18°C , Mostly cloudy | Kigali-Rwanda

Minisitiri Nyirahabimana yibukije ababyeyi inshingano yo kureberera abana

Yanditswe na Sezibera Anselme

Ku ya 10-11-2019 saa 16:38:30
Amb. Nyirahabinama Solina , Minisitiri w'uburinganire n'iterambere ry'umuryango

Minisitiri w’Uburinganire n’Iterambere ry’Umuryango (MIGEPROF) Amb. Nyirahabimana Solina, arongera guhamagarira ababyeyi ko bakwiye kongera kwibuka inshingano bafite mu bijyanye no kurera abana neza no kubareberera kugira ngo uburenganzira bwabo burusheho kurengerwa.

Ibyo yabitangarije Imvaho Nshya ubwo yitabiraga ibiganiro hagati ya MIGEPROF na Komisiyo y’Ubumwe bw’Abanyarwanda, Uburenganzira bwa Muntu no kurwanya Jenoside yo mu Nteko Ishinga Amategeko, mu rwego rwo kuganira ku ishyirwa mu bikorwa ry’itegeko ryo kurengera uburenganzira bw’umwana.

Amb. Nyirahabimana abanza kugaragaza ko iyo havuzwe umwana haba harebwa utarageza ku myaka 18 y’amavuko, havugwa uburenganzira bwabo bigasobanura ko ababyeyi ari bo bafite inshingano nyinshi cyane zo kubarera no kubareberera cyane cyane abatoya.

Agira ati: Turakomeza gukangurira ababyeyi kureba abana neza kuva bagisamwa, bavuka ndetse no muri ya minsi 1.000 babone indyo nziza yuzuye, bafatwe neza kugira ngo batagwingira.

Turabasaba kandi kubitaho no mu myaka 5 ibanza, tubashishikariza kujya babajyana mu bigo mbonezamikurire y’abana batoya kugira ngo bahabonere ubufasha na serivisi zitandukanye zituma babasha gutangira neza ubuzima haba mu rwego rw’isuku n’isukura, urw’imirire ndetse no kubarinda mu rwego rw’umutekano wabo kuko hanze aha hakiri abangiza abana batoya.”

Amb. Nyirahabimana anakomoza ku makimbirane usanga mu ngo ko ahanini ariyo anaba intandaro zituma abana bata imiryango bamwe bakisanga mu mihanda, abandi bakaba mu bigo, akaba asaba Abanyarwanda kuba bajya bihutira gukemura ibibazo mu gihe bivutse.

Agira ati: “Nta gihugu na kimwe, nta muryango n’umwe utasangamo ababana bagirana ikibazo, ariko iyo bibaye abantu nibicare mu miryango baganire barebe uburyo bagikemure mu bwumvikane kandi uwakoze ikosa amenye gusaba imbabazi aho kugira ngo bavutsanye ubuzima.”

Uwanyirigira Angelique ni umwe mu babyeyi uvuga ko hari ababyeyi batagiha umwanya abana babo ngo babaganirize kubera ibyo birirwamo byo gushaka ubuzima nyuma bakazisanga umwana yarabananiye cyangwa yarahariwe umukozi gusa uburere ari bukeya.

Ku rundi ruhande ariko avuga ko hari n’abatinya abana babo kuba babaganiriza ngo bumve ibyifuzo byabo, babashakire imyambaro, amafunguro ndetse bakine na bo umwana yamara kubura ibyo byose agahitamo kumva hari ahandi yabishakira cyangwa akagwa mu bishuko bya bagenzi be bagatoroka imiryango.

Agira inama bagenzi be zo kudatwarwa n’iby’Isi bashaka ibya mirenge kuko nta gihenda nk’umwana kandi akabibutsa ko ibyo bakora byose n’ubundi biba bigenewe gufasha abo babakomokaho.

Ubwo Komisiyo y’Ubumwe bw’Abanyarwanda, Uburenganzira bwa Muntu no kurwanya Jenoside yo mu Nteko Ishinga Amategeko yasesenguraga itegeko No 071/2018 ryo ku wa 31 Kanama 2018, ryerekeye kurengera umwana, hari amateka yagaragaraga cyane cyane akubiye mu ngingo ya 16, 17, akavuga ko ayo mateka kuva itegeko ryajyaho rya 2018 atarajyaho.

Umwanditsi:

Sezibera Anselme

Tanga Igitekerezo

Email yanyu ntigaragazwa ku rubuga. Amazina na Email ni ngombwa.