Kigali-Rwanda

Partly sunny
18°C
 

MINISANTE: Siporo ya bose ifasha kwirinda no kwipimisha indwara

Yanditswe na Mugisha Benigne

Ku ya 18-02-2019 saa 09:10:17
Abanyarwanda barakangurirwa kwitabira siporo (Foto James)

Umunyamabanga wa Leta muri Minisiteri y’Ubuzima, Dr Ndimubanzi Patrick atangaza ko Siporo ya bose yatangijwe n’Umujyi wa Kigali imaze gufasha abayitabira kwirinda no kwipimisha indwara bakamenya uko ubuzima bwabo buhagaze.

Nk’uko byatangajwe na Dr Ndimunzi Patrick wari witabiriye siporo ya bose ku cyumweru, tariki ya 17 Gashyantare 2019 ngo siporo ifasha kwirinda indwara z’umutima, umubyibuho ukabije, kanseri n’izindi.

Ati: “Siporo ya bose ikorwa mu Mujyi wa Kigali ifasha abayitabiriye kunanura imitsi bifasha kwirinda indwara ndetse no kwipimisha ku buntu no ku bushake abantu bakamemya uko bahagaze.”

Avuga ko hari indwara nyinshi ziterwa n’uko umuntu abayeho, nko kurya amavuta, ukanywa isukari ugafata akayoga ariko ntukore siporo, ibyo byose bikaguma mu mubiri w’umuntu ari na bwo ashobora guhura n’indwara.

Ati: “Hari abantu bapimirwa hano batari bazi ko bafite indwara, wazibona ukabatangiza imiti hakiri kare indwara itarakura cyane, bamwe bashobora gukira kuko bivuje kare, izidakira nazo zigabanya ubukana.”

Avuga ko siporo ituma ubwonko bukora neza, abanyeshuri bariga bagafata, umuntu akumva amerewe neza mu buzima.

Dr Ndimubanzi agira inama Abanyarwanda kwitabira siporo, atari muri iyi gusa itegurwa n’Umujyi wa Kigali, ahubwo buri wese agahora yumva ko gukora siporo ari inshingano ye nk’uko abyuka buri munsi ajya ku kazi na siporo ngo akwiye kuyigenera umwanya uhagije.

Bamwe mu bitabiriye siporo ya bose kuri uyu munsi babwiye Imvaho Nshya ko siporo yabagiriye akamaro mu buzima bwabo, hari abamaze kuyikiriramo indwara bamenye ubwo bipimishaga, hari abahoranaga ubunebwe bwo kujya muri siporo, ariko kuba bari kumwe n’abandi batangiye kujya bayubahiriza.

Kantengwa Anne Marie ufite imyaka 58, avuga ko ataratangira kujya muri siporo yari yaratangiye kurwara imitsi, ariko nyuma yo kugira siporo ubuzima bwe ngo indwara y’imitsi iragenda yoroha ku buryo ngo nta n’indi miti agifata.

Ati: “Nari nararwaye rubagimpande, ariko natangiye kujya muri siporo ubu yatangiye koroha, imiti nafataga nabaye nyihagaritse kuko muganga iyo ansuzumye asanga bigenda byoroha.”

Undi na we witabiriye siporo rusange yabwiye Imvaho Nshya ko yaje muri siporo bwa mbere umwaka ushize, afata n’umwanya wo kwipimisha aho bahise bamubwira ko afite ikibazo k’impyiko, ngo yahise yoherezwa kwa muganga atangira gukurikiranwa ngo none ubu yarakize neza ngo amaze kwisuzumisha inshuro zitari munsi y’eshatu abwirwa ko impyiko ze ari nzima.

Ati: “Iyo ntitabira iyi siporo ya bose ngo mbashe kwipimisha, sinari kuzabimenya, nari kuzamenya ko ndwaye maze kugera ku musego, ariko ubu narivuje neza ndetse narakize, ni yo mpamvu ntashobora gusiba siporo rusange ndetse n’indi minsi niha mfata umwanya wo gukora siporo.

Dr Ndimubanzi agira inama Abanyarwanda kwita kuri siporo no kuyiha umwanya uhagije kuko ifasha mu kwirinda indwara zitandura zigenda zizahaza ubuzima bw’abantu, zirimo iz’imitima, imitsi, kanseri n’umubyibuho ukabije.

Dr Ndimubanzi, Patrick, Umunyamabanga wa Leta muri Minisiteri y’Ubuzima (Foto James)

Abanyarwanda barakangurirwa kwitabira siporo (Foto James)

Aba ni abitabiriye siporo rusange itegurwa n’Umujyi wa Kigali

Imyitozo ngororamubiri yitabiriwe n’ingeri zose z’abantu ( Foto James)

Bamwe bahitamo kujya kwipimisha amaso (Foto James)

Umwanditsi:

Mugisha Benigne

Tanga Igitekerezo

Email yanyu ntigaragazwa ku rubuga. Amazina na Email ni ngombwa.