa ku rubuga. Amazina na Email ni ngombwa.