19°C , Mostly cloudy | Kigali-Rwanda

MINAGRI yiteguye kubakira ku makuru ahuza umusaruro n’amasoko

Yanditswe na Sezibera Anselme

Ku ya 08-12-2019 saa 14:42:01
Minisitiri w'Ubuhinzi n'Ubworozi Dr. Mukeshimana Geraldine mu bihe byashize

Minisiteri y’Ubuhinzi n’Ubworozi (MINAGRI) irahamiriza Abanyarwanda ko yiteguye kubaka ubushobozi bwayo mu buryo bwo kubakira ku makuru n’ubushakashatsi byimbitse bigamije guhuza umusaruro w’ibikomoka ku buhinzi ndetse n’amasoko yabyo kugira ngo hatabaho ihindagurika rya hato na hato mu biciro aho usanga uyu munsi ibiribwa ari bikeya ejo ugasanga byabaye byinshi.

Ibyo Minisitiri w’Ubuhinzi n’Ubworozi Dr. Mukeshimana Geraldine arabikomozaho nyuma y’ikiganiro kigufi yagiranye n’itangazamakuru nyuma yaho yari amaze kugaragarizwa impungenge zihari zijyanye n’ibiciro bya bimwe mu bihingwa nk’ibishyimbo, ibigori ku masoko yo mu Rwanda.

Dr. Mukeshimana agaragaza ko uyu mwaka ushize wa 2018 utagize imbaraga mu bijyanye n’umusaruro kubera ko ibintu bitagenze neza cyane kubera ko ibihe bitabaye byiza cyane nk’uko byari bimeze mu bindi bihe.

Minisitiri Mukeshimana avuga ko kimwe mu byo igihugu gishaka gushyiramo imbaraga, ari ukumva ibijyanye n’ubucuruzi bw’ibihingwa aho yagaragaje ko ku Isi hose ikintu kigoye ari ikijyanye n’ubucuruzi bw’ibiribwa, ariko anagaragaza ko kimwe mu bintu bikomeye kica iterambere ry’ubuhinzi ari masoko y’ibihingwa.

Agira ati: Ni yo mpamvu dushaka kubishyiramo imbaraga tukajya tubimenya, buriya mbahaye nk’urugero, aha mu isoko rya Kigali hari igihe bavuga ngo nta mbuto zihari, ariko ubu tuvugana isoko rya Rusizi ririmo riratanga imyembe ku buntu kuko babuze isoko urumva n’amakuru aba atuzuye kugira ngo abari i Kigali bamenye aho ibintu biri n’uburyo babigezwaho.

Turashaka kubaka ibyo bintu bijyanye n’ubucuruzi bw’ibiribwa, mbahaye nk’urugero mwibuka ko umwaka ushize twari mu bibazo by’uko ibihingwa byabuze isoko bigura amafaranga make cyane, none uyu munsi ibiciro birimo birazamuka”.

Minisitiri Dr. Mukeshimana avuga ko kubaka iteganyagihe ryimbitse mu gutanga ayo makuru ndetse n’ubushakashatsi bigahuzwa, ari ngombwa kugira ngo umusaruro n’amasoko biturutse ku makuru ahagije kandi yizewe, ibyo ni byo Leta yifuza gushoramo ubumenyi ndetse n’imari kugira ngo bihuzwe.

Aganira n’itangazamakuru yatanze urugero avuga ko uyu mwaka ushize nk’ibishyimbo byabaye nk’ibibora mu miteja ntibyazamuka ngo bige ku isoko nk’uko bisanzwe, asobanura ko urwo ruhurirane ari rwo rwatumye ibyo byose biba kutabona umusaruro mwiza uko byari bitegerejwe.

Nk’uko abikomozaho yagize ati: Nkange igihe maze muri Minisiteri y’Ubuhinzi n’Ubworozi nabonye ko iyo abahinzi bejeje bakabona isoko ryiza, umwaka ukurikiyeho tubona umusaruro. Iyo batabonye isoko ryiza kandi umwaka ukurikiyeho nta bwo tubona umusaruro, ni yo mpamvu nkomeza gushimangira ko kubona amasoko y’umusaruro bikomeye cyane kugira ngo ubuhinzi butere imbere.”

Muri rusange Dr. Mukeshimana yemeza ko nta gihugu na kimwe yigeze abona cyashoboye guteza imbere ubuhinzi kitarashobora gukemura ibibazo bijyanye n’amasoko y’umusaruro w’ubuhinzi.

Umwanditsi:

Sezibera Anselme

Tanga Igitekerezo

Email yanyu ntigaragazwa ku rubuga. Amazina na Email ni ngombwa.