18°C , Partly sunny | Kigali-Rwanda

MINISANTE yahawe impano z’ibikoresho bipima diyabete

Yanditswe na TWAGIRA WILSON

Ku ya 17-01-2020 saa 07:04:05
Umunyamanga wa Leta muri MINISANTE Dr Ndimubanzi Patrick yakira ibikoresho bipima diyabete

Mu rwego rwo kunganira Leta y’u Rwanda hamwe n’ibindi bihugu byo ku mugabane w’Afurika mu gukumira no kurwanya ibyorezo by’indwara zitandukanye, Umuryango w’Abanyamerika ABBOT usanzwe ufasha mu bikorwa by’ubuvuzi, washyikirije Minisiteri y’Ubuzima, MINISANTE, ibikoresho bigezweho bifite ikoraranabuhanga rifasha gupima indwara ya Diyabete yo mu bwoko bwa mbere.

Dr. Ndimubanzi Patrick, Umunyamabanga wa Leta muri Minisiteri y’Ubuzima ushinzwe ubuvuzi rusange wakiriye ibyo bikoresho ari kumwe na bamwe mu bayobozi b’uwo muryango, yavuze ko Leta y’u Rwanda by’umwihariko Minisiteri y’Ubuzima bashimishijwe n’iyo mpano yatanzwe n’uwo muryango.

Iyo mpano ngo igiye gutuma abarwayi ba diyabete by’umwihariko bafite ubwoko bwa diyabete yo mu kiciro cya mbere ubuzima bwabo burushaho kuba bwiza, kuko ari ibikoresho birimo n’ibipimo bigizwe n’ikoranabuhanga rifasha kumenya ingano y’isukari mu mubiri w’umurwayi.

Umunyamabanga wa Leta muri MINISANTE yagize ati: “Nka Minisiteri y’Ubuzima turashimira ABBOT, kuko ari umufatanyabikorwa w’ingenzi utanze ibikoresho bizatuma abarwayi ba diyabete bitwara neza, bakamenya ikigero bariho, ku buryo byabahindurira ubuzima bakarushaho kumera neza.

Si mu Rwanda gusa hari ikibazo cya diyabete, ni indwara iba n’ahandi hose ku Isi, ni ikibazo gikomeye. Nk’u Rwanda ruzakomeza gufasha abayirwaye kubona imiti ku buryo bworoshye kandi turashishikariza abantu kujya bipimisha hakiri kare, kugira ngo abasanga barayanduye batangire imiti hakiri kare. Bizafasha kugabanya abayanduye, kuko kugeza ubu mu Rwanda abayirwaye ari 3%”

Avuga ko ku bafite ikibazo cya diyabete ubwoko bwa kabiri, bose bazakomeza kwitabwaho ariko abongabo by’umwihariko ni bwoko bwa diyabete ishingiye ku mibereho cyangwa nk’imyitwarire irebana n’imirire yo muri ibi bihe bigezweho. Inama atanga akaba ari ugukora imyitozo ngororamubiri n’ibindi.

Umuyobozi mukuru wa ABBOT ishami ryo ku mugabane w’Afurika  Bernard Brisolier, yabwiye itangazamakuru ko bazakomeza gufatanya n’u Rwanda mu rwego rwo kuba hafi no gukomeza kwita ku miryango n’amashyirahamwe y’abanduye indwara ya diyabete mu Rwanda binyuze mu bufatanye na Minisiteri y’Ubuzima.

Ati: “Mu bihugu byo munsi y’ubutayu bwa Sahara dukorana nabyo turizeza ko tuzakomeza kwita no guha ubushobozi abarwayi ba diyabete mu Rwanda biganjemo ababana na diyabete yo mu bwoko bwa mbere, by’umwihariko twibanda gukurikirana ikibazo k’ingano y’isukari iri mu maraso yabo, ku buryo ari bwo bazarushaho kubaho mu buzima bwiza kandi buzira umuze”.

Abbot imaze imaze imyaka 70 ikorera muri Afurika,  ibikorwa byabo by’ubuvuzi byagutse babikorera mu bihugu biri munsi y’ubutayu bwa Sahara bagamije ahanini gukumira indwara zitandukanye zirimo diyabete n’izindi zandura zirimo icyorezo cya SIDA, hepatite,  izandurira mu mibonano mpuzabitsina nka syphilis n’izindi.

Umwanditsi:

TWAGIRA WILSON

Tanga Igitekerezo

Email yanyu ntigaragazwa ku rubuga. Amazina na Email ni ngombwa.