Kigali-Rwanda

Partly sunny
18°C
 

MINEDUC izanenga abarezi badashoboye ibone kuzamura imibereho y’abarimu

Yanditswe na Mugisha Benigne

Ku ya 20-11-2018 saa 10:47:02
Abarezi badakora bazagawa abandi basigaye bahabwe uburyo bw'imibereho

Umunyamabanga wa Leta ushinzwe amashuri y’inshuke, abanza n’ayisumbuye Dr. Munyakazi Isaac aratangaza ko ikibazo k’imibereho y’abarimu kizwi na Leta kandi iteganya kugishakira igisubizo.

Gusa ngo hari byinshi bigomba kubanza gukorwa nko kunenga abarezi badakora n’abadashoboye ikabona kuzamura imibereho y’abasigaye.

Ibi yabitangarije Imvaho Nshya mu kiganiro kihariye yagiranye na yo ku kibazo k’ingingimira abarezi badahwema kugaragaza cy’umushahara muto bafite utajyanye n’ibiciro ku isoko, bagahora basaba ko iki kibazo kirebwaho.

Yagize ati “Ni byo Leta izi neza ikibazo abarezi bafite kijyanye n’amikoro make n’imibereho idahagije ariko hari byinshi bigikeneye gukorwa mbere y’uko harebwa ku mibereho y’abarimu, haracyari abagaragara nk’abadashoboye, abadakora n’abandi bishoye mu businzi n’ibiyobyabwenge, abo bose bagomba kubanza kujorwa abasigaye hakarebwa uburyo Leta ibazamurira imibereho.”

Abarezi badakora bazagawa abandi basigaye bahabwe uburyo bw’imibereho

Yagarutse ku by’ibanze Leta yabanje gukora mu kuzamura imibereho y’abarimu birimo gushyiraho Koperative Umwalimu Sacco ngo ifasha abarezi kugurizwa no kwizigamira kugira ngo byunganire umushahara wa mwarimu.

Yavuze ko abarezi bagiye bagaragaza kenshi ko bakeneye inyongera ku mushahara, ariko hari ibikenewe kubanza gukorwa harimo no gusuzuma imikorere yabo kugira ngo abadashoboye n’abandi batari mu murongo mwiza babanze babigaragarizwe hasigare abashoboye.

Dr. Munyakazi yavuze ko muri gahunda ya Guverinoma y’imyaka 7 harimo ingingo yo kuzamura imibereho ya mwarimu, bikaba bizakorwa, gusa hakaba hari ibigomba kuza mbere yabyo.

Kuri iki kibazo cyo kongera imibereho ya mwarimu, abasenateri na bo bakigarutseho basaba Leta kongeza umushahara w’abarimu kuko utajyanye n’ibiciro ku masoko.

Abarezi iyo uganiriye na bo ku kijyanye n’ireme ry’uburezi rimaze imyaka n’indi rishakishwa rikaba ritaragerwaho, bavuga ko babayeho mu buzima bugoye kubera umushaharo muto bafite.

Abarezi ntibahwema gusaba ko bongezwa umushahara, bagahabwa isoko bihariye, no gufashwa kuba abana babo bakoroherezwa mu kwiga kuko na byo biri mu bibahangayikishije.

Umwanditsi:

Mugisha Benigne

8 Comments on “MINEDUC izanenga abarezi badashoboye ibone kuzamura imibereho y’abarimu”

  1. Ibi birakwiye pe ko mwarimu yongezwa umushahara ugereranije nibiciro byo ku isoko maze nawe akagira imibereho myiza nkabandi bakozi ba Leta kandi tujye twibuka ko Mwarimu ariwe pfundo rya byose. Mubatekereze ho kabisa kuko birakwiye

    1. None se bazabanza kunenga, hari umwaka ushira badatanze cotation igaragaza uko buri mwarimu yakoze n’umusaruro bamubonamo? Ko atari Minister uzaza kubikora ku mashuri bshereye kuri ibyo.
      Keretse niba ari tours du Rwanda mu barimu ashaka !!!!!

  2. uwanenga we ntiyasoza kuberako n’abakozi ba REB yabanenga. nonese nawe iyo bifata bakandika kubitabo ngo byemewe na REB kandi byuzuye amakosa gusa.kuki batabanza kubikosozanone ngo bazabanza kunenga mwarimu buri wese acaho ikoma uko yiboneye?

  3. hhhhh hazabanza kureba abadashoboye nabasinzi ese muzindi nzego za leta niko bigenda koko? mbereyo kuzamura imishahara muzindinzego habanza gukurwamo ..ahaaaaa,ikibazo cyamwalimu mbona cyirengagizwa

Leave a Reply to Joshua Cancel reply

Email yanyu ntigaragazwa ku rubuga. Amazina na Email ni ngombwa.