Kigali-Rwanda

Mostly cloudy
21°C
 

Minnaert agiye guhabwa amasezerano muri Rayon Sports

Yanditswe na BIZIMANA ERIC

Ku ya Mar 20, 2018

Ubuyobozi bw’ikipe ya Rayon Sports buravuga ko nyuma yo kugaragaza umukino mwiza imbere ya Mamelodi, umubiligi Ivan Minnaert agiye guhabwa amasezerano nk’umutoza mukuru wa Rayon Sports.

Ivan Minnaert ugiye guhabwa amasezerano mu ikipe ya Rayon Sports

Minnaert yageze muri Rayon Sports nyuma y’isezera rya Karekezi Olivier wari ukuyemo  LLB y’i Burundi mu ijonjora ry’ibanze mu mikino y’Afurika “CAF Champions League 2018” umukino wa mbere yatsinze  Gicumbi igitego 1-0, atsinda  Espoir FC  ibitego 3-0 mbere yo kunganya na Mamelodi 0-0 i Kigali. Aha hose Minnaert yari mu igeragezwa ryo kureba uko yitwara kugira ngo abone guhabwa amasezerano ya burundu.

Umuyobozi  ushinzwe ibikorwa muri  Rayon Sports, Itangishaka Bernard yemeje ko Minnaert agiye  guhabwa amasezerano nyuma yo kugaragaza umukino utanga ikizere kandi usukuye n’ubwo yasezerewe na Mamelodi ku kinyuranyo k’ibitego 2-0 mu mikino yombi.

Yagize ati «Ntabwo navuga ngo umusaruro ni muke, twe tubona ari mwiza kuko n’umupira dukina abantu bose bawubonye. Abazi Mamelodi n’ukuntu babikubwira,  umutoza we yaratubwiye ati ni mwe munduhije kuva nabaho. Ubona ko ari umupira usukuye ku buryo Rayon Sports iri ku rwego rushimishije bivuze ko n’umutoza afitemo uruhare».

Minnaert agiye kongera guhabwa amasezerano nyuma yo gutandukana na Rayon Sports mu ntangiriro za shampiyona ya 2015/2016 ku mpamvu z’ibibazo byo kutabonera ku gihe umushahara we.

Rayon Sports iracyafite amahirwe mu mikino y’Afurika

N’ubwo Rayon Sports yasezerewe muri «TotaL CAF Champions League 2018» ifite andi mahirwe kuko igomba  gukina n’imwe mu makipe yakomeje muri Tota CAF Confederation Cup 2018» aho APR FC yaserewe na Djoliva AC yo muri Mali.

Amakipe Rayon Sports ishobora  guhura nayo ni CR Belouizdad, USM Alger (Algeria), CARA Brazzaville, CS La Mancha (Congo Brazzaville), Al-Masry (Misiri), Deportivo Niefang (Equatorial Guinea), Welayta Dicha (Ethiopia), Fosa Juniors (Madagascar), Djoliba (Mali) Raja Casablanca, RS Berkane (Maroc), Costa do Sol (Mozambique), Akwa United, Enyimba (Nigeria), SuperSport United (Afurika y’Epfo) na Al-Hilal Al-Ubayyid (Sudani). Tombola y’uko amakipe azahura izaba ejo tariki 21 Werurwe 2018.