17°C , Mostly cloudy | Kigali-Rwanda

Minisitiri Busingye yasabye abagenzacyaha barahiye kwirinda ruswa

Yanditswe na Uwimana Donatha

Ku ya 21-01-2020 saa 09:35:01
Bamwe mu bakozi b'Urwego rw'Igihugu rw'Ubugenzacyaha barahiye

Minisitiri w’Ubutabera akaba n’Intumwa Nkuru ya Leta, Busingye Johnston, yakiriye indahiro z’Abagenzacyaha bo mu Ntara y’Uburengerazuba n’igice cy’abo mu ntara y’Amajyaruguru kegereye Uburengerazuba.

Minisitiri Busingye yahaye impanuro abarahiye abasaba kwirinda ruswa n’ikindi kintu cyose cyatuma bagaragaza isura mbi y’urwego bakorera ari rwo rwego rw’Igihugu rushinzwe Ubugenzacyaha, RIB.

Ati: “Murasabwa by’umwihariko muri uyu murimo wanyu kwirinda ruswa iyo ari yo yose n’ibindi byose byatuma mugaragaza isura mbi y’urwego mukorera, mukarangwa n’indangagaciro na kirazira tugenderaho nk’Abanyarwanda.”

Yabasabye gushyira imbaraga mu gukumira ibyaha by’ihohoterwa, n’ibiyobyabwenge ndetse by’umwihariko ibyo guhungabanya umutekano kuko umutekano ari wo musingi w’iterambere

Minisitiri w’Ubutabera yakomeje agira ati: “N’ubwo hari ibyaha biba bifite ubukana bwinshi butewe n’uko bikorwa, ingaruka zabyo n’imibare ya buri cyaha (igito cyangwa igikomeye) kirababaza; turasabwa kubirwanya umunsi ku munsi”.

Busingye yabashimiye kuba barahisemo gukora umwuga w’ubugenzacyaha, bagakurikirana amahugurwa neza ndetse bakabasha no kuyasoza. Ati: “Bitugaragariza ko mufite ubushake n’ubushobozi bwo kuzakora neza imirimo yanyu nk’uko mumaze kubyiyemeza mu ndahiro zanyu”.

Umunyamabanga Mukuru Wungirije w’Urwego rw’Igihugu rw’Ubugenzacyaha, RIB, Kalihangabo Isabelle, yavuze ko RIB ishinzwe igiye kumara hafi imyaka ibiri ishyizweho kuko habura amezi atatu, ikaba yaratangiranye abakozi 876 muri bo harimo bamwe mu bapolisi babarizwaga muri Polisi y’u Rwanda.

Avuga ko mu rwego rwo gukomeza kwiyubaka, RIB ikomeje kwakira mu kazi no guha abakozi bashya imirimo, baba abarangije kaminuza bigiye mu Ishuri rikuru rya Polisi y’u Rwanda (NPC), n’abakoze ibizamini ku mirimo itandukanye bagahabwa akazi.

Ati: “Mu rwego rwo kubahiriza ibiteganywa na sitati igenga abakozi b’Urwego rw’Igihugu rw’Ubugenzacyaha, RIB yatangije igikorwa cyo kurahiza abakozi bayo, baba ari abavuye muri Polisi y’u Rwanda, baba ari n’abashya. Ubu iki kikaba ari ikiciro cya 2”.

Hakaba harahiye uhagarariye RIB mu Ntara y’Uburengerazuba, ndetse n’ukuriye iperereza muri icyo gice.

Harahiye  kandi abahagarariye RIB mu turere twose tw’Intara ndetse n’abakuriye iperereza muri utwo turere, abakuriye ubugenzacyaha kuri za sitasiyo n’ababungirije bose, ndetse hararahira n’abashoferi 2, n’abashinzwe ibikoresho. Bose hamwe bakaba ari 57.

Umwanditsi:

Uwimana Donatha

Tanga Igitekerezo

Email yanyu ntigaragazwa ku rubuga. Amazina na Email ni ngombwa.