17°C , Thunderstorms | Kigali-Rwanda

Miriyoni zisaga 289 zatanzwe ku mishinga y’urubyiruko rwagororewe Iwawa

Yanditswe na Twagira Wilson

Ku ya 22-09-2019 saa 09:43:20
Aba ni abari basoje amasomo Iwawa ikiciro cya 17

Ikigo k‘Igihugu gishinzwe igororamuco NRS cyatangaje ko kugeza ubu imishinga 33 y’urubyiruko ruri mu makoperative y’abagororewe mu kigo cya Iwawa imaze guhabwa amafaranga yo gutegura imishinga yo kwiteza imbere.

Kugeza ubu ingengo y’imari yose imaze guhabwa urwo rubyiruko ni miriyoni 289, n’ibihumbi 328 z‘amafaranga y’u Rwanda.

Mu gikorwa cyo gusoza ikiciro cya 18 kigizwe n’urubyiruko 1.678 rw’agororewe mu kigo cyaIwawa, Bosenibamwe Aimé uyobora icyo kigo, yashimye abafatanyabikorwa bose bakorana mu rwego rwo kugabanya imibare y’abana bari mu buzererezi.

Ati “Hari zimwe mu ngamba Leta yashyizeho hagamijwe kubafasha gusubira mu buzima busanzwe nk’amahuriro yashyizweho mu rwego rw’uturere n’imirenge, ibikoresho by’ibanze bijyanye n’imyuga bize bahabwa, ndetse n’igice k’inguzanyo bahabwa kugira ngo babashe gushyira mu bikorwa imyuga y’ubumenyingiro bize”.

Itsinda rigizwe n’Urubyiruko 1.678 rw’agororerwaga mu kigo k’igororamuco cya Iwawa kiri mu karere ka Rutsiro, rwasoje amasomo yarwo, ruvuga ko rugiye kubyaza umusaruro imyuga inyuranye rwize ikarufasha gutera imbere, no kwirwanaho mu buzima aho kuguma mu biyobyabwenge.

Guverineri w’Intara y’Iburengerazuba Munyantwari Alphonse, yasabye ababyeyi babo n’Abanyarwanda muri rusange kongera guha ikizere urwo rubyiruko, ntibaruheze mu muryango nyarwanda kugira ngo barufashe mu mirimo iruteza imbere.

Urubyiruko rugera ku 1.678 rugize ikiciro cya 18, rwakoreshaga ibiyobyabwenge rwasubijwe mu buzima busanzwe, nyuma yo gusoza amasomo rwize, arimo ayo gutozwa indangagaciro z’umuco nyarwanda n’imyuga inyuranye irimo iy’ubuhinzi, ububaji, ubudozi n’ubwubatsi.

Bamwe muri urwo rubyiruko bavuga ko iyo myuga bize bagiye kuyishyira mu bikorwa kugira ngo ibateze imbere.

Buri munyeshuri wabaye indashyikirwa mu kwiga neza iyo myuga, hakiyongeraho n’abandi batatu baje imbere kurusha abandi mu gukoresha ikoranabauhanga rya mudasobwa, bagiye bahabwa ibikoresho bijyanye n’imyuga bize izabafasha kwiteza imbere.

Umuyobozi Mukuru w’Ikigo k’igihugu gishinzwe igororamuco Bosenibamwe avuga ko bateganyije amafaranga arenga miriyoni 70 azarufasha gutangiza imyuga rwize.

Nk’uko bigaragazwa n’Ikigo k’igihugu gishinzwe igororamuco, kuva mu mwaka wa 2010 iki kigo ngororamuco cya Iwawa kimaze gutoza urubyiruko rusaga ibihumbi 19, bamwe muri rwo bakaba barahindutse, ubu bakaba barabaye abagabo bari mu bikorwa biteza imbere igihugu n’imiryango yabo.

Umwanditsi:

Twagira Wilson

Tanga Igitekerezo

Email yanyu ntigaragazwa ku rubuga. Amazina na Email ni ngombwa.