MINICOM yashyizeho uburyo butuma abifite badacura abandi ibicuruzwa ku isoko

Yanditswe na Mutungirehe Samuel

Ku ya 23-03-2020 saa 18:41:35
Minisitiri w'Ubucuruzi n'Inganda, Hakuziyaremye Soraya mu bihe byashize

Minisiteri y’Ubucuruzi n’inganda yongeye gushyiraho ibiciro by’ibiribwa ku masoko, haba mu kurangura no kudandaza, ishyiraho n’ibiro ntarengwa ku muguzi ngo abifite batamara ibicuruzwa bonyine ku isoko bigatuma bantu babyiganira guhaha bikaba byatuma hongerwa ibyago byo kwanduzanya icyorezo cya Coronavirus.

Ni amabwiriza yatanzwe kugira ngo abantu bagura ibicuruzwa by’ingenzi bikenerwa mu biribwa by’urugo bidashira ku isoko bihashywe n’abantu bake bashaka kubidepa mu rugo rwabo mu bihe abantu basabwa kuguma mu ngo mu gihe cy’ibyumweru bibiri nabyo bishobora kuzongerwa.

Urugero ni aho ku muceri, umufuka w’ibiro 25 uranguzwa hagati ya 20500 na 21000, igiciro ku kiro kimwe mu iduka ntikijye munsi ya 840 cyangwa ngo kirenge 900, ariko umuntu umwe ntagure ibiro birenze 5 ku munsi. Ibishyimbo by’umutuku urangura ni hagati ya 550 ntarenge 600 mu gihe umuguzi ku kiro kimwe kitagomba kurenga 600 na 650 kandi umuntu umwe atemerewe kugura ibiro birenze 3 ku munsi.

Ibirayi nabyo byashyiriweho igiciro ariko umuntu ntashobora guhaha akarenza ibiro bitanu, isukari ntawurenza ibiro bitatu. Ku bicuruzwa by’isuku, minisiteri yagennye ko umuti wa alukoro gukaraba ukica mikolobe ku ntoki ntawurenza agacupa kamwe ka mililitiro 500, agapfukamunwa k’ibara ry’ubururu katarenza amafaranga 400 nabwo umuntu ntarenze ikarito imwe ku munsi.

Minisitiri w’Ubucuruzi n’inganda Hakuziyaremye Solaya, yavuze ko bongeye gushyiraho ibiciro kugira ngo n’abacuruzi badakomeza kuzamura ibiciro bitwaje ibihe igihugu kirimo by’icyorezo.

Ati “Twagira ngo abacuruzi bamwe badakomeza kongera ibiciro bitwaje iki cyorezo kandi tuzi neza ko nta giciro cyo kuranguza cyahindutse; uyu munsi rero twashatse no kongeraho ibiciro by’ibikoreshwa mu isuku byaba udupfukamunwa (masks) n’uturindantoki abantu bakenera cyane cyane kugira ngo birinde icyo cyorezo kuko naho byagaragaye abantu benshi batugana, batubwira ko byahenze cyane.

Dufatanyije n’ikigo gishinzwe igenzura ry’ibiribwa n’imiti Rwanda FDA bakora igenzura muri iki cyumweru basanga hari amaduka amwe n’amwe na za farumasi zongera ibiciro by’ibyo bikoreshwa mu isuku n’ibikoreshwa mu gukumira iki cyorezo ku buryo ari yo mpamvu twashakaga ko nabyo ibicir bimenyekane n’ababirengaho babe babihanirwa.”

Minisitiri yakomeje asobanura ibintu bibiri bashingiyeho mu kugena ingano y’ibiro umuguzi atarenga agura ibiribwa ku iduka.

Ati “Icya mbere ni uko mu igenzura twakoze haba mu cyumweru gishize twabonaga uko minisiteri y’ubuzima itanga ingamba zo gukumira iki cyorezo cyangwa se no kubuza abantu kuba bari ahantu hari abantu benshi, hari ababigiriragami impungenge bagahita bajya guhaha ibintu byinshi badakeneye kandi ukabona bashobora kugura nk’ibintu byamara ukwezi bituma no ku isoko abantu bagira ngo ibicuruzwa byashize.

Icya kabiri, ni uko iyo abantu babona abandi bagura ibintu byinshi hari n’abacuruzi abavuga bati bino nari mfite muri depo reka mbe mbihishe, simbigeze ku isoko noneho n’icyo giciro kizamuke nk’aho ibintu byabuze; ibyo ni ibintu tugira ngo amasoko akomeze kugenda nk’uko yarameze, twaganirije abacuruzi kugira ngo twumve sitoke bafite. Ibicuruzwa birahari ahubwo ni uko hari abari kuriririra kuri iki cyorezo kugira ngo bunguke ari nayo mpamvu uyu munsi twahisemo kugena ibiciro kuko nejo ibintu byagaragaye ko abantu birukiye mu masoko bakagura bacuranwa.”

Minisitiri yongeye kwizeza abaturage ko ibicuruzwa bihagije bihari kandi byaba ibituruka hanze n’ibiva imbere mu gihugu bitahagaze kugera ku masoko muri ibyo byumweru bibiri abantu basabwa kuba bari mu ngo, asaba n’abacuruzi kubwira abakiriya ko bitemewe guutanga umufuka w’ibintu ku muntu utaje kurangura.

Ubugenzuzi bwakozwe hirya no hini ku masoko mu gihugu cyane cyane mu Mujyi wa Kigali, bwasize abacuruzi bagera kuri 54 bahaniwe kuzamura ibiciro abandi kudatanag inyemezabuguzi ku byo bacuruje n’ibindi bitujuje ubuziranenge, bivamo amande angana na miliyoni 4 n’ibihumbi 380.

Umwanditsi:

Mutungirehe Samuel

4 Comments on “MINICOM yashyizeho uburyo butuma abifite badacura abandi ibicuruzwa ku isoko”

  1. Bajye Baduha Na Numero Twatangiraho Amakuru Kuko Abacuruzi Barimo Baraduhenda Cyaneeee
    Utugero:Agapfukamunwa:2000
    Mironko 1 y’inyanya 1000
    Umunyu 1kg=300

  2. Nibyiza cyane rwose ahubwo hakurikiranywe ishyirwa mubikorwa niho bizambira maze umuturage gahunda ya Leta yagennye ntimugereho murakoze

  3. Mwiriwe, nibyiza Rwose nka leta ku izingamba mukomeje kufata mu rwego rwo kwirinda icyorezo cya corona virus,gusa ikibabaje nubwo mwashyizeho ibiciro by’ibiribwa ntabwo biri gukurizwa abacuruzi barikubihendaho mwadufasha cyane nko mukarere ka Rubavu mu Centre ya Mahoko abacuruzi bari kugurisha uko bishakiye:urugero umuceri wari usanzwe ugura 22000frw wageze kuri 26000frw Leta nimukomeze mudufashe.ikindi nuko ubona abantu bamwe namwe ntacyo bibabwiye kugamba mwashyizeho ko abantu bagomba kuguma murugo kugendagenda nubundi ubonako abantu bakibikora hano kd twakagombye kubahiriza aya mabwiriza murwego rwo kwirinda iki cyorezo.Murakoze

  4. Kicukiro ,kagarama birarenze:umuceli tanzaniya 25kgs nihagati ya 31000 na 35000.ikiro ni hagati ya 1300 na 1500.kuri buri uwo ariwo wose.byose bongeyejo ibiceli.muduhe number twahamagaraho birakabije.

Tanga Igitekerezo

Email yanyu ntigaragazwa ku rubuga. Amazina na Email ni ngombwa.